މަޖިލިސް މެންބަރުން ޕާޓީ ބަދަލު ކުރުމުން ގޮނޑި ގެއްލޭގޮތަށް ހުށަހެޅި އިސްލާހު ކޮމިޓީން ފާސްކޮށްފި އެވެ. މިއީ ސަރުކާރުގެ ފަރާތުން، ޕީއެންސީގެ ޕާލިމަންޓްރީ ގްރޫޕުގެ ޑެޕިއުޓީ ލީޑަރު، ހުޅުދޫ ދާއިރާގެ މެންބަރު މުހައްމަދު ޝާހިދު (ޝާޑު)، ގާނޫނު އަސާސީއަށް އިސްލާހު ގެނައުމަށް ހުށަހެޅުއްވި ބިލެކެވެ.
ރައްޔިތުންގެ މަޖިލީހުގެ މެންބަރުން ޕާޓީ ބަދަލުކުރުމުން ގޮނޑި ގެއްލޭ ގޮތަށް ގާނޫނު އަސާސީއަށް ގެންނަން ހުށަހަޅާފައިވާ އިސްލާހު ކޮމިޓީން ފާސްކުރީ 75 މެންބަރުންގެ ވޯޓުންނެވެ. އަދި 13 މެންބަރުން ވަނީ ނުފެންނަ ކަމަށް ވޯޓު ދީފައެވެ.
ހުށަހެޅިފައިވާ އިސްލާހުގައި، މަޖިލިސް މެންބަރުން ގޮނޑި ގެއްލޭނެ ހަތަރު ހާލަތެއް ބަޔާންކޮށްފައިވެއެވެ. އޭގެ ތެރޭގައި ވަކި ޕާޓީއަކުން ހޮވުމަށްފަހު އެ ޕާޓީން ވަކިވުމާއި، ޕާޓީން މެންބަރު ވަކިކުރުމާއި، އެހެން ޕާޓީއަކަށް ބަދަލުވުމާއި، އަމިއްލަގޮތުން ހޮވުމަށްފަހު ޕާޓީއަކަށް ބަދަލުވުން ހިމެނެއެވެ.
މި އިސްލާހަކީ ކުރީގެ އެމްޑީޕީ މެޖޯރިޓީ އޮތް މަޖިލީހުން އެކުލަވާލި އެންޓި-ޑިފެކްޝަން ގާނޫނުގެ ދަށުން ގެނެވޭ ބަދަލެކެވެ.
ކޮމިޓީން ފާސްކުރި އެހެން އިސްލާހުތަކުގެ ތެރޭގައި، ބޭރު ސިފައިން ރާއްޖޭގައި ގާއިމްވެ ތިބެވޭނީ މަޖިލީހުން ފާސްކޮށްގެން ކަމަށް ބަޔާންކުރާ އިސްލާހެއްވެސް ހިމެނެއެވެ.
މި އިސްލާހުތައް މަޖިލީހުގެ ތަޅުމުން ފާސްކުރުމަށް މިއަދު ހަވީރު 5:30 ގައި މަޖިލީހުގެ ޖަލްސާއެއް ބޭއްވުމަށް ވަނީ ތާވަލު ކޮށްފައެވެ.