ރަޝިޔާގެ އުރަލް ފަރުބަދަ ސަރަހައްދުގައި އޮންނަ ކޮޕެއިސްކް އާބާދީގެ ހޮސްޕިޓަލަކުން ހެދުނު ގޯހެއްގެ ސަބަބުން، އެހޮސްޕިޓަލަށް ވިހޭ، ދެ އަންހެނުންގެ ދަރިން އޮޅިފައިވާތީވެ، ދެއާއިލާއަށް، ކޮންމެ އާއިލާއަކަށް 100،000 (އެއްލައްކަ ޔޫއެސް ޑޮލަރުގެ ބަދަލެއް) ދިނުމަށް ކޯޓުން ނިންމި ވާހަކައަކީ މަޝްހޫރު ވާހަކައެކެވެ. 2011 ވަނަ އަހަރުގެ މިހާދިސާއަކީ އެ ދެއާއިލާގެ ދުނިޔެ ބަދަލުކޮށްލި ހާދިސާއެކެވެ. މިހާރު 25 އަަހރު ވެފައިވާ ދެކުދިންނަށް، އެ ދެކުދިން ދިރިއުޅެ ފުރާވަރަށް އަރާ އުމުރާ ހަމައަށް ދިޔައިރު ވަގުތު ހޭދަކުރަމުން ދިޔައީ އުފަން މަންމައާއި ބައްޕައާ އެކުގައި ނޫންކަން އެދެކުދިންނަށް އެނގުނީ އުމުރުން 12 އަހަރު ވީފަހުންނެވެ.
ހޮސްޕިޓަލުން މި ދެ ކުދިން ބަދަލު ވެފައިވާކަން އެނގުނީ އޭގެ ތެރެއިން އެއް ކުއްޖެއްގެ ބައްޕައަށް ޝައްކުވެ ޑީއެންއޭ ޓެސްޓެއް ހެދުމުންނެވެ.
މީގެ އެންމެ ހާއްސަ ވާހަކައަކީ އަދި މުހިންމު ޕޮއިންޓަކީ ދެކުދިން އޮޅުންވެ ހޮސްޕިޓަލަށް ހެދުނު ގޯހުގެ ސަބަބުން ލިބުނު ފައިސާއެއް ނޫނެވެ. އެކަމަކު މިދައްކަން އުޅެނީ ތަގުދީރުގެ ނިޔާގެ ވާހަކައެވެ. ލައުހުގައި ލިޔުއްވާފައިވާ ގޮތަކަށް ބިންމަތީގައި ކަންހިނގާ ގޮތުގެ ވާހަކައެވެ. ދުނިޔެއަށް އަންނަ އިރު ކޮންމެ އިންސާނަކުވެސް އެއިންސާނެއްގެ ދުނިޔޭގެ ހަޔާތާއި، ދީނާއި އުޅޭނެ ގޮތާއި ރިޒުގާއި މަރުވާނެ ބިމަށްދާނދެން ޔަގީންވެގެން އަންނަ ގޮތުގެ ވާހަކައެވެ.
ސަބަބަކީ މި ދެ އާއިލާގެ ތެރެއިން އެއް އާއިލާއަކީ މުސްލިމް އާއިލާއެއް ކަމަށްވީއިރު އަނެއް އާއިލާއަކީ ކްރިސްޓިއަން އާއިލާއެއް ކަމަށްވުމެވެ. މި ދެ އާއިލާގެ، ދެ އަންހެނުން ވިހެއީ އެއްވަގުތެއްގައި، އެއްގަޑިއެއްގައި، އެއް ހޮސްޕިޓަލުގެ، އެއް ވިއްސާ ކޮޓަރިއެއްގެ ތެރޭގައި ދެ އެނދެއްގައެވެ. ދެމެދުގައި ދަމާފައި ހުރި ވަރުގަދަ ޕާޓިޝަން ފަރުދާއެއް ހުރިކަން ޔަގީނެވެ. އެހެނެއްކަމަކު މިދެމައިންގެ ދަރިންގެ ދީނާއި ދުނިޔޭގެ ދިރިއުޅުން އެކުދިންގެ ވެރިރަސްކަލާނގެ މިންވަރުފުޅާއި އިރާދަފުޅާއެކު، އެ ހަމަޖެހިފައިވާ މަގާމަށް ހަމަޖެހި ލިޔެވި ނިމިފައި އޮތް ގޮތަށް، ވާސިލު ވުމަކަށް އެފަރުދާއިން އެޅުނު ހުރަހެއް ނެތެވެ.
