ގާނޫނީ ވަކީލު އަހުމަދު ނަޖީބަށް ދިން ހަމަލާތަކުގައި އޭނާ މަރުވި ސަބަބު ސާފުކުރުމަށް، ހަށިގަނޑު ބެއްލެވި ޑޮކްޓަރުގެ ބަސް ސުޕްރީމް ކޯޓުން ހޯދައިފިއެވެ. މިއަދު ބޭއްވުނު އަޑުއެހުމުގައި، ނަޖީބުގެ ހަށިގަނޑު ބެއްލެވި ޑރ. އަބްދުﷲ އަދްސަރު ހެކިބަސް ދެއްވިއެވެ.
ޑރ. އަދްސަރު ވިދާޅުވި ގޮތުގައި، ނަޖީބު މަރުވި ސަބަބު ދެނެގަތީ ބޭރުފުށުން ފެންނަން ހުރި އަލާމާތްތަކަށް ބަލައިގެންނެވެ. މަރުވި ކަމަށް ބެލެވޭ މައިގަނޑު ދެ ސަބަބެއް ޑޮކްޓަރުގެ ރިޕޯޓުގައި ފާހަގަކޮށްފައިވެއެވެ. އެއީ:
- ކަރުގެ ވަށައިގެން އެއްޗެއް އޮޅައި ބަނުމުގެ ސަބަބުން ނޭވާހާސްވެ، ސިކުނޑިއަށް ލޭދިޔުން ހުއްޓި، ސިކުނޑި މަރުވުން.
- ހަށިގަނޑުގެ އެކި ތަންތަނަށް ވަޅިން ހަމަލާދިނުމުގެ ސަބަބުން ލޭ ބޭރުވެ، ލޭނާރުތަކުގައި ލޭ މަދުވެ ގުނަވަންތަކަށް ލޭ ނުލިބުން.
ހަނާގެ މަރުގެ މައްސަލާގައި މިއަދު ސުޕްރީމް ކޯޓުން ބޭއްވި އަޑުއެހުމުގެ ތެރެއިން…………ސުޕްރީމުކޯޓު
ނަޖީބުގެ މަރާލި ކަމުގެ ކުށް ސާބިތުވެފައިވަނީ ފާތިމަތު ހަނާ އާއި އޭނާގެ ލޯބިވެރިޔާ އަހުމަދު މުއްރަތުގެ މައްޗަށެވެ. މި މައްސަލައިގައި ކްރިމިނަލް ކޯޓުން ކުރި ހުކުމަށް ހައި ކޯޓުން ކުރިން ވަނީ ތާއީދުކޮށްފައެވެ. ހަނާގެ ފަރާތުން މައްސަލަ ސުޕްރީމް ކޯޓުގައި އިސްތިއުނާފު ނުކުރާތީ، ހުކުމުގެ ސައްހަކަން ކަށަވަރު ކުރުމަށް ދައުލަތުން ސުޕްރީމް ކޯޓަށް ހުށަހެޅިއެވެ.
މިއަދުގެ އަޑުއެހުމުގައި ދައުލަތުގެ ވަކީލު ވިދާޅުވީ ޑޮކްޓަރުގެ ބަހުންނާއި ފެންނަން ހުރި ކަންކަމުން ނަޖީބު މަރުވި ސަބަބު ވަރަށް ރަނގަޅަށް ސާފުވެފައިވާ ކަމަށެވެ. އަދި މި ކުށުގައި ހަނާގެ ބައިވެރިވުން އޮތް ގޮތް ވެސް ވަރަށް ސާފު ކަމަށް ވަކީލު ފާހަގަކުރެއްވިއެވެ.
