ގއ ނިލަންދޫ ކައުންސިލުން އިންތިޒާމްކޮށްގެން ބާއްވާ " ރާވެރިޔާ ވޮލީ މުބާރާތް 2024 " އަންހެން ޑިވިޝަންގެ ހަތަރު ވަނަ މެޗުގައި ކޮނޑޭ ވޮލީ ކުލަބު އަދި މާމެންދޫ އަންހެން ވޮލީ ޓީމް ވާދަކުރި މެޗް ގއ ކޮނޑޭ ވޮލީ ކުލަބުން ކާމިޔާބުކޮށްފިއެވެ.
ގއ ނިލަންދޫ ރަސްމީ ވޮލީކޯޓުގައި ކުރިއަށްދިޔަ މި މެޗު ކޮނޑޭ ވޮލީ ކުލަބުން ކާމިޔާބު ކުރީ 3/1 ސެޓުންނެވެ.
މެޗުގެ ފުރަތަމަ ސެޓުން ފެށިގެން ކޮނޑޭ ވޮލީ ކުލަބު ދިޔައީ މޮޅަށް ކުޅެމުންނެވެ. މިގޮތުން ރަނގަޅު ނިންމުންތަކާއި އެކު ފުރަތަމަ ސެޓު 25/18 އިން ކާމިޔާބު ކުރިއެވެ. އެހެން ނަމަވެސް ދެވަނަ ސެޓުގައި މާމެންދޫގެ ކުޅުން ރަނގަޅުކޮށް މި ސެޓް އެޓީމުން ގެންދިޔައެވެ. ދެވަނަ ސެޓު މާމެންދޫ ޓީމްއިން ގެންދިޔައީ 25/12 އިންނެވެ. މެޗުގެ ތިން ވަނަ ސެޓު ފެނިގެން ދިޔައީ ދެޓީމްގެ ފަރާތުންވެސް ހަމަހަމަ ފޯރިގަދަ ކުޅުމެކެވެ. މިސެޓު ކޮނޑޭ ވޮލީ ކުލަބުން ކާމިޔާބު ކުރީ 25/23 އިންނެވެ. މެޗުގެ ހަތަރު ވަނަ ސެޓު ކޮނޑޭ ޓީމްގެ ފަރާތުން މުހިންމު ދަނޑިވަޅުގައި ރަނގަޅު ނިންމުންތަކެއް ނިންމާފައިވާ ކަން ފާހަގަ ކުރަމެވެ. މި ސެޓު 25/12 އިން ކާމިޔާބުކޮށް މި މެޗު ކޮނޑޭ ވޮލީ ކުލަބުން ކާމިޔާބު ކުރިއެވެ.
މި މެޗުގެ މޮޅު ކުޅުންތެރިޔަކަށް ހޮވިފައިވަނީ ކޮނޑޭ ވޮލީ ކުލަބުގެ ޖާޒީ ނަންބަރު 19 ހައްވާ ސައުޝަން އެވވެ.
މުބާރާތުގައި މިރޭ ފިރިހެން ޑިވިޝަންގެ މެޗެއް ކުޅެން ހަމަޖެހިފައިވެއެވެ. ގއ ނިލަންދޫ ބޮން ބޮން ސްޕޯޓްސް ކުލަބު އަދި ގެމަނަފުށީ ވޮލީބޯލް ކުލަބު ވާދަކުރާނެއެވެ. މި މެޗު ފެށުމަށް ހަމަޖެހިފައިވަނީ 20:15 ގައެވެ.
މި މުބާރާތުގައި ޖުމްލަ 11 ޓީމް ބައިވެރިވިއެވެ. އެއީ ފިރިހެން 4 ޓީމްގެ އިތުރުން އަންހެން 7 ޓީމެވެ. 2023 ވަނަ އަހަރު މުބާރާތުގައި 13 ޓީމްއަކުން ބައިވެރިވި އިރު އަންހެން 6 ޓީމް އަދި ފިރިހެން 7 ޓީމް ބައިވެރިވެފައިވެއެވެ. މިދިޔަ އަހަރުގެ އަންހެން ޑިވިޝަންގެ ޗެމްޕިއަނުންނަކީ ކަނޑުހުޅުދޫ އަންހެން ވޮލީބޯލަ ޓީމެވެ. ފިރިހެން ޗެމްޕިއަނުންނަކީ ބޮން ބޮން ސްޕޯޓްސް ކުލަބެވެ.
2022 ވަނަ އަހަރު މިމުބާރާތުގެ ފިރިހެން ޑިވިޝަން ޗެމްޕިއަންކަން ބޮން ބޮން ސްޕޯޓްސް ކުލަބު ހޯދިއިރު އަންހެން ޑިވިޝަން ޗެމްޕިއަން ޓީމަކީ ގެމަނަފުށި ވޮލީބޯލަ ޓީމެވެ.
މިމުބާރާތް ކުރިޔަށް ގެންދިޔުމަށް ހަމަޖެހިފައިވަނީ އަންހެން އަދި ފިރިހެން ދެ ޑިވިޝަނަށް ބަހާލައިގެންނެވެ. އަދި ކޮންމެ ޑިވިޝަނެއްގެ ޗެމްޕިއަން ޓީމަށް 20,000/- (ވިހިހާސް) ރުފިޔާގެ އަދި ކޮންމެ ޑިވިޝަނެއްގެ ރަނަރަޕް ޓީމަށް 10,000 (ދިހަހާސް) ރުފިޔާގެ ފައިސާގެ އިނާމް ދިނުމަށްވަނީ ހަމަޖެހިފައެވެ.