މޯލްޑިވްސް ޖާނަލިސްޓް އެސޯސޯއޭޝަން (އެމްޖޭއޭގެ) ހިންގުން ހަރުދަނާކޮށް އެންމެހާ ނޫސްވެރިންގެ ބައިވެރިވުން ހިމެނޭ ގޮތަށް އެ ޖަމްއިއްޔާގެ ހަރަކާތްތަކަށް އިތުރުކުރުމުގެ ގޮތުން އިދާރީ މަގާމުތައް އުފެއްދުމަށް މިއަދު އެކްސްކޯއިން ނިންމައިފިއެވެ.
އެމްޖޭއޭއިން އިތުރުކުރާ ހަރަކާތްތައް:
ޕްރޮގްރާމް އޮފިސަރުން: ޖަމްއިއްޔާއިން ހިންގާ އެންމެހާ ހަރަކާތްތަކާއި ތަމްރީންތައް ރާވާ އިންތިޒާމްކުރުމާއި މީޑިއާގެ ހައްގުތަކާ ގުޅޭ ކަންކަން މޮނީޓާ ކުރުމާއި އާންމު މެމްބަރުންނާ ގުޅޭ އެކިއެކި ކަންކަން އަދި އާންމު އިދާރީ މަސައްކަތްތައް ކުރެއެވެ. އަދި ކޮމިޔުނިކޭޝަންސް އެންޑް އައުޓްރީޗް އޮފިސާ: މީޑިއާ ރިލޭޝަންސް އާއި އާންމުން ހޭލުންތެރިކުރުމާއި ވަކި ކަމަކާ ވިދިގެން ހިންގޭ ކެމްޕޭންތައް ބެލެހެއްޓުމާއި އެމްޖޭއޭގެ ވެބްސައިޓާއި ސޯޝަލް މީޑިއާ ގަވައިދުން އަޕްޑޭޓްކޮށް ބެލެހެއްޓުންވެސް ހިމެނެއެވެ.
އެހެންކަމުން އެ މަގާމުތަކުގައި މަސައްކަތް ކުރަން ބޭނުންފުޅުވާ ހުރިހާ ނޫސްވެރިންނަށް އެ ފުރުސަތު ހުޅުވާލާ އަދި އެކަމުގައި ޝައުގުވެރިކަން އޮތްކަން އެންގުމަށްވެސް ބުނެއެވެ.
އަދި އެމްޖޭއޭގެ އެކްސްކޯއިން ނިންމާ ސިޔާސަތުތަކާ އެއްގޮތަށް ޖަމްއިއްޔާގެ ސެކްރެޓޭރިއަޓް ދުވަހުން ދުވަހަށް ހިންގުމުގެ އެންމެހާ ޒިންމާތައް އަދާކުރާނޭ އެކްޒެކެޓިވް ޑައިރެކްޓަރުގެ ގޮތުގައި މުހައްމަދު ޖުނައިދު ސަލީމް ވަނީ ރަސްމީކޮށް ހަމަޖައްސާފައި ކަމަށް ވެސް އެމްޖޭއޭއިން ބުނެއެވެ.