ނިލަންދޫ ކައުންސިލުން އިންތިޒާމްކޮށްގެން ބާއްވާ " ރާވެރިޔާ ވޮލީ މުބާރާތް 2024 " ފިރިހެން ޑިވިޝަންގެ ދެވަނަ މެޗުގައި ގއ ކޮނޑޭ ވޮލީބޯލް ކުލަބު އަދި ޓޮޕް ބްރަދާސް ވާދަ ކުރި މެޗް ޓޮޕް ބްރަދާސްއިން ކާމިޔާބުކޮށްފިއެވެ
ފޯރިގަދަ ކުޅުމެއް ފެނިގެން ދިޔަ މި މެޗު ޓޮޕް ބްރަދާސްއިން ކާމިޔާބު ކުރީ 3 ސެޓު 1 ސެޓުންނެވެ. ސެޓުތައް ގެންގޮސްފައިވަނީ 25/21، 20/25، 25/22، އަދި 25/16 އިންނެވެ.
މެޗު ފަށައިގެން ކޮނޑޭ ޓީމް ރަނގަޅަށް މެޗުތެރެއަށް ނުވަދެވެނީސް ޓޮޕް ބްރަދާސް އިން މެޗުގެ ފުރަތަމަ ސެޓު ގެންދިޔައެވެ. އެހެންނަމަވެސް ދެވަނަ ސެޓުގައި ކުޅުން ރަނގަޅުކޮށް ވާދަވެރި ކުޅުމަކަށްފަހު ދެވަނަ ސެޓު ކޮނޑޭ އިން ކާމިޔާބުކުރިއެވެ. 3 ވަނަ ސެޓުގައި ދެޓީމްގެ ފަރާތުން ވާދަވެރި ކުޅުމެއް ފެނިގެން ދިޔަ އިރު ސެޓް ގެންދިޔައީ ޓޮޕް ބްރަދާސް އިންނެވެ. ހަތަރުވަނަ ސެޓު ފަސޭހަ ކަމާއި އެކު ޓޮޕް ބްރަދާސް އިން ކާމިޔާބުކޮށް 3 ސެޓު 1 ސެޓުން މެޗު ކާމިޔާބު ކުރިއެވެ.
މެޗުގެ މޮޅު ކުޅުންތެރިޔަކަށް ހޮވިފައިވަނީ މި މެޗުގައި މޮޅު ކުޅުމެއްދެއްކި ޓޮޕް ބްރަދާސްގެ ޖާޒީ ނަންބަރު 5 އިބްރާހިމް ފަޒީލްއެވެ.
މުބާރާތުގައި މާދަމާ ވެސް 2 މެޗު ކުޅުމަށް ހަމަޖެހިފައިވެއެވެ. ފުރަތަމަ މެޗުގައި ވާދަކުރަނީ އަންހެން ޑިވިޝަން އެންމެ ފަހުގެ ޗެމްޕިއަން ކަނޑުހުޅުދޫ އަދި ރަނަރަޕް ގެމަނަފުށި ވޮލީޓީމެވެ. މިމެޗު ފެށުމަށް ހަމަޖެހިފައިވަނީ ހަވީރު 16:15 ގައެވެ.
މާދަމާ ރޭ ފިރިހެން ޑިވިޝަންގެ ގއ ކަނޑުހުޅުދޫ ވޮލީޓީމް ވާދަކުރާނީ ގއ ދާންދޫ ސްޕޯޓްސް ކުލަބާއިއެވެ. މި މެޗު ފެށުމަށް ހަމަޖެހިފައިވަނީ 20:15 ގައެވެ.
2022 މި މުބާރާތުގައި ޖުމްލަ 11 ޓީމް ބައިވެރިވިއެވެ. އެއީ ފިރިހެން 4 ޓީމްގެ އިތުރުން އަންހެން 7 ޓީމެވެ. 2023 ވަނަ އަހަރު މުބާރާތުގައި 13 ޓީމްއަކުން ބައިވެރިވި އިރު އަންހެން 6 ޓީމް އަދި ފިރިހެން 7 ޓީމް ބައިވެރިވެފައިވެއެވެ. މިދިޔަ އަހަރުގެ އަންހެން ޑިވިޝަންގެ ޗެމްޕިއަނުންނަކީ ކަނޑުހުޅުދޫ އަންހެން ވޮލީބޯލަ ޓީމެވެ. ފިރިހެން ޗެމްޕިއަނުންނަކީ ބޮން ބޮން ސްޕޯޓްސް ކުލަބެވެ.
2022 ވަނަ އަހަރު މިމުބާރާތުގެ ފިރިހެން ޑިވިޝަން ޗެމްޕިއަންކަން ބޮން ބޮން ސްޕޯޓްސް ކުލަބު ހޯދިއިރު އަންހެން ޑިވިޝަން ޗެމްޕިއަން ޓީމަކީ ގެމަނަފުށި ވޮލީބޯލަ ޓީމެވެ.
މިމުބާރާތް ކުރިޔަށް ގެންދިޔުމަށް ހަމަޖެހިފައިވަނީ އަންހެން އަދި ފިރިހެން ދެ ޑިވިޝަނަށް ބަހާލައިގެންނެވެ. އަދި ކޮންމެ ޑިވިޝަނެއްގެ ޗެމްޕިއަން ޓީމަށް 20,000/- (ވިހިހާސް) ރުފިޔާގެ އަދި ކޮންމެ ޑިވިޝަނެއްގެ ރަނަރަޕް ޓީމަށް 10,000 (ދިހަހާސް) ރުފިޔާގެ ފައިސާގެ އިނާމް ދިނުމަށްވަނީ ހަމަޖެހިފައެވެ.