ހުޅުމާލޭގެ ދެވަނަ ފިޔަވަހީގައި ތަރައްގީ ކުރަމުންދާ 4000 ފުލެޓު ހިމެނޭ 32 ޓަވަރުގެ ކޮމަރޝަލް ޔުނިޓުތައް ކުއްޔަށް ދޫކުރުމަށް ވަރަށް އަވަހަށް އިއުލާނު ކުރާނެ ކަމަށް ފަހި ދިރިއުޅުން ކޯޕަރޭޝަން (އެފްޑީސީ) އިން ހާމަކޮށްފިއެވެ.
މީޑިއާތަކަށް މައުލޫމާތު ދެމުން އެފްޑީސީން ބުނީ، މި 32 ޓަވަރުގެ ކޮމަރޝަލް ޔުނިޓުތައް ހުންނާނީ ކޮންމެ ޓަވަރެއްގެވެސް އެންމެ ތިރީ ބައިގައާއި ފުރަތަމަ ފަންގިފިލާގައި ކަމަށެވެ. މި ޔުނިޓުތަކަކީ ވިޔަފާރި ކުރުމަށާއި އެހެނިހެން ބޭނުންތަކަށް ހާއްސަ ކޮށްފައިވާ ޖާގަތަކެކެވެ.
އެފްޑީސީން އިތުރަށް ހާމަކުރި ގޮތުގައި، ފުރަތަމަ ކުއްޔަށް ދޫކުރަން ހުޅުވާލާނީ ޒޯން 1 ގައި ހިމެނޭ ޓަވަރުތަކުގެ ކޮމަރޝަލް ޔުނިޓުތަކެވެ. މި ކަމަށް އަންނަ ހަފްތާގައި އިއުލާނު ކުރެވޭނެ ކަމަށާއި، އެހެން ޒޯން ތަކަށްވެސް ވަރަށް އަވަހަށް ހުޅުވާލެވޭނެ ކަމަށް އެ ކުންފުނިން ބުނެފައިވެއެވެ.
ކޮމަރޝަލް ޖާގަތައް އެކި ބޭނުންތަކަށް ޚާއްޞަކޮށްފައި ހުންނާނެ ކަމަށް އެފްޑީސީން ބުނެފައިވެއެވެ. މިގޮތުން، ކޮންމެ ޓަވަރަކުން 5 މިނެޓުގެ ހިނގާ ދުރުމިނުގައި ތަފާތު ބާވަތްތަކުގެ ކާބޯތަކެތި ވިއްކާ ފިހާރަތަކާއި މާޓުތައް ހުންނާނެއެވެ. އަދި 10 މިނެޓުގެ ދުރުމިނުގައި ޞިއްޙީ ޚިދުމަތްދޭ މަރުކަޒުތަކާއި، 20 މިނެޓުގެ ދުރުމިނުގައި ޒުވާނުންގެ ސެންޓަރުތަކާއި އޮފީސް ޖާގަތައް ހުންނާނެ ކަމަށްވެސް ކަމަށްވެސް ބުނެފައިވެއެވެ. މީގެ އިތުރުން ކެފޭތަކާއި ރެސްޓޯރަންޓުތަކަށް ހާއްސަ ކޮށްފައިވާ ޖާގަތައްވެސް ހުންނާނެއެވެ.
އެފްޑީސީގެ އަމާޒަކީ ފްލެޓުތަކުގައި މީހުން ދިރިއުޅެން ފެށުމުގެ ކުރިން ޒަރޫރީ ބޭނުންތަކަށް ގަންނަންޖެހޭ ތަކެތި ލިބޭނެ ފިހާރަތައް ޓަވަރުތަކުގައި ޤާއިމްކުރުން ކަމަށް އެ ކުންފުނިން ބުނެފައިވެއެވެ. އަދި އެފްޑީސީން ތަރައްގީ ކުރަމުންދާ 4000 ފްލެޓުގެ މަސައްކަތް އަވަހަށް ނިންމުމަށް ތާވަލު މުރާޖައާ ކުރަމުން އަންނަ ކަމަށްވެސް ހާމަކޮށްފައިވެއެވެ.