އޮކްޓޯބަރު މަހުން ފެށިގެން އިސްރާއީލުގެ ހަމަލާތަކާ ކުރިމަތިލަމުންދާ ގާޒާގައި ދިރިއުޅެމުންދާ 2.3 މިލިއަން ފަލަސްތީނުގެ ރައްޔިތުންނަށް އިތުރު ދަތިތަކާއި ކުރިމަތިލާން ޖެހިއްޖެއެވެ. އެގޮތުން ގާޒާގައި ތިބި ނިކަމެތިވެފައިވާ މީހުން ދިރިއުޅެމުންދާ ޓެންޓުތަކަށް ބޯކޮށް ވާރޭ ވެހި ފެން ވަދެފައިވެއެވެ.
"އަހަރެމެން ރޭގަނޑު ސަލާމަތް ވާން ދިޔައިރު ވާރޭ ވެހި ޓެންޓަށް ފެން ވަނުމުގެ ސަބަބުން ކާއެއްޗެހި ހަލާކުވެ، ކުދިން ބިރުން ރޮމުން ދިޔަ. އަހަރެމެން ބިރުގަންނަނީ ކުދިން ބަލިވެދާނެތީ. " ކުރީގެ ފުޓްބޯޅަ ދަނޑެއްގައި ދިރިއުޅެމުންދާ ހާލުގައި ޖެހިފައިވާ ގާޒާގެ ރައްޔިތެއް ކަމަށްވާ 37 އަހަރުގެ ރާމީ ބުނެފައިވެއެވެ.
ފަލަސްޠީނުގެ ސިވިލް ޑިފެންސްއިން ބުނެފައިވަނީ މޫސުމީ ފެންބޮޑުވުމުގެ ސަބަބުން އެތައް ހާސް ބަޔަކަށް އަސަރުކޮށްފައިވާ ކަމަށާއި، އެހީ ފޯރުކޮށްދޭ ފަރާތްތަކަށް އާ ޓެންޓުތަކާއި ކެރަވޭންތައް ހޯދައިދިނުމަށް އެދިފައިވާ ކަމަށެވެ.
ގާޒާގެ އޮންނަ ދީރް އެލް ބާލާހު ސިޓީގައި ވަގުތީ ޓެންޓްތަކެއްގައި ދިރިއުޅޭ ފަލަސްތީނުގެ ރައްޔިތުންނަށް ވާރޭ ވެހުމުގެ ސަބަބުން ދަތިތަކާއި ކުރިމަތިލާން ޖެހުން. [އަލީ ޖަދަالله/އަނަދޫ]
"ވާރޭވެހުމުގެ ސަބަބުން އެތައް ހާސް ހާލުގައި ޖެހިފައިވާ މީހުން ދިރިއުޅެމުންދާ ޓެންޓުތަކަށް ބޮޑެތި ގެއްލުންތަކެއް ވެފައިވޭ. ޓެންޓުތަކަށް ފެން ވަދެ، އަންނައުނަށާއި ނިދާ ތަންތަނަށް ގެއްލުން ވެފައިވޭ." ސިވިލް ޑިފެންސްގެ ސްޕޯކްސްޕާސަން މަޙްމޫދު ބަސަލް އާދީއްތަ ދުވަހު ނެރުނު ބަޔާނެއްގައި ބުނެއިވެއެވެ.
ބޯކޮށް ވާރޭ ވެހުމުގެ ސަބަބުން ދީރް އަލް ބަލާހުގެ އުތުރުގައި ހަލާކުވެފައިވާ ޓެންޓެއްގެ ތެރޭގައި ހުރި ގެދޮރު ގެއްލިފައިވާ ފަލަސްތީނުގެ މީހެއް. [ބަޝާރު ތާލިބް/އޭއެފްޕީ]
"މިހާރުގެ ޙާލަތުގެ ސަބަބުން އަވަސް އެހީއެއް ނުލިބިއްޖެނަމަ ނުރައްކާތެރި އިންސާނީ ކާރިސާއެއް ކުރިމަތިވެދާނެ." އޭނާ ބުނެފައިވެއެވެ.
ގާޒާ ސިޓީއަށް ބޯކޮށް ވާރޭވެހުމުގެ ސަބަބުން ގެދޮރު ގެއްލިފައިވާ ފަލަސްތީނު ރައްޔިތުން ޓެންޓްތަކުގެ ކައިރީގައި. [ދާވޫދު އަބޫ އަލްކާސް/ރޮއިޓާސް]
އޭނާ އދ އަށާއި ބައިނަލްއަޤްވާމީ ފަރާތްތަކަށް ގޮވާލީ ގާޒާގައި ތިބި ނިކަމެތިވެފައިވާ އާންމު ރައްޔިތުންނަށް ފިނިމޫސުމުގައި ޓެންޓުތަކާއި އިތުރު އެހީ ހޯދައިދިނުމަށް އަވަހަށް އެހީތެރިވެދިނުމަށެވެ.
އިސްރާއީލުން ގާޒާގައި ނަސްލު ނައްތާލުމަށް ހިންގަމުންދާ ހަނގުރާމައިގައި 44,000 އަށްވުރެ ގިނަ މީހުން މަރުވެފައިވާ އިރު، އެ ސަރަޙައްދުގައިވާ ބޮޑު ބައެއް ވަނީ ވީރާނާވެފައެވެ. އަދި މުޅި އާބާދީގެ ގާތްގަނޑަކަށް ބޮޑު ބައެއް ވަނީ ހާލުގައި ޖެހިފައެވެ.
ބުރާސްފަތި ދުވަހު، އިންޓަރނޭޝަނަލް ކްރިމިނަލް ކޯޓު (އައިސީސީ) އިން ވަނީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި އިސްރާއިލުގެ ކުރީގެ ދިފާޢީ ވަޒީރު ޔޯވް ގަލަންޓް ގާޒާގައި ހިންގަމުންދާ ލާއިންސާނީ ހަނގުރާމައިގެ ސަބަބުން ހައްޔަރުކުރުމަށް އަމުރު ނެރެފައެވެ.
އޭގެ އިތުރުން، އިސްރާއީލުން ގާޒާގައި ހިންގަމުންދާ އަނިޔާވެރި ހަނގުރާމައާ ގުޅިގެން އިންޓަރނޭޝަނަލް ކޯޓް އޮފް ޖަސްޓިސްގައި އިސްރާއީލާއި ދެކޮޅަށް ނަސްލު ނައްތާލުމުގެ މައްސަލައެއް ވެސް ކުރިއަށްދެއެވެ.