(މިއީ ސީއޯޕީޑީ ޕޭޝަންޓަކު، އޭނާގެ ފިރިމީހާއަށް ފޮނުވާ ޝުކުރުގެ މެސެޖެކެވެ، މި ވާހަކަ ހުވަދޫމީޑިއާ މެދުވެރިކޮށް ހިއްސާކޮށްލަމެވެ.)
މިއަދުގެ ތާރީހުގައި އަހަރެންގެ ވާހަކައިން ބުނެދޭން ބޭނުންވަނީ، ކިތަންމެ ބަލިހާލަތެއްގައިވެސް އަނބިމީހާއަށް އެހީވުމަކީ އޭނާގެ ހިތްވަރަށް ވާނެކަން ދަންނާށޭ، ދަތިހާލުގައި، ބަލިހާލުގައި ދޫކޮށްލާފައި ދާ މީހަކީ ތިމާއަށް ހެޔޮއެދުނު، ތިމާދެކެ އެއްވެސް އިރެއްގައި ހަގީގީ ކުލުނަކާއި ލޯތްބެއް ވި މީހެއް ނޫންކަން ޔަގީންކުރާށެވެ!
ސީއޯޕީޑީ އަކީ ވޭން ހުރި، ހިތްދަތި އަސަރުތަކެއް ކުރުވާ ބައްޔެކެވެ. މިއީ ދިގުދެމިގެންދާ، ދާއިމަށް ފަރުވާ ކުރަންޖެހޭ ބައްޔެއްވެސްމެއެވެ. ނޭވާހިއްލުން ނުވަތަ ނޭވަޔަށް އުނދަގޫކުރުން، މިއީ ދިވެހިންގެ ތެރޭގައި އާންމު އެސްތުމާއަށް ކިޔާ ނަމެވެ. ސީއޯޕީޑީއަށް ވެސް ދިވެހިން ކިޔައި އުޅެނީ ނޭވާހިއްލުން ކަމުގައިވިޔަސް މިއީ އެސްތުމާއާ އަށްވުރެ އުނދަގޫދެނިވި، އަދި އުމުރުދުވަހު ބޭސްކުރަން ޖެހޭ ބައްޔެކެވެ.
އަހަންނަކީ އުފާވެރިކޮށް އުޅެމުންދިޔަ، ދުޅަހެޔޮ ސިއްހަތެއްގައި ބޮޑުވަމުން އައި މީހަކީމެވެ. އުމުރުން 30 އަހަރުވީފަހުން ނޭވާލާން އުނދަގޫވުމާއި ހާސްވުމުގެ އެކިކަހަލަ ކަންތައް ދިމާވާން ފެށިއެވެ. ތަފާތު އެއްޗިއްސަށް އެލާޖިކް ވުން އާންމުކަމަކަށް ވިއެވެ. ގިރާއަތު ކޯހުގެ ޑިޕްލޮމާއަށް ކިޔަވަމުން ކުދިންނަށް ޤުރުއާން އުނގަންނައިދެމުން ދިޔަ އަހަރެންގެ މުޅި ހަޔާތް އެފުށް މިފުށަށް ޖަހާލި އެހާދިސާ ދިމާވީ، ލެވެލް ކުދިންތަކަކަށް އާދާބު ކުލާހެއް ނަގައިދިނުމަށް ކުލާސްތެރޭގައި ހިނގަހިނގާ ހުއްޓައެވެ. އޭރު ރޯގާ ޖެހި، ނުފިލާ ހުމެއް ހުންނަތާ ދެދުވަހެއް ވަރު ވެއްޖެއެވެ، ގަސްދުކޮށްގެން ހުރީ ކުލާސް ނަގައިދީފައި ޑޮކްޓަރަށް ދެއްކުމަށެވެ. އެކަމަކު ކުރިއަށް އޮންނަ ހިނދުކޮޅުގައި ބަދަލުވާނީ ކޮންކަމެއް ކިހިނެއްކަން އެނގޭނީ ކާކަށްހެއްޔެވެ.
