ގއ ނިލަންދޫ ކައުންސިލުން އިންތިޒާމްކޮށްގެން ބާއްވަމުން އަންނަ " ރާވެރިޔާ ވޮލީ މުބާރާތުގައި ގއ ގެމަނަފުށި ވޮލީބޯލް ކުލަބު އަދި ގއ ނިލަންދޫ ބޮން ބޮން ސްޕޯޓްސް ކުލަބު ވާދަކުރި މެޗު ފަސޭހަ ކަމާއިއެކު ބޮންބޮން ސްޕޯޓްސް ކުލަބުން ކާމިޔާބުކޮށްފިއެވެ.
ނިލަންދޫ ރަސްމީ ވޮލީކޯޓުގައި ކުރިއަށްދިޔަ މިމެޗު ބޮންބޮން އިން ކާމިޔާބު ކުރީ ސީދާ 3 ސެޓުންނެވެ.
މިރޭގެ މެޗުގައި ބޮންބޮން ސްޕޯޓްސް ކުލަބް އިން ކުޅެމުންދިޔައީ ވަރަށްވެސް އިތުބާރާއި އެކުއެވެ. މެޗުގެ ފުރަތަމަ ސެޓު 17/25 ، 27/25 އަދި ތިން ވަނަސެޓު 14/25 އިންނެވެ.
މިމެޗުގެ މޮޅުކުޅުންތެރިޔަކަށް ހޮވުނީ ބޮންބޮން ސްޕޯޓްސް ކުލަބުގެ ޖާޒީ ނަންބަރު 12 މުހައްމަދު ރިމާޒުއެވެ. ރިމޭގެ ފަރާތުން މިމެޗުގައި ބާރު ޝޮޓުތަކެއް ފެނިގެން ގޮސްފައިވެއެވެ.
މިމުބާރާތުގައި މާދަމާވެސް ދެ މެޗެއް ކުޅުމަށް ހަމަޖެހިފައިވެއެވެ. އަންހެން ޑިވިޝަންގައި މާދަމާ ހަވީރު 16:15 ގައި އެންމެ ފަހުގެ ޗެމްޕިއަން ކަނޑުހުޅުދޫ އަދި ނިލަންދޫ ބޮންބޮން ސްޕޯޓްސް ކުލަބު ވާދަކުރާނެއެވެ. މި މެޗުން މޮޅުވާ ޓީމަކަށް މި ގުރޫޕުގެ ސެމީފައިނަލް ގެ ދެވަނަ ޖާގައެއް ކަށަވަރު ވާނެއެވެ. މާދަމާ ރޭ ފިރިހެން ޑިވިޝަންގައި ކެޕިޓަލް ސިޓީއާއި ދާންދޫ ސްޕޯޓްސް ކުލަބު ވާދަކުރާނެއެވެ. މި މެޗު ފެށުމަށް ހަމަޖެހިފައިވަނީ މާދަމާ ރޭ 20:15 ގައެވެ.
މުބާރާތުގައި ޖުމްލަ 11 ޓީމް ބައިވެރިވިއެވެ. އެއީ ފިރިހެން 4 ޓީމްގެ އިތުރުން އަންހެން 7 ޓީމެވެ. 2023 ވަނަ އަހަރު މުބާރާތުގައި 13 ޓީމްއަކުން ބައިވެރިވި އިރު އަންހެން 6 ޓީމް އަދި ފިރިހެން 7 ޓީމް ބައިވެރިވެފައިވެއެވެ. މިދިޔަ އަހަރުގެ އަންހެން ޑިވިޝަންގެ ޗެމްޕިއަނުންނަކީ ކަނޑުހުޅުދޫ އަންހެން ވޮލީބޯލަ ޓީމެވެ. ފިރިހެން ޗެމްޕިއަނުންނަކީ ބޮން ބޮން ސްޕޯޓްސް ކުލަބެވެ.
2022 ވަނަ އަހަރު މިމުބާރާތުގެ ފިރިހެން ޑިވިޝަން ޗެމްޕިއަންކަން ބޮން ބޮން ސްޕޯޓްސް ކުލަބު ހޯދިއިރު އަންހެން ޑިވިޝަން ޗެމްޕިއަން ޓީމަކީ ގެމަނަފުށި ވޮލީބޯލަ ޓީމެވެ.
މިމުބާރާތް ކުރިޔަށް ގެންދިޔުމަށް ހަމަޖެހިފައިވަނީ އަންހެން އަދި ފިރިހެން ދެ ޑިވިޝަނަށް ބަހާލައިގެންނެވެ. އަދި ކޮންމެ ޑިވިޝަނެއްގެ ޗެމްޕިއަން ޓީމަށް 20,000/- (ވިހިހާސް) ރުފިޔާގެ އަދި ކޮންމެ ޑިވިޝަނެއްގެ ރަނަރަޕް ޓީމަށް 10,000 (ދިހަހާސް) ރުފިޔާގެ ފައިސާގެ އިނާމް ދިނުމަށްވަނީ ހަމަޖެހިފައެވެ.