1.8 ކިލޯ މަސްތުވާތަކެއްޗާއެކު ވެލާނާ އިންޓަނޭޝަނަލް އެއާޕޯޓު (ވީއައިއޭ) އިން ހައްޔަރުކުރި މީހާގެ ބަންދަށް 30 ދުވަސް އިތުރުކޮށްފިއެވެ.
މި މައްސަލާގައި ހައްޔަރުކޮށްފައިވަނީ ލ.ދަނބިދޫ، އެނބޫމާ، އުމުރުން 33 އަހަރުގެ ޔޫސުފް ޝާހީނެވެ.
އޭނާގެ ބަންދަށް 30 ދުވަސް އިތުރުކުރީ ބަންދާމެދު އިތުރު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރުކުރުމުންނެވެ.
މި މައްސަލާގައި ފެނުނު މަސްތުވާތަކެތި އަތުލައިގަތީ މިދިޔަ އޮކްޓޫބަރުމަހުގެ ތެރޭގައި ބެންކޮކްގެ ފްލައިޓަކުން ރާއްޖެ އައި ދިވެއްސެއްގެ ލަގެޖުގައި މަސްތުވާތަކެތި ރައްކާކޮށްގެން ގެނެސްފައިވާ ކަމަށް ޝައްކު ކުރެވިގެން ކަސްޓަމްސްއިން ޝާހީން ބަލައި ފާސްކުރުމުގެ ތެރޭގައެވެ.
ފެނުނު މަސްތުވާތަކެތި މެފެޑްރޯންއަށް ޕޮޒިޓިވްވެފައިވާއިރު، އެތަކެތީގެ މަގުމަތީ އަގު 3.3 މިލިއަން ރުފިޔާއަށް އަރައެވެ.