މިދިޔަ އެއް އަހަރު ތެރޭގައި މިނިސްޓްރީ އޮފް ސިޓީސް، ލޯކަލް ގަވަމަންޓް، ޕަބްލިކް ވަރކްސްއަށް ކާމިޔާބު މަސައްކަތްތަކެއް ކުރެވުނީ މިނިސްޓްރީގެ މަސައްކަތުގެ މާހައުލުގެ ދުޅަހެޔޮކަމުގެ ސަބަބުން ކަމަށް މިނިސްޓަރު އާދަމް ޝަރީފް ވިދާޅުވެއްޖެއެވެ.
މިނިސްޓަރު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ރައީސުލްޖުމްހޫރިއްޔާގެ ސަރުކާރުގެ ކާމިޔާބު 52 ހަފުތާގެ ތެރޭގައި ލޯކަލް ގަވަމަންޓް މިނިސްޓްރީގެ މަސައްކަތްތައް ކުރެވުނު ގޮތުގެ މަސައްކަތު ބައްދަލުވުން މިއަދު ފެށިގެން ކުރިއަށްދާ ކަމަށެވެ.
ކާމިޔާބު މަސައްކަތްތަކެއް ކުރެވިފައިވަނީ މިނިސްޓްރީގެ މުވައްޒަފުންގެ މެދުގައި އޮންނަ ބަދަހި ގުޅުމާއި މަސައްކަތުގެ މާހައުލު ދުޅަހެޔޮކަމުގެ ސަބަބުންކަން ފާހަގަކުރައްވައި މިނިސްޓަރު ވަނީ ހުރިހާ މުވައްޒަފުންނަށް ޝުކުރު އަދާކުރައްވާފައެވެ.
ސްޓެލްކޯގެ 5 ވަނަ ފަންގިފިލާގެ އޮޑިޓޯރިއަމްގައި މިއަދު ކުރިއަށްދާ މި މަސައްކަތު ބައްދަލުވުމުގެ މައިގަނޑު ބޭނުމަކީ މިނިސްޓްރީގެ ހިންގުމަށް ގެންނަން ޖެހޭ ބަދަލުތަކާމެދު ފުންކޮށް ވިސްނާ މަޝްވަރާކުރުން ކަމަށް ލޯކަލް ގަވަމަންޓް މިނިސްޓްރީން ވަނީ ބުނެފައެވެ.