ރާއްޖެ ހިމެނޭ ސަރަޙައްދުގައި އުފެދިފައިވާ 2 ކޮޅިގަނޑުގެ ސަބަބުން ރާއްޖޭގެ ދެކުނުގެ ސަރަޙައްދަށް ބޯކޮށް ވާރޭވެހި ކަނޑުތައް ގަދަވާނެކަމަށް ލަފާ ކުރެވޭ ކަމަށާއި އެހެން ކަމަށްވުމުން މޫސުމަށް ހާއްސަ ސަމާލުކަމެއް ދިނުމަށް މޫސުމާ ބެހޭ ގައުމީ އިދާރާއިން އިލްތިމާސް ކޮށްފިއެވެ.
މޫސުމާ ބެހޭ ގައުމީ އިދާރާއިން ބުނެފައިވާ ގޮތުގައި މެދުރާއްޖެތެރެއާއި ދެކުނުގެ އެކި ހިސާބަށް ގުގުރުމާއެކު ބޯކޮށް ވާރޭ ވެހުން އެކަށީގެންވެއެވެ. އަދި އުތުރުގެ އަތޮޅުތަކަށް ކެރީގެ އަސަރުކުރާނެ ކަމަށް ބެލެވޭކަމަށްވެސް އެއިދާރާއިން ވަނީ ހާމަކޮށްފައެވެ. ދެކުނުގެ އަތޮޅުތަކަށް ހުޅަނގާއި ހުޅަނގުއުތުރުން ގަޑިއަކު 10 މޭލާއި 20 މޭލާއި ދެމެދުގެ ބާރުމިނުގައި ވައިޖެހޭނެ ކަމަށް ލަފާކުރެވޭކަމަށާއި އަދި ވިލާގަނޑުގައި ގާތްގަނޑަކަށް 35 މޭލު ބާރުމިނުގައި ވައިގަދަވުން އެކަށީގެންވާ ކަމަށްވެސް އެއިދާރާއިން ވަނީ ހާމަކޮށްފައެވެ.
ރާއްޖޭގެ މޫސުން ސެޓެލައިޓް ފޮޓޯ
ކުރިއަށް އޮތް ގަޑިތަކުގައި ދެކުނުގެ ކަނޑުތައްވެސް އާދައިގެ ވަރަކަށް ގަދަވާނެ ކަމަށާއި އަދި އެހެން ހިސާބުތަކުގެ ކަނޑުތައް އާދައިގެ ވަރަކަށް މަޑުވާނެކަމަށް ފާހަގަކުރުމާއެކު މޫސުމާ ބެހޭ އިދާރާއިން ބުނީ ވިލާގަނޑުގައި ރާއްޖޭގެ ކަނޑުތައް ގަދަވާނެކަމަށެވެ. އެހެންކަމުން މިދުވަސްވަރު ކަނޑު ދަތުރުކުރާ ފަރާތްތަކުން މޫސުމަށް ހާއްސަ ސަމާލުކަމެއްދިނުމަށް މޫސުމާ ބެހޭ އިދާރާއިން ވަނީ އިލްތިމާސް ކޮށްފައެވެ.
ރާއްޖޭގެ އިރުން، ބޭ އޮފް ބޭންގަލް އާއި ރާއްޖޭގެ އިރުދެކުނުގައި އުފެދިފައިވާ ދެ ކޮޅިގަނޑުގެ ބާރު ގަދަވަމުން އަންނަ ކަމަށާއި ކުރިއަށް އޮތް ގަޑިތަކުގައި މޫސުން ގޯސް ވާނެ ކަމަށް ބެލެވޭ ކަމަށްވެސް މޫސުމާ ބެހޭ އިދާރާއިން ވަނީ ބުނެފައެެވެ