މިދިޔަ ސަރުކާރުން ހިންގި ގެދޮރުވެރިޔާ ސްކީމުގެ ދަށުން 4,000 ފުލެޓު ލިބޭ މީހުންގެ ވަގުތީ ލިސްޓުގައި ވަކި ބަޔަކު ހިމެނުމަށް ސަރުކާރަށް ނިސްބަތްވެވަޑައިގަންނަވާ ރައްޔިތުންގެ މަޖިލީހުގެ މެންބަރުން ނުފޫޒު ފޯރުވާކަމަށް ބުނެ ދައްކަމުންދާ ވާހަކަަތައް ހައުސިންގ މިނިސްޓްރީން މިރޭ ދޮގުކޮށްފިއެވެ.
އެ މިނިސްޓްރީން ނެރުނު ބަޔާނެއްގައި ބުނީ ގެދޮރުވެރިޔާ ސްކީމާ ގުޅިގެން އެކި ފަރާތްތަކުން އާންމުންގެ ހިތްތަކުގައި އެ މިނިސްޓްރީއާމެދު ނުބައި ތަސައްވުރެއް އުފެދޭ ގޮތަށް ހަގީގަތާ ޚިލާފު ވާހަކަތަކެއް މީސްމީޑިއާގައި ފަތުރަމުންދާ ކަމަށެވެ. އަދި މި ސްކީމާ ގުޅިގެން ކުރިއަށްދާ ރީ-އިވެލުއޭޝަން މަސައްކަަތަށް މަޖިލިސް މެންބަރުންނާއި ބައެއް ސިޔާސީ ފަރާތްތަކުން ނުފޫޒު ފޯރުވާކަމަށް ބުނެ ރައްޔިތުންގެ ހިތުގައި އުފެދޭ ގޮތަށް ކަނޑައެޅިގެން ހަގީގަތާ ޚިލާފަށް ޚަބަރުތައް ފަތުރަމުންދާ ކަމަށެވެ.
ހައުސިންގ މިނިސްޓްރީން ވަނީ މި ސްކީމާ ގުޅިގެން ކުރިއަށްދާ ރީ-އިވެލުއޭޝަން މަސައްކަަތަށް އެއްވެސް ފަރާތަކަށް ނުފޫޒު ނުފޯރުވޭނެ ކަމުގެ ފުރިހަމަ ޔަގީންކަން ދީފައެވެ.
މަގުސަދަކީ މި ސްކީމުގެ ދަށުން ފުލެޓުތައް ލިބިގެންދާނީ އެންމެ ހައްގުވެރި ފަރާތަށްކަމުގައި ކަނޑައެޅިގެން ދިއުން ކަމަށް ވެސް އެ މިނިސްޓްރީން ބުންޏެވެ.
މި މަސައްކަތަކީ ގިނަ އަދަދެއްގެ ރައްޔިތުންގެ ބޯހިޔާވަހިކަމުގެ އުންމީދުތަކާ ގުޅިފައިވާ ވަރަށް ހައްސާސް މައްސަލައަކަށްވާތީ މިކަމުގައި އެ މިނިސްޓްރީގެ ރަސްމީ ބަހެއް ހޯދުމެއްނެތި ސިޔާސީ ބޭނުމަށް ހަގީގަތާ ޚިލާފު ޚަބަރު ނުފެތުރުމަށް ވެސް ވަނީ އިލްތިމާސްކޮށްފައެވެ.