އިންޑިއާއިން ރާއްޖެއަށް ފޮނުވާ ކާޑުގެ ބާވަތްތައް ބޭރުކުރުމުގައި (އިންޑިއާއިން ރާއްޖެއަށް) ދީފައިވާ ކޯޓާގައި އުސޫލުން ބޭރުން ލަންކާއަށް ހަކުރު އެތެރެކުރާ މައްސަލައެއް ފެންމަތިވެ، އިންޑިއާގެ ކަމާބެހޭ އިދާރާއިން އެކަން ބަލަމުންދިޔަ ނަމަވެސް ދިވެހި ރައްޔިތުންނަށް ހަކުރު ލިބުމުގައި ދައްޗެއް ކުރިމަތި ނުވާނޭ ކަމަށް އެސްޓީއޯއިން ވިދާޅުވެއްޖެއެވެ.
އެސްޓީއޯއިން މިހެން ބުނީ މި މައްސަލަ ބަލައި ނިމެންދެން ވަގުތީގޮތުން ހަކުރު އެކްސްޕޯޓްކުރުން އިންޑިއާއިން މަޑުޖައްސާލާފައިވާކަމަށް ބުނެ ހަބަރު ފަތުރަމުންދާ ދަނޑިވަޅެއްގައެވެ.
ރާއްޖެއަށް އެކްސްޕޯޓްކުރުމަށް ކަނޑައަޅާފައިވާ 64,494 ޓަނު ހަކުރުގެ ތެރެއިން ބައެއް ލަންކާއަށް ޑައިވާޓް ކޮށްފައިވާ މައްސަލައެއް އިންޑިއާގެ ކަމާބެހޭ ފަރާތްތަކުން ބަލަން ފަށާފައިވާކަމަށް، އިންޑިއާގެ ނޫސްތަކުން ވަނީ ބުނެފައެވެ.
މި މައްސަލަ ފެންމަތިވުމާއެކު، ލަންކާއިން ވަނީ އިންޑިއާގެ ހަކުރު ޝިޕްމަންޓަށް ކްލިއަރެންސް ދިނުމުގެ މަސައްކަތް މަޑުޖައްސާލާފައެވެ. އެގޮތުން މިދިޔަ އޮކްޓޫބަރުމަހުގެ ނިޔަލަށް، އިންޑިއާއިން ލަންކާއަށް ގެންދިޔަ ހަކުރުގެ ތެރޭގައި ރާއްޖެއަށް ދޫކުރި ހުއްދައިގެ ދަށުން ގެންގޮސްފައިވާ ހަކުރުގެ 80 ކޮންޓެއިނަރު ހިމެނޭކަމަށް އިންޑިއާގެ ނޫސްތަކުން ރިޕޯޓްކުރެއެވެ.
އިންޑިއާ އާއި ރާއްޖެއާ ދެމެދު ވެފައިވާ އެއްބަސްވުމުގެ ދަށުން ހާއްސަ އަގުތަކުގައި ރާއްޖެއަށް ކާޑުގެ ބާވަތްތައް ފޯރުކޮށްދެއެވެ. އޭގެ ތެރޭގައި ހަނޑޫ، ހަކުރު، ފުށް، އަލުވި، ބިސް އަދި ފިޔާ ހިމެނެއެވެ. އިންޑިއާގައި ހަކުރު އުފައްދާ މިންވަރު ދަށްވުމުން މިދިޔަ އަހަރުން ފެށިގެން ހަކުރު އެކްސްޕޯޓް ކުރުން ވަނީ މަޑުޖައްސާލާފައެވެ. ނަމަވެސް ރާއްޖެއަށް ހަސަ އެއްބަސްވުމުގެ ދަށުން އަންނަނީ ހަކުރު ފޯރު ކޮށްދެމުންނެވެ.
އެސްޓިއޯގެ އިން ބުނީ ރާއްޖެއަށް ކާޑުގެ ބާވަތްތައް އެތެރެކުރުމަށް ދީފައިވާ ކޯޓާގައި އެހެން ގައުމަކަށް ކާޑު އެތެރެކުރަމުން އައި މައްސަލައެއް ފެންމަތިވެފައިވާކަމުގެ މައުލޫމާތު ލިބިފައިވީ ކަމުގައި ވިޔަސް މިކަމުގެ ސަބަބުން އިންޑިއާއިން ކާޑު އެތެރެކުރުމަށް ދަތިނުވާކަމަށާއި، އަދި އެސްޓީއޯއަށް މެނޭޖު ނުކުރެވޭވަރަށް ރައްޔިތުންނަށް ކާޑު ލިބުމުގައި ދަތިއުނދަގޫކަން ތަހައްމަލު ކުރަން ނުޖެހޭނެ ކަމަށެވެ.