ކުޑަކުއްޖަކަށް ޖިންސީ ގޯނާކުރި މީހަކު ޖަލުން ދޫކޮށްލިކަމަށް ބުނެ ދެކެވޭ ވާހަކައަކީ ތެދެއްނޫންކަމަށް މޯލްޑިވްސް ކަރެކްޝަނަލް ސަރވިސްއިން މިއަދު ހާމަކޮށްފިއެވެ. އަދި ރައީސް އޮފީހުގެ ސްޕޯކްސްޕާސަން ހީނާ ވަލީދު ވެސް ވަނީ، އެކްސްގައި ކުރެއްވި ޕޯސްޓެއްގައި(ކަރެކްޝަނުގެ ބަޔާނާއެކު)، ބައެއް ސޯޝަލްމީޑިއާ ތަކުގައި ފެތުރެމުންދާ އެކިކަހަލަ ވާހަކަތައް ދޮގުކުރައްވާފައެވެ.
ކަރެކްޝަނުން މިރޭ ނެރުނު ނޫސްބަޔާނެއްގައި ބުނެފައިވަނީ، ހއ. ހޯރަފުށީ، އަންދަލީބުގެ، ހާޝިމް އަބޫބަކުރު (57 އަހަރު) ގޭ ބަންދަށް ބަދަލުކޮށްފައިވަނީ ޑޮކްޓަރުގެ ލަފާގެ މަތިން ބޭސްފަރުވާއަށް ކަމަށެވެ. ހާޝިމަކީ ފިރިހެން ކުއްޖަކާ ބެހިގެން 12 އަހަރަށްވުރެ ދިގު މުއްދަތަކަށް ޖަލަށްލުމަށް ހުކުމްކޮށްފައިވާ މީހެކެވެ.
ކަރެކްޝަނުން ބުނެފައިވާ ގޮތުގައި ހާޝިމަކީ އުނަގަނޑުގެ މައްސަލައެއް ހުރެ، އެކަމުގެ ވޭން ތަހައްމަލްކުރަމުންދާ މީހެކެވެ. އަދި މިދިޔަ ސެޕްޓެންބަރު މަހު އޭނާ ރާއްޖޭން ބޭރުން ބޭސްފަރުވާ ހޯދާފައިވާ ކަމަށްވެސް ކަރެކްޝަނުން ބުނެފައިވެއެވެ.
“ހާޝިމް އަބޫބަކުރުގެ ބަލި ހާލަތު ހުރި ގޮތުން، ޑޮކްޓަރު ދެއްވާފައިވާ ރެކަމެންޑޭޝަންއާ އެއްގޮތަށް ޖަލުގައި ބަހައްޓައިގެން ފަރުވާ ނުދެވޭނެތީ، އޭނާ ވަނީ ހުކުމް ތަންފީޒުކުރުމަށް ވަގުތީ ގޮތުން ގޭބަންދުގައި ބެހެއްޓިފައެވެ،” ކަރެކްޝަނުން ނެރުނު ނޫސްބަޔާނުގައި ބުނެފައިވެއެވެ.
ހާޝިމް ޖަލު ހުކުމް ތަންފީޒު ކުރަން ފަށާފައިވަނީ 2022 ވަނަ އަހަރުގެ ނޮވެންބަރުން ފެށިގެންނެވެ. އޭނާ ގޭ ބަންދަށް ބަދަލު ކުރުމާ ގުޅިގެން، ގިނަ ބަޔަކު ސޯޝަލް މީޑިއާގައި ކަންބޮޑުވުން ފާޅުކުރަމުން ދިޔައެވެ.
ކަރެކްޝަނުން އިތުރަށް ބުނެފައިވަނީ އޮންނަ އުސޫލާ އެއްގޮތަށް ހާޝިމް މޮނިޓަރކޮށް ބަލަހައްޓަމުންދާ ކަމަށެވެ.