ހަނާ ނަޖީބު އަދި މުއްރަތު…..(ފޮޓޯ:،މިހާރު)
މިއަދުގެ ސުޕްރީމް ކޯޓުގެ އަޑުއެހުމުގައި ފާތިމަތު ހަނާ އެއްވެސް ވާހަކައެއް ނުދެއްކި ނަމަވެސް، މީގެ ތިން އަހަރު ކުރިން ބޭއްވުނު އަޑުއެހުމެއްގައި އޭނާ ވަނީ ތަފްސީލުކޮށް ވާހަކަދައްކާފައެވެ. އޭރު ހަނާ ދިން ބަޔާނުގައި، ނަޖީބު މަރާލުމުގައި އޭނާގެ ބައިވެރިވުމެއް ނެތް ކަމަށާއި އެފަދަ ނިޔަތެއްވެސް ނެތް ކަމަށް ބުނެފައިވެއެވެ.
ހަނާ ބުނި ގޮތުގައި، އެ ރޭ ނަޖީބުގެ ކޭޝްކާޑާއި ޕިން ނަންބަރު އަތުލުމަށްފަހު، އޭނާއާއި މުއްރަތާ ދެމީހުން، ރަލާއި އެހެނިހެން ކާބޯތަކެތި ގަނެ، ރާބޮއިގެން ނިދީއެވެ. ހެނދުނު ހޭލެވުނީ މުއްރަތު ހާސްވެގެން ގޮވުމުން ކަމަށާއި، އޭރު ނަޖީބު މަރުވެފައިވާ ކަމަށް މުއްރަތު ބުނި ކަމަށް ހަނާ ހާމަކުރިއެވެ.
"ވަރަށް ހާސްވެގެން ގޮވާފައި ބުނަނީ މުއްރަ އަތުން ނަޖީބު މަރުވެއްޖެއޭ. ބުނީމާ އަޅުގަނޑު ބުނިން ކީއްހޭ ތިކުރީ. އެ ވަގުތު އަޅުގަނޑު ވެސް ވަރަށް ހާސްވި. އެއްވެސް އިރަކު އަޅުގަނޑުގެ އިންޓެންޝަނެއް ނޫން އެގޮތަށް ހެދުމަކީ،" ހަނާ ބުންޏެވެ.
ނަޖީބުގެ ހަށިގަނޑު ފޮރުވުމުގައި ބައިވެރިވީ ވެސް ހާސްވެފައި ހުރި ވަރުން ކަމަށް ހަނާ ބުންޏެވެ. އަދި ކުރިން އެކަމަށް އެއްބަސްވެފައިވަނީ އަމިއްލަ ނަފްސު ކުށްވެރިކުރެވުނު ހިނދު ކަމަށާއި، މިހާރު އެގޮތަށް ގަބޫލު ނުކުރާ ކަމަށް ހަނާ ބުންޏެވެ.
"އަސްލު އަމިއްލަ ސެލްފަށް ބްލޭމް ކުރެވުނީ އެގޮތަށް ކަންތައްތައް ވެފައި ހުރީމާ. އެކަމަކު އަސްލު ވިސްނާލާއިރު އެނގޭ އަޅުގަނޑު މިހާރު އައިސްފައި އިންނަ ސެންޓެންސަކީ [ހުކުމަކީ] އަޅުގަނޑަށް ޑިޒާވް ސެންޓެންސެއް ނޫން،" ހަނާ ބުންޏެވެ.
މައްސަލަ ބައްލަވާ ފަނޑިޔާރުންގެ ބެންޗުން ވިދާޅުވެފައިވަނީ އިތުރު ކަމެއް ސާފުކުރަން ޖެހިއްޖެނަމަ އިތުރު އަޑުއެހުމެއް ބާއްވާނެ ކަމަށާއި، އެހެން ނޫންނަމަ ދެން އޮންނާނީ ހުކުމް އިއްވުން ކަމަށެވެ. މުއްރަތުގެ މައްޗަށް ކުރި ހުކުމަށް ސުޕްރީމް ކޯޓުން 2016 ގައި ވަނީ ތާއީދުކޮށްފައި ނަމަވެސް، އެ ހުކުމް މިހާތަނަށް ތަންފީޒުކޮށްފައެއް ނުވެއެވެ.