ފިލާވަޅާގުޅޭ ވާހަކައެއް ކިޔައިދެމުން ހިނގަހިނގާ ހުރި އަހަރެން ވެއްޓުނީ ކުލާހުގެ މެދަށެވެ. ހޭވެރިކަމެއް ވީއިރު އޮތީ މެޝިނަކާ ގުޅާފައެވެ. އަައިވީއަކާއެކު މާސްކެއް އަޅާފައެވެ. އޮކްސިޖަން ގުޅާފައެވެ. ގާތުގައި އިނީ ލޯބިވާ ބައްޕައެވެ. ހޭއެރިކަން އެނގުމުން ޑޮކްޓަރުންނާއި ނަރުހުން އަތުވެއްޖެއެވެ. ބައްޕަ އިނީ އަހަރެންގެ އަތުގައި ހިފަހައްޓައިގެންނެވެ. ލައްވާފައި އޮތް ނޫކުލައިގެ ހެދުމާއި މޭމަތީގައާއި އަތަށް ގުޅާފައި ހުރި ނަރުތަކާއި ކައިރީގަައި ހުރި ބޮޑު މެޝިނާއި އޮކްސިޖަން ވެންޗޫރާ މާސްކު، އަހަންނަށް ކިޔައިދިނީ ގަބޫލު ކުރަން ބޭނުން ނުވާ ވާހަކައެކެވެ. ކުޑަކޮށް ހަށިގަނޑު ތެދުކޮށްލަން ކަމަށް ހަރަކާތްކޮށްލުމުން އުނަގަނޑުން ތިރިއަށް ތަދެއް ވެއްޖެއެވެ. ބައްޕަ ތެޅިގެންފައި މަގޭ ކޮނޑުގައި ހިފަހައްޓައި މަޑުމަޑުން ބޮލުގައި ފިރުމާލިއެވެ. ބޮލުގައި ބުރުގާއެއް ނެތެވެ. ގައިގައި ހަކަތައެއް ނެތެވެ. ދުލެއް ހަރަކާތެއް ނުކުރިއެވެ. ލޮލުން ނިރާލީ ކަރުނައެވެ. އޮތީ ޔޫރިންބޭގްވެސް ގުޅާފައިކަން އެނގުމުން ކުރި އަސަރު އިހުނަށްވުރެ ބޮޑުވީއެވެ. ވެގެންމިއުޅެނީ ކީއްހެއްޔެވެ. ޑޮކްޓަރުންގެ ޓީމެއް އައީ ކީއްކުރަން ހެއްޔެވެ. ވަކިން ކޮޓަރިއެއްގައި މިއޮތީ ކިހިނެއްވެގެންހެއްޔެވެ. ހައްތަހާވެސް ސުވާލެވެ،
ޖަވާބު އެނގުނީ އޭގެ ހަފުތާއެއްވެސް ވީ ފަހުންނެވެ. އެދުވަހުގެ އެވަގުތުން ފެށިގެން އަހަންނަށް ބަރާބަރަށް ފަރުވާ ދެމުން ދިޔައީ ސީދާ ހާއްސަ ޑޮކްޓަރުންގެ ބެލުމުގެ ދަށުން ސީރިއަސް ގޮތެއްގައެވެ. އަހަރެން އޮތީ އައިސީޔޫގައި ކަން އެނގުނުނަމަވެސް ހަގީގަތުގައި ވީ ގޮތް އެނގުނީ މާފަހުންނެވެ. ފަސް ދުވަސްވީއިރުވެސް އޮކްސިޖަން ހިފަހައްޓާނުލައެވެ. ބައްޕައަކީ ސިއްހީމާހިރެއްކަމުން ޑޮކްޓަރުންނާ ގުޅުން ރަނގަޅުކަމަށްވެފައި ބޮޑުދައިތަ ކިޔާ ނަރުސްކުދިންތަކެއް ތިބުމާއެކު، އަހަންނަށް ހާއްސަ ސަމާލުކަމެއްވެސް ލިބެމުންދިޔައެވެ. މަންމައާއި ދައްތަމެންވެސް ބައްދަލުވާން އާދެއެވެ. އެހެންނަމަވެސް އެންމެންގެ މޫނުތަކުންވެސް ފެންނަ މާޔޫސްކަން އަހަންނަށް ފޮރުވައެއް ނުލެވުނެވެ.
