ގދ. ތިނަދޫއަށް ސިޓީއެއްގެ ދަރަޖަ ދިނުމުގައި ވަގު ޑޮކިއުމަންޓް ހަދައި އާބާދީ 10،000 އަށް އިތުރު ކުރި ކަމަށް ތުހުމަތުކޮށް ދުސްތޫރީ މައްސަލައެއް ހައިކޯޓަށް ހުށަހަޅައިފިއެވެ.
މި މައްސަލަ ހައިކޯޓަށް ހުށަހަޅުއްވާފައިވަނީ މިދިޔަ ބުރާސްފަތި ދުވަހު އެންވަޔަރަމެންޓް މިނިސްޓްރީގެ ސްޓޭޓް މިނިސްޓަރު އަދި ގާނޫނީ ވަކީލު މުހައްމަދު ރާގިބު އަހުމަދެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ރިޔާސީ ކެމްޕެއިންގެ ތެރޭގައި، ވަރަށް އަވަސްގޮތަކަށް ކަންތަައްތައް ނިންމައި، ތިނަދޫއަށް ސިޓީއެއްގެ ދަރަޖަ ދެއްވިއެވެ.
އޭރުގެ ތަފާސްހިސާބުތަކުން ދައްކާގޮތުން ތިނަދޫގެ އާބާދީއަކީ ގާތްގަނޑަކަށް 8،000 އެވެ. އޭގެ ތެރެއިން ރަށުގައި ދިރިއުޅެނީ 5،000 އެއްހާ މީހުން ކަމަށް ބެލެވެއެވެ.
ކޯޓަށް ހުށަހަޅާފައިވާ މައްސަލައިގެ ލިޔުމުގައިވާ ގޮތުން މިދިޔަ ސަރުކާރުން ތިނަދޫއަށް ސިޓީއެއްގެ ދަރަޖަ ދިނުމުގައި ރަސްމީ އާބާދީގެ އަސްލަކަށް ބަލާފައިވަނީ އޭރުގެ ތިނަދޫ ކައުންސިލުން ހިއްސާކުރި ލިޔުންތަކެކެވެ. އެ ލިޔުމުގައި 10،150 މީހުން ހަމަކޮށްފައިވަނީ ސައްހަ ނޫން މައުލޫމާތު ހިމަނައިގެން ކަމަށް ތުހުމަތު ކުރެވެއެވެ. މައްސަލައިގައި ފާހަގަކޮށްފައިވާ ގޮތުން، 10،000 މީހުން ހަމަކުރުމަށް ތަކުރާރުކޮށް އައިޑީކާޑު ބޭނުންކޮށްފައިވާ ކަމަށާއި، އެވަގުތު މަރުވެފައިވާ 115 މީހުން އާބާދީގައި ހިމަނާފައިވާކަން ފާހަގަ ކޮށްފައިވެއެވެ. އަދި ޑިޕާޓްމަންޓް އޮފް ނެޝަނަލް ރަޖިސްޓްރޭޝަން (ޑީއެންއާރު)ގެ ރަޖިސްޓްރީ ލިސްޓަށް ބެލުމުން އެ އަދަދު 196 އަށް އަރާކަމަށް ވެސް ބުނެފައިވެއެވެ. މި މަހުގެ 17 ވަނަ ދުވަހާ ހަމައަށް ޑީއެންއާރުގެ ރެޖިސްޓްރީއިން ދައްކާގޮތުން ތިނަދޫގެ އާބާދީއަކީ 7،924 ކަން ވެސް ފާހަގަ ކޮށްފައިވެއެވެ.
ރާގިބު ހުށަހެޅުއްވި މި ދުސްތޫރީ މައްސަލާގައި އެދިފައިވަނީ ތިނަދޫއަކީ ސިޓީއެއްގެ ގޮތުގައި ކަނޑައެޅި ނިންމުމާއި އެ ނިންމުމާ ގުޅިގެން އަޅާފައިވާ އިދާރީ ހުރިހާ ފިޔަވަޅުތައް ބާތިލު ކުރުމަށެވެ.
މި މައްސަލައާ ގުޅޭގޮތުން ހުވަދޫމީޑިޔާއިން ކުރި ސުވާލަށް ޖަވާބުދެއްވަމުން ތިނަދޫ ސިޓީގެ މޭޔަރ ސައުދު އަލީ ވިދާޅުވީ، މިއީ ތިނަދޫ އަށް ކުރިއެރުމެއް ލިބި، ތަރައްގީވާން ނޭދޭ ބަޔަކު ހިންގާފައިވާ ޒާތީ ކަމެއްގެ ގޮތުގައި ސިފަކުރައްވާ ކަމަށެވެ. އަދި ކޯޓަށް ހުށަހަޅާފައިވަނީ ކޮން ޑޮކިއުމެޓުތަކެއްކަމާއި މިކަމާ ބެހޭ އެއްވެސް ކަމެއް ރަސްމީކޮށް އެނގިވަޑައިނުގަންނަވާ ކަމަށެވެ. އެހެންނަމަވެސް އެ ބޭފުޅާއަށް މިކަން ސިފަ ކުރެވެނީ، ތިނަދޫއަށް ކުރިއެރުމާއި ތަރައްގީ އައުން ނޭދޭތީ ހިންގާފައިވާ ޒާތީ ކަމެއްގެ ގޮތުގައި ކަމަށެވެ.
ގދ. ވާދޫ ކައުންސިލް ސެކްރެޓަރީ ޖެނެރަލް މުޙައްމަދު ޝަރީފު ވެސް ވިދާޅުވީ މިފަދަ މައްސަލައެއް ހައި ކޯޓުން ބަލަމުން ދާ ކަމަށް ރަސްމީކޮށް އެނގިފައި ނުވާ ކަމަށެވެ.