ގއ ނިލަންދޫ ކައުންސިލުން އިންތިޒާމްކޮށްގެން ބާއްވާ " ރާވެރިޔާ ވޮލީ މުބާރާތް 2024 " ފިރިހެން ޑިވިޝަންގެ ހަތް ވަނަ މެޗުގައި ގއ ކަނޑުހުޅުދޫ އަދި ވިލިނގިލީ ވޮލީބޯލް ކުލަބު ވާދަކުރި މެޗް ކަނޑުހުޅުދޫއިން ކާމިޔާބު ކޮށްފިއެވެ.
މި މެޗް ކަނޑުހުޅުދޫއިން ކާމިޔާބު ކުރީ ސީދާ ތިން ސެޓުންނެވެ.
މެޗުގެ ފުރަތަމަ ސެޓް ފަސޭހަކަމާއި އެކު 25/21 އަދި ދެވަނަ ސެޓު 25/15 އަދި 3 ވަނަ ސެޓު 25/18 އިން ކާމިޔާބު ކުރިއެވެ. މިމެޗުން މޮޅުވުމާއި އެކު ކަނޑުހުޅުދޫއަށް ސެމީގެ ޖާގަ ކަށަވަރު ކުރުމަށް ގއ ވިލިނގިލީ ކެޕިޓަލް ސިޓީ ބަލި ކުރަން ޖެހޭނެއެވެ.
މެޗުގެ ފުރަތަމަ ސެޓުން ފެށިގެން ކަނޑުހުޅުދޫ ޓީމް ފެނިގެން ދިޔައީ ވަރަށް އިތުބާރާއި އެކު ކުޅެމުން ދިޔަތަނެވެ. މި މެޗުން ބަލިވުމާއިއެކު ގއ ވިލިނގިލީ ވޮލީ ކުލަބަށް ސެމީއަށް ދިއުމުގެ އަމިއްލަ ބާރު އެޓީމަށް ގެއްލުނީއެވެ.
މެޗުގެ މޮޅުކުރުންތެރިޔަކަށް ހޮވުނީ ކަނޑުހުޅުދޫ ވޮލީޓީމްގެ ޖާޒީ ނަންބަރު 5 އަބްދުالله މިހާދު ( އަބުޅޯ ) އެވެ. އަބްޅޯ ވަނީ މިމެޗުން ކަނޑުހުޅުދޫ މޮޅުވުމުގައި މުހިންމު ރޯލެއް އަދާކޮށްފައެވެ.
މުބާރާތުގައި މާދަމާ ވެސް ދެމެޗެއް ކުޅުމަށް ހަމަޖެހިފައިވެއެވެ. އަންހެން ޑިވިޝަންގައި ކޮނޑޭ ވޮލީކުލަބު އަދި ވިލިނގިލީ ވޮލީބޯލް ކުލަބު ވާދަކުރާނެއެވެ. މި މެޗުން މޮޅުވާ ޓީމަކަށް ސެމީ ފައިނަލްގެ ޖާގަ ކަށަވަރު ވާނެއެވެ. މި މެޗް ފެށުމަށް ހަމަޖެހިފައިވަނީ ހަވީރު 16:15 ގައެވެ. އަދި ފިރިހެން ޑިވިޝަންގައި ގްރޫޕު ބީ ގައި ބޮންބޮން ސްޕޯޓްސް ކުލަބު އަދި ކޮނޑޭ ވޮލީ ކުލަބު ވާދަކުރާނެއެވެ. މި މެޗް ފެށުމަށް ހަމަޖެހިފައިވަނީ 20:15 ގައެވެ.
2022 މި މުބާރާތުގައި ޖުމްލަ 11 ޓީމް ބައިވެރިވިއެވެ. އެއީ ފިރިހެން 4 ޓީމްގެ އިތުރުން އަންހެން 7 ޓީމެވެ. 2023 ވަނަ އަހަރު މުބާރާތުގައި 13 ޓީމްއަކުން ބައިވެރިވި އިރު އަންހެން 6 ޓީމް އަދި ފިރިހެން 7 ޓީމް ބައިވެރިވެފައިވެއެވެ. މިދިޔަ އަހަރުގެ އަންހެން ޑިވިޝަންގެ ޗެމްޕިއަނުންނަކީ ކަނޑުހުޅުދޫ އަންހެން ވޮލީބޯލަ ޓީމެވެ. ފިރިހެން ޗެމްޕިއަނުންނަކީ ބޮން ބޮން ސްޕޯޓްސް ކުލަބެވެ.
2022 ވަނަ އަހަރު މިމުބާރާތުގެ ފިރިހެން ޑިވިޝަން ޗެމްޕިއަންކަން ބޮން ބޮން ސްޕޯޓްސް ކުލަބު ހޯދިއިރު އަންހެން ޑިވިޝަން ޗެމްޕިއަން ޓީމަކީ ގެމަނަފުށި ވޮލީބޯލަ ޓީމެވެ.
މިމުބާރާތް ކުރިޔަށް ގެންދިޔުމަށް ހަމަޖެހިފައިވަނީ އަންހެން އަދި ފިރިހެން ދެ ޑިވިޝަނަށް ބަހާލައިގެންނެވެ. އަދި ކޮންމެ ޑިވިޝަނެއްގެ ޗެމްޕިއަން ޓީމަށް 20,000/- (ވިހިހާސް) ރުފިޔާގެ އަދި ކޮންމެ ޑިވިޝަނެއްގެ ރަނަރަޕް ޓީމަށް 10,000 (ދިހަހާސް) ރުފިޔާގެ ފައިސާގެ އިނާމް ދިނުމަށްވަނީ ހަމަޖެހިފައެވެ.