ހޮސްޕިޓަލަށް ގެންދިޔައިރު ނޭވާކުރުވެ، އޮކްސިޖަން ހުރީ 60އަށް ދަށްވެފައެވެ. ނިއުމޯނިއާ ޖެހި ފުއްޕާމޭގެ ބޮޑުބައެއް ހަލާކުވެފައެވެ. ހަގަޑިއިރުގެ ކޯމާއަކަށްފަހު ވެންޓިލޭޝަނުން، އައިސީޔޫއިން ގެއަށް ބަދަލުކުރި އިރު އަހަރެންގެ ހަޔާތުގެ ހުރިހާ ކުލައެއް ބަދަލުވެއްޖެއެވެ. އަހަރެންގެ ދިރިއުޅުން ތަފާތުވެއްޖެއެވެ.
ސީއޯޕީޑީ އަކީ ވޭން ހުރި، ހިތްދަތި އަސަރުތަކެއް ކުރުވާ ބައްޔެކެވެ.
މިއަދު އަހަރެން ނޭވާލުމަށްޓަކައި މެޝިނެއްގެ އެހީ، ދުވާލެއްގެ ދެގަޑީގައާއި ނިދާއިރު ބޭނުންވެއެވެ. އޮކްސިޖަން ދަށްވާތީ ދޭތެރެ ދޭތެރެއިން އެޑްމިޓް ކުރަން ޖެހޭ ހިސާބަށް ދެއެވެ. ނިދުމުގެ ތެރޭގައި އޮކްސިޖަން ހުއްޓިދާނެތީ ބަރާބަރަށް މެޝިނުގެ އެހީ ހޯދަން ޖެހެއެވެ. ބޭނުން ވިޔަސް ކޮންމެ ކޮންމެ އެއްޗެއް ނުކެވެއެވެ. ކިތަންމެ ހިތް ކިޔަސް ކޮންމެކޮންމެ ކަހަލަ އަންނައުނެއް ނުލެވެއެވެ. ބުރުގާ އެޅުން މަނާކުރިއަސް އަހަރެންގެ ޒަމީރު އެއްބަހެއް ނުވިއެވެ. އެކިކަހަލަ ވަސްވަހަށް އުނދަގޫވެ ހާސްވެއެވެ. ބައްޔާއެކު، އަހަރެން ކަހަލަ ހުށިޔާރުކަމާއެކު ކެރިގެން އުޅުނު އަންހެނަކަށް. އެންޒައިޓީގެ އުނދަގޫ ވާން ފެށިކަން، އާއިލާއާއި ރައްޓެހިން ގަބޫލުކުރަން ބޭނުންނުވިޔަސް އެކަންވެސް އޮތީ އެހިސާބުގައެވެ. އަހަރެންގެ ކިޔެވުން ހުއްޓުނީއެވެ. ނޭވާ ކުރުވުމުން ދިގުކޮށް ނަގާ، ރާގަށް ގުރުއާން ނުކިޔެވޭނެތީއެވެ. އުނގަންނައިދިނުން ވެސް ހުއްޓުނީއެވެ. ނޭވާލުމަށް އުނދަގޫވާ މީހަކަށް ގިނަ ވަގުތު ކޮޅަށް ހުރެގެން، ނޭވާ ދިގުކޮށް ކިޔާ ރާގަށް ކިޔަވައިދޭން، އަކުރު ކިޔަން ޖެހޭ މަހުރަޖަށް ބުނެދީ ހެދޭނީ ކިހިނެއްހެއްޔެވެ.
އަހަންނަށް ލިބިފައި ހުރި އިލްމަކާއި ހުނަރެއްގެ ސަބަބުން ގޭގައި އިނދެގެން އާމްދަނީ ހޯދޭފަދަ މަސައްކަތްތައް ކުރެވުނު ނަމަވެސް މިއަދު އަހަރެންގެ ހާލަތު މުޅިން ބަދަލުވެއްޖެއެވެ.
ސީއޯޕީޑީ އަކީ ދުލުން އެބަސް ކިޔާލަން ފަސޭހަ ވިޔަސް، އޭގެ ވޭން އުފުލާ މީހަކަށް ބުނެދޭންވެސް ނޭނގޭހާ އުނދަގޫދެނިވި، ހިތްދަތިވާފަދަ ބައްޔެކެވެ. ބޭހާ ނުލާ އެންމެ ދުވަހެއްގެ އެއްވަގުތުވެސް ކޮޅަށް ހުރެވޭކަށް ނޯވެއެވެ. ވައިނުސާފު ތަންތަނުން މީހާގެ ނޭވާ ހާސްވެ، ނޭވާ ނުލެވޭވަރުގެ ތަކުލީފު އުފުލަން ޖެހެއެވެ. މާގިނައިރު އަވީގައި ހުރުމުން އުނދަގޫވެ ނޭވާލާން ދަތިވެއެވެ. ވާރެއިން ތެމިއްޖެނަމަ ވެސް ހަމަ އެހާލެއްގައެވެ. ކޮންމެ ކަމެއް ކުރިއަސް ސަމާލުވާން ޖެހެއެވެ.