ﷲ ގެ ކުޅަދުންވަންތަކަމާއެވެ. ކްރިސްޓިއަން މަންމައަަކާއި ބައްޕައެއްގެ އުނގުގައި، އެއާއިލާގެ ދީނާއި ގޮތާއި ފޮތާއެކު ބޮޑުވަމުން އެދަނީ މުސްލިމު ދެމަފިރިއެއްގެ ދަރިފުޅެކެވެ. އަދި މުސްލިމު ދެމަފިރިއެއްގެ ހުރިހާ ލޯތްބަކާއި ސަމާލުކަމުގެ އިތުރަށް އިސްލާމްދީނުގެ އަލިނޫރުން ދިރުން ލިބިގެން ސީދާސާފު ތެދުމަގުގައި ސާބިތުވެ ބޮޑުވަމުން އެދަނީ ކްރިސްޓިއަން މަންމައަކާއި ބައްޕައެއްގެ ދަރިފުޅެކެވެ.
މައްސަލަ ޖެހުނީ، ކްރިސްޓިއަން އާއިލާގެ ފަރާތުން ކުރި ޝައްކަކުންނެވެ. ދޮން ދެމީހެއްގެ ދަރިފުޅެއްގެ ގައިގައި އޮޅަލިކުލަ، ދެމީހުންގެ އާއިލާގެ އެއްވެސް މީހެއްގެ ބޮލުގައި ނޯންނަ ކަޅު، ބުޅި، އިސްތަށިގަނޑެއް. އެއްވެސް އާއިލީ މީހެއްގެ ލޮލުގައި ނުހުންނަހާ ސާފު ގަދަ ކަޅުކުލައިގެ ދެލޯ، އެމީހުންގެ އާއިލާގެ އެއްވެސް މީހެއްގެ ހަށިގަނޑާ ނުގުޅޭފަދަ ގޮތަކަށް ހެދެމުން އަންނަ ހަށިގަނޑު، ނޭފަތާއި ތުންފަތް، މިހެން ގޮސް ހުރިހާ ސިފައެއްވެސް މުޅިން ތަފާތެވެ. އެންމެ ފަހުން ދެމަފިރިންގެ ދެމެދުގައި ހޫނު ޒުވާބަކަށްވެ، މައްސަލަ ޝަރީއަތާ ހަމައަށް ދިއުމުގެ ކުރިން ނެގި ޑީއެންއޭ ރިޕޯޓު ކިޔައިދިނީ މުޅިން ބިރުވެރި ހާސްވާފަދަ ވާހަކައެކެވެ. 99.99 އިންސައްތަ ބައްޕަ އާ ގުޅުމެއް ނެތް ގޮތަށް ދަރިފުޅުގެ 99.99 އިންސައްތަ މަންމައާ ވެސް އެއްވެސް ގުޅުމެއް ނެތް ކަމަށް ޑީއެންއޭ ރިޕޯޓުގައި އޮތީ ސާފުކޮށް ފެންނާށެވެ.
ﷲމިންވަރުކުރެއްވި އަޅަކަށް ތެދުމަގު ދައްކަވަތެވެ…….. ފޮޓޯ: ޝަޓަސްޓޮކް
އެހިސާބުން ސުވާލު ގޮސް ހުއްޓުނީ ހޮސްޕިޓަލަށެވެ. މައްސަލަ ހުށަހެޅުނީ ޝަރީއަތަށެވެ. ކްރިސްޓިއަން ދެމަފިރިން އެމީހުންގެ މިދަރިފުޅު ގެއްލޭކަން ބޭނުމެއް ނޫނެވެ. އެހެންވެ އެވާހަކަ ސިއްރު ކުރަން އުޅުމުން. ދައުލަތުން އެމައްސަލަ ހުށަހަޅަން ޖެހޭނެ ކަމަށް ބުނީއެވެ. ހޮސްޕިޓަލުން 12 އަހަރު ކުރީގެ ލިޔެކިޔުންތަކާއި ރިކޯޑުތައް ބަލައި އޮޅުން ފިލުވުމަށްފަހު ނުކުތް ނަތީޖާއަކީ އެ ހޮސްޕިޓަލުގެ ސްޓާފުން އަތުން ވަރަށްވެސް ބޮޑު ގޯހެއް ހިނގާފައި ވާކަމުގެ ނަތީޖާއެވެ. އަދި ދެން ދެވަނަ އާއިލާއަށް ކޯޓަށް ހާޒިރު ވުމަށް އަންގައިފިއެވެ.
