ގއ ނިލަންދޫ ކައުންސިލުން އިންތިޒާމްކޮށްގެން ބާއްވާ " ރާވެރިޔާ ވޮލީ މުބާރާތް 2024 " އަންހެން ޑިވިޝަންގެ ތިންވަނަ މެޗުގައި ގއ ކަނޑުހުޅުދޫ ވޮލީ ބޯޅް ޓީމް އަދި ގއ ގެމަނަފުށި ވޮލީބޯލް ކުލަބު ވާދަކުރި މެޗު ގެމަނަފުށި އަންހެން ވޮލީބޯޅަ ޓީމް ކާމިޔާބު ކޮށްފިއެވެ.
މި މެޗުން ގެމަނަފުށި މޮޅުވުމުން މުބާރާތުގައި ކުޅުނު ދެ މެޗު ވެސް ކާމިޔާބުކޮށް ސެމީ ޖާގަ ކަށަވަރުކުރި ފުރަތަމަ ޓީމަކީ ގެމަނަފުށީ ވޮލީބޯޅަ ޓީމެވެ.
މި ދެޓީމަކީ މިދިޔަ އަހަރު މުބާރާތުގެ ފައިނަލްގައި ވާދަކުރި ދެ ޓީމެވެ. އެފަހަރުގެ މުބާރާތް ކާމިޔާބުކުރީ ކަނޑުހުޅުދޫ ވޮލީ ޓީމެވެ.
ވަރަށް ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ ސެޓު 27/25 އިން ގެންދިޔައީ ގެމަނަފުށި ވޮލީ ބޯލްކުލަބެވެ.
މެޗުގެ ދެވަނަ ސެޓުގައި ކަނޑުހުޅުދޫ ޓީމުން މާއެދެވޭ ކުޅުމެއް ނުދެއްކުނު އިރު ގެމަނަފުށި ޓީމް ފެނިގެން ދިޔައީ ތަފާތު މޮޅުކޮށެވެ. ދެވަނަ ސެޓު ގެމަނަފުށިން ގެންދިޔައީ 25/15 އިންނެވެ.
މެޗުގެ ތިންވަނަ ސެޓުގައި ކަނޑުހުޅުދޫ ޓީމްގެ ކުޅުންވަރަށް ރަނގަޅުކޮށް ރަނގަޅު އެޓޭކްތަކާއި އެކު 25/22 އިން ސެޓު ގެންދިޔައެވެ.
މެޗުގެ ހަތަރު ވަނަ ސެޓު ގެމަނަފުށީ ޓީމް ކުޅެމުންދިޔައީ ވަރަށް އިތުބާރާއިއެކުއެވެ. ރަނގަޅު އެޓޭކްތަކާއި އެކު ހަތަރު ވަނަ ސެޓު 25/13 އިން ކާމިޔާބު ކޮށް 3/1 ސެޓުން މެޗު ކާމިޔާބު ކުރިއެވެ.
މެޗުގެ މޮޅު ކުޅުންތެރިޔަކަށް ހޮވިފައިވަނީ މި މެޗުގައި މޮޅު ކުޅުމެއްދެއްކި ގެމަނަފުށި ވޮލީޓބޯލް ކުލަބުގެ ޖާޒީ ނަންބަރު 3 ފާތުމަތު މަޒިއްޔާއެވެ. މަޒިއްޔާ ވަނީ މި މެޗުގައި މޮޅު ކުޅުމެއް ދައްކާފައެވެ
މުބާރާތުގައި މިރޭ ފިރިހެން ޑިވިޝަންގެ ގއ ކަނޑުހުޅުދޫ ވޮލީޓީމް ވާދަކުރާނީ ގއ ދާންދޫ ސްޕޯޓްސް ކުލަބާއިއެވެ. މި މެޗު ފެށުމަށް ހަމަޖެހިފައިވަނީ 20:15 ގައެވެ.
2022 މި މުބާރާތުގައި ޖުމްލަ 11 ޓީމް ބައިވެރިވިއެވެ. އެއީ ފިރިހެން 4 ޓީމްގެ އިތުރުން އަންހެން 7 ޓީމެވެ. 2023 ވަނަ އަހަރު މުބާރާތުގައި 13 ޓީމްއަކުން ބައިވެރިވި އިރު އަންހެން 6 ޓީމް އަދި ފިރިހެން 7 ޓީމް ބައިވެރިވެފައިވެއެވެ. މިދިޔަ އަހަރުގެ އަންހެން ޑިވިޝަންގެ ޗެމްޕިއަނުންނަކީ ކަނޑުހުޅުދޫ އަންހެން ވޮލީބޯލަ ޓީމެވެ. ފިރިހެން ޗެމްޕިއަނުންނަކީ ބޮން ބޮން ސްޕޯޓްސް ކުލަބެވެ.
2022 ވަނަ އަހަރު މިމުބާރާތުގެ ފިރިހެން ޑިވިޝަން ޗެމްޕިއަންކަން ބޮން ބޮން ސްޕޯޓްސް ކުލަބު ހޯދިއިރު އަންހެން ޑިވިޝަން ޗެމްޕިއަން ޓީމަކީ ގެމަނަފުށި ވޮލީބޯލަ ޓީމެވެ.
މިމުބާރާތް ކުރިޔަށް ގެންދިޔުމަށް ހަމަޖެހިފައިވަނީ އަންހެން އަދި ފިރިހެން ދެ ޑިވިޝަނަށް ބަހާލައިގެންނެވެ. އަދި ކޮންމެ ޑިވިޝަނެއްގެ ޗެމްޕިއަން ޓީމަށް 20,000/- (ވިހިހާސް) ރުފިޔާގެ އަދި ކޮންމެ ޑިވިޝަނެއްގެ ރަނަރަޕް ޓީމަށް 10,000 (ދިހަހާސް) ރުފިޔާގެ ފައިސާގެ އިނާމް ދިނުމަށްވަނީ ހަމަޖެހިފައެވެ.