މިއަދު އަހަރެންގެ ހުރިހާވެސް އެހީތެރިއަކީ އަހަރެންގެ ލޯބިވާ ފިރިމީގާއެވެ. ސައްވީސްގަޑިއިރު ފޫހިކަމެއް ނެތި އަހަރެން ގޮވައިގެން އުޅޭއިރު، އެއްވެސް ޝަކުވާއެއް އެއްވެސް ނުރުހުމެއް ނެތެވެ. އަހަރެންގެ ބައްޔަށް ފަރުވާ ހޯދުމަށް އެކި ޑޮކްޓަރުންނާ މަޝްވަރާކޮށް މި ބައްޔަށް އޮތް އެންމެ ރަނގަޅު ފަރުވާ ދީގެން އަހަންނަކީ އެހެން މީހުންކަހަލަ އާދައިގެ، ދިރިއުޅުމެއް އުޅޭ މީހަކަށް ހެދޭތޯ އަހަރެންގެ ފިރިމީހާ ކުރަމުންދާ މަސައްކަތް ކާމިޔާބުވެސްމެއެވެ.
ސީއޯޕީޑީ އަކީ ނޭވާލުމަށް އުނދަގޫކުރުވާ ބައްޔަކަށް ވިޔަސް، ވަރިހަމައޭ ބުނާ ވަރަށް އަހަރެންގެ ނަފުސަށް އިތުބާރު ހޯދައިދިނުމުގައި އޭނާ ވަނީ ކާމިޔާބު ހޯދާފައެވެ. އަހަރެންގެ ބައްޔަކީ ދިގުދެމިގެންދާ ދާއިމަށް ބޭސްކާން ޖެހޭ ބައްޔަކަށް ވިޔަސް މިއަދު އަހަންނަކީ އުފާވެރި އިންސާނަކީމެވެ.
އަހަރެންގެ މިހާލާއެކުގައިވެސް ﷲ ތައާލާ އަހަންނަށް ދެއްވީ އޯގާތެރި، ހެޔޮލަފާ ފިރިއެކެވެ. އެފަދަ ފިރިއެއް ކޮންމެ އަންހެނަކަށްވެސް ދެއްވާތޯ އަހަރެން ދުއާ ކުރަމެވެ.
"ލޯބިވާ ފިރިމީހާއަށް، ތިބާ ދެއްވީތީ ﷲއަށް ހަމްދު ނުކުރާ ދުވަހެއް ނުދޭ! ލޯބިވާ ފިރިމީހާއަށް؛ މިބައްޔާއެކު އަހަރެން ބަލައިގަނެ، ގާބިލުމީހަކަށް ހެދީތީ ޝުކުރިއްޔާ!"
(ކްރޯނިކް އޮބްސްޓްރަކްޓިވް ޕަލްމޮނަރީ ޑިޒީޒް (ސީ.އޯ.ޕީ.ޑީ) އަކީ ނޭވާލުމުގެ ނިޒާމަށް ޖެހޭ، ނޭވާލަން އުނދަގޫވާ ގޮތަށް ކުރިއަރަމުންދާ ފުއްޕާމޭގެ ބައްޔެކެވެ. މީގެ އަލާމާތްތަކުގެ ތެރޭގައި ދިގު މުއްދަތަކަށް ދެމިގެންދާ ކެއްސުމާއި، ނޭވާ ކުރުވުމާއި، އަދި ގިނަގިނައިން ނޭވާލާ ނިޒާމަށް ޖެހޭ އިންފެކްޝަންތައް ހިމެނެއެވެ. މި އަލާމާތްތައް ރަނގަޅަށް ބެލެހެއްޓުމެއް ނެތި ވަގުތު ފާއިތުވަމުންދާއިރު އިތުރަށް ގޯސްވެގެންދެއެވެ. މިއަދަކީ ދުނިޔޭގެ ސީއޯޕީޑީ ދުވަހެވެ.)