ޕާޓީ ބަދަލުކުރުމުން ގޮނޑި ގެއްލޭގޮތަށް ގާނޫނު އަސާސީއަށް ގެނެވުނު އިސްލާހާ ގުޅިގެން ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލު ރައީސް ޑރ. މުހައްމަދު މުއިއްޒަށް ތައުރީފު ކުރައްވައިފިއެވެ.
މިއަދު ހަވީރު ރައްޔިތުންގެ މަޖިލީހުން ވަނީ ސަރުކާރުގެ ފަރާތުން ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހެޅުއްވި، ޕާޓީ ބަދަލު ކުރުމާއި ޕާޓީން ވަކިވުން ނުވަތަ ޕާޓީން ވަކިކުރުމުން ގޮނޑި ގެއްލޭ ގޮތަށް ހުށަހެޅުނު އިސްލާހު މަޖިލީހުގެ އަޣުލަބިއްޔަތުން ފާސްކޮށްފައެވެ.
މި އިސްލާހާ ގުޅިގެން އެކްސް (ކުރީގެ ޓްވިޓަރ) ގައި ޝަކީލު ވިދާޅުވެފައިވަނީ “ވޭތުވެދިޔަ ތަނުގައި އައި ހުރިހާ ވެރިންނާއި މަޖިލިސް މެންބަރުން ޕޯޑިއަމްތަކަށް އަރައި އެންޓި ޑިފެކްޝަން ގާނޫނޫގެ މުހިއްމު ކަމުގެ ވާހަކަ ދެއްކި،” ކަމަށެވެ. ނަމަވެސް “ހަގީގީ ސިފައިގައި ގާނޫނު އަސާސީގެ ތެރެއިން މިކަން ކުރުމުގެ އިހްލާސްތެރިކަމާއި ކެރުންތެރިކަން ހުރި ހަމައެކަނި ވެރިއަކީ ރައީސް ޑރ. މުހައްމަދު މުއިއްޒުކަން އެމަނިކުފާނު ސާބިތު ކޮށްދެއްވައިފި،” ކަމަށް ޝަކީލު ފާހަގަ ކުރެއްވިއެވެ.
އިތުރަށް ޝަކީލު ވިދާޅުވެފައި ވަނީ “އަދި މި ދައުރުގެ ޕީއެންސީ މެންބަރުން ތިބީ ރައްޔިތުންގެ ފަޅީގައިކަން ވެސް ސާބިތު ކޮށްދެއްވައިފި. ރައީސް ޑރ.މުއިއްޒުގެ ސަރުކާރަކީ ރައްޔިތުންގެ ސަރުކާރެއް. ޝުކުރިއްޔާ، ރައީސް،” މިފަދައިންނެވެ.
ކުރީގެ އެމްޑީޕީގެ މެޖޯރިޓީ އޮތް މަޖިލީހުންވެސް ގޮނޑި ގެއްލޭގޮތަށް ބިލެއް ފާސްކޮށް، ރައީސް ޑރ. މުހައްމަދު މުއިއްޒު އެ ބިލު ތަސްދީގުކުރެއްވި ނަމަވެސް، އެ ގާނޫނުގައި ބާގަނޑުތަކެއް ހުރިކަމަށާއި ގާނޫނު އަސާސީއާ ތައާރަޒުވާކަމަށް ގާނޫނީ ވަކީލުން ފާހަގަކޮށްފައިވެއެވެ.
މިހާރު އޮންނަ އެންޓި ޑިފެކްޝަން މާއްދާތައް އުވާލުމަށް އެދި އަމިއްލަ ފަރާތަކުން ހައިކޯޓަށް މައްސަލައެއް ހުށަހަޅާފައިވާކަން ވެސް ފާހަގަ ކުރެވެއެވެ.