މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އަންހެނުންނަށް ހާއްސަކޮށްގެން ކުރިއަށް ގެންދާ އެޕްރެންޓިސް ޕްރޮގްރާމްގައި ބައިވެރިވުމުގެ ފުރުސަތު ހުޅުވާލައިފިއެވެ. މި ޕްރޮގްރާމަކީ އެކި ދާއިރާތަކުގައި އަންހެނުންގެ ބައިވެރިވުން އިތުރުކޮށް، މީހުން ބިނާކުރުމުގެ ގޮތުން ކުރިއަށް ގެންދާ ޕްރޮގްރާމެއްކަމަށް އެމްޕީއެލްއިން މަޢުލޫމާތު ދީފައިވެއެވެ.
މިނިސްޓްރީ އޮފް ޔޫތު އެމްޕަވަމަންޓް، އިންފޮމޭޝަން އެންޑް އާރޓްސްއާ ގުޅިގެން ކުރިއަށް ގެންދާ މި ޕްރޮގްރާމްގައި ހަތް ދާއިރާއަކުން ޖުމްލަ 18 އަންހެނަކަށް ފުރުސަތު ދޭނެ ކަމަށް އެމްޕީއެލްއިން ހާމަކޮށްފައިވެއެވެ. މި ދާއިރާތަކުގެ ތެރޭގައި ވެލްޑިން، ކާޕެންޓްރީ، މެޝިނިސްޓް، މެރިން މެކޭނިކް، އިލެކްޓްރިޝަން، މެކޭނިކް އަދި އެއަރ ކޮންޑިޝަނިން އެންޑް ރެފްރިޖަރޭޝަން ހިމެނެއެވެ.
ހަ މަސް ދުވަހުގެ މުއްދަތަށް ކުރިއަށް ގެންދާ މި ޕްރޮގްރާމްގެ ބައިވެރިންނަށް ކޮންމެ މަހަކު 5,000 ރުފިޔާގެ އެލަވަންސެއް ލިބޭނެ ކަމަށްވެސް އެމްޕީއެލްއިން ބުނެފައިވެއެވެ. މި ޕްރޮގްރާމްގައި ބައިވެރިވުމަށް ޝައުގުވެރިވާ ފަރާތްތަކަށް މި މަހުގެ 24 ވަނަ ދުވަހާ ހަމައަށް އެ ފުރުސަތު ހުޅުވާލާފައިވާ ކަމަށް އެމްޕީއެލްއިން މަޢުލޫމާތު ދީފައިވެއެވެ.
އެމްޕީއެލްއިން ކުރިންވެސް ވަނީ މިފަދަ އެޕްރެންޓިސް ޕްރޮގްރާމްތައް ހިންގާފައެވެ. އަދި މި ޕްރޮގްރާމްތަކުގައި ބައިވެރިވި ބައެއް ފަރާތްތަކަށް ކުންފުނިން ދާއިމީ ވަޒީފާވެސް ލިބިފައިވާކަން ފާހަގަކުރެވެއެވެ.