ޕޯސްޓުން އަންނަ ޕެކޭޖްތައް ހަވާލުވުމުގެ ކަންތައް އޮންނަ ގޮތުން އެ ކަންކަން އިންތިޒާމުވެފައިވަނީ މަސްތުވާތަކެތި އެތެރެކުރުމުގެ ކުށްކުރާ މީހުންނަށް އޭގެ ނާޖާއިޒު ފައިދާ ނެގޭނެ ފަދައަކުން ކަމަށް ކްރިމިނަލް ކޯޓުން ބުނެފިއެވެ.
ކްރިިމިނަލް ކޯޓުން މިހެން ބުނީ މަސްތުވާތަކެތި ބޭނުންކުރުމާއި، ގެންގުޅުމާއި، ޓްރެފިކްކުރުމުގެ ތުހުމަތުގައި ހައްޔަރުކޮށްފައިވާ މީހެއްގެ ބަންދާމެދު ގޮތެއް ނިންމުމަށް އިއްޔެ ބޭއްވި މަޖިލީހުގައެވެ.
މި މައްސަލާގައި ހައްޔަރުކޮށްފައިވާ 41 އަހަރުގެ ދިވެހި ފިރިހެން މީހާ 15 ދުވަހަށް ބަންދުކުރަން އަމުރުކޮށް، ކޯޓުން ނެރުނު އަމުރުގައި ބުނެފައިވަނީ ޕޯސްޓް އޮފީހަށް އޭނާ ބަލައިދިޔަ ޕެކޭޖްގެ ތެރެއިން 980.8 ގްރާމް މަސްތުވާތަކެތި ފެނިފައިވާ ކަމަށެވެ.
އޭނާ ބުނީ ޕޯސްޓުން އައި އެއްޗެއް ބަލައި ދިއުމަށް އޭނާ ކައިރީ ބުނި މީހާ ގުޅިކަން އޭނާގެ ފޯނުން އެނގޭނެ ކަމަށާއި، ޕޯސްޓުގައި ހުރެ ވެސް އެ މީހާއަށް ގުޅި ކަމަށެވެ. ގުޅުމުން އޭނާ އެދިފައިވަނީ އޭނާ ދިރިއުޅޭ ގޭގެ ގްރައުންޑް ފްލޯއަށް ޕެކޭޖެއް ގެނައުމަށް ކަމަށެވެ.
ކޯޓު އަމުރުގައިވާ ގޮތުން، ގްރައުންޑް ފްލޯއަށް ޕެކޭޖެއް ގެނައުމަށް އެދުނު މީހާއާބެހޭ މައުލޫމާތު އެންމެ ރަނގަޅަކަށް ފުލުހުން ހޯދާފައެއް ނުވެއެވެ.
ގާޒީ ޞަފްޢަތު ޙަބީބު ނެރުއްވި އަމުރުގައި އިތުރަށް ބުނެފައިވަނީ ޕޯސްޓުން އަންނަ ޕެކޭޖްތައް ހަވާލުވުމުގެ ކަންތައް އޮންނަ ގޮތުން އެ ކަންކަން އިންތިޒާމުވެފައިވަނީ މަސްތުވާތަކެތި އެތެރެކުރުމުގެ ކުށްކުރާ މީހުންނަށް އޭގެ ނާޖާއިޒު ފައިދާ ނެގޭނެ ފަދައަކުން ކަމަށާއި، ކަމާގުޅުންހުރި މުއައްސާސަތަކުން ސަމާލުވާންޖެހޭ ކަމަށެވެ.