ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންދަވަނީ ރައްޔިތުންނަށް ބާރު ދެއްވުމަށް ކެނޑިނޭޅި މަސައްކަތް ކުރައްވަމުން ކަމަށް ދިވެހި ރާއްޖެއިން ސިންގަޕޫރަށް ކަނޑައަޅުއްވާފައިވާ ޑެޕިއުޓީ އެމްބެސެޑަރު މުހުތާޒް މުހްސިން ވިދާޅުވެއްޖެއެވެ.
ކުރީގެ ޕްރޮސެކިއުޓަރ ޖެނެރަލް މުހުތާޒް މުހްސިން މިފަދައިން ވިދާޅުވެފައިވަނީ އިއްޔެ އެކްސް (ކުރީގެ ޓްވިޓަރ) ގައި ކުރެއްވި ޕޯސްޓެއްގައެވެ. މި ޕޯސްޓަކީ ޕާޓީ ބަދަލުކޮށްފިނަމަ މަޖިލިސް މެންބަރުންގެ ގޮނޑި ގެއްލޭ ގޮތަށް ގާނޫނު އަސާސީއަށް ސަރުކާރުން ހުށަހަޅާފައިވާ އިސްލާހާ ގުޅިގެން ކުރެއްވި ޕޯސްޓެކެވެ.
މުހުތާޒް މުހްސިން އިތުރަށް ވިދާޅުވެފައިވަނީ ރައްޔިތުންނަށް ބާރު ދިނުމަށް ދެކޮޅު ހަދާ ފަރާތްތައް މިހާރު ތިލަވަމުންދާ ކަމަށެވެ. އަދި ރައީސް މުއިއްޒު ގެންދަވަނީ ރައްޔިތުންގެ ބާރު ރައްޔިތުންނަށް ދެއްވުމަށް ކެނޑިނޭޅި މަސައްކަތް ކުރައްވަމުން ކަމަށާއި، ގާނޫނު އަސާސީއަށް ހުށަހަޅުއްވާފައިވާ އިސްލާހަކީ އެކަމުގެ ހެކި ކަމަށްވެސް ވިދާޅުވިއެވެ.
ފާހަގަކޮށްލެވޭ ކަމަކީ، ގާނޫނު އަސާސީއަށް އިސްލާހު ގެނައުމަށް ހުށަހަޅާފައިވާ ބިލުގައި މައިގަނޑު ހަތަރު އިސްލާހެއް ހުށަހަޅާފައިވާކަމެވެ. މި އިސްލާހުތަކުގެ ތެރޭގައި ޕާޓީ ބަދަލުކުރާ މެންބަރުންގެ ގޮނޑި ގެއްލޭނެ ކަމަށް ބަޔާންކޮށްފައިވާ އިސްލާހު ހިމެނެއެވެ.
މި އިސްލާހުތަކާ ގުޅިގެން ސިޔާސީ މައިދާނުގައި ތަފާތު ޚިޔާލުތައް ފާޅުކުރަމުންދާއިރު، ސަރުކާރުން ބުނަނީ މި އިސްލާހުތަކަކީ ރައްޔިތުންގެ ބާރުވެރިކަން އިތުރުކޮށް، ޑިމޮކްރަސީ ހަރުދަނާކުރުމަށް އެޅޭ މުހިންމު ފިޔަވަޅުތަކެއް ކަމަށެވެ. ނަމަވެސް، ބައެއް ފަރާތްތަކުން މި އިސްލާހުތަކާމެދު ކަންބޮޑުވުން ފާޅުކޮށްފައިވެއެވެ.