އެއީ ކަޅު ނަސްލުގެ މުސްލިމު ދެމަފިރިއެކެވެ. އަންހެންމީހާގެ ބޮލުގައި ވެސް ފިރިހެންމީހާގެ ބޮލުގައިވެސް އޮތީ ކަޅުކަން ގަދަ ވަރުގަދަ ބުޅި އިސްތަށިގަނޑެކެވެ. ދެލޮލުގައި ކަޅު އަދި އިސްކޮޅުގެ ދިގު މިނާ އެއްވަރަށް ރޫފައެޅިގެންވާ ހަށިގަނޑެކެެވެ. މޫނުގެ ބައްޓަމާއި ތުންފަތާއި ނޭފަތާއި މިހެން ގޮސް ހުރިހާ ސިފައެއްވެސް ދެކެފަރިތަ ވައްތަރުކަން ކްރިސްޓިއަން ދެމަފިރިންނަށް ގަބޫލު ކުރަން ޖެހުނީ އެއީ އެދެމީހުންގެ ހިތުގެ ވިންދުފަދަ ދަރިފުޅުގެ ސިފަަތއް ކަމަށްވާތީއެވެ.
އަނެއްކޮޅުން އަނދިރި ނޫކުލައެއްގެ އަތްދިގު ހެދުމަކާއި ހަރުވާޅުގައި ބުރުގާއެއް އަޅައިގެން އައި އަންހެންކުއްޖާގެ ހަމައެކަނި މޫނުންވެސް އެއީ އެދެމަފިރިންގެ ދަރިއެއް ނޫންކަން ފެނުމާއެކު ކްރިސްޓިއަން ދެމަފިރިންނަށް ވިސްނިއްޖެއެވެ. އެ ދޮން ކުލަ، ސީދާ ތެދު ނޭފަތް، ވިލުފެހި ކުލައަކަށްދާ ދެލޯ، ފެންނަން ހުރި ސިފަތަކުން އެއީ އެމީހުންގެ ސިފަތައް ކަން ދެނެގަންނާކަށް އުނދަގުލެއް ނުވިއެވެ.
ކޯޓުން ސުވާލު ކުރީ އެމީހުންނަށް ދަރިފުޅުގެ ސިފަތަކާމެދު ޝައްކު ނުވީ ކީއްވެގެންތޯ އާއި ޑީއެންއޭ ނުހެދީ ކީއްވެގެންތޯއެވެ، ޖަވާބު ސީދާވެފައި ސާދާއެވެ، "ﷲ ދެއްވި ނިއުމަތެއް، ސިފައަކީ އެކަލާނގެ މިންވަރުން ޖެއްސެވި ސިފަތަކެއް، އަޅުގަނޑުމެން ދެމަފިރިންގެ، އަދި އާއިލާގެ އެއްވެސް ސިފައެއް ނެތަސް، އަޅުގަނޑުމެންގެ ދަރިފުޅަކީ ތުއްތު ތުއްތު އިރުއްސުރެ ﷲދެކެ ލޯބިވާ، ފުރިހަމަ މުއުމިނަކަށް ވާން މަސައްކަތް ކުރަމުން އަންނަ ތަގުވާވެރި ދަރިއެއް، އެއަށްވުރެ ބޮޑު ނިއުމަތެއް ނޯންނާނެ، ﷲ ތައާލާ ދެއްވި އަމާނާތެއް، ސިފަވެސް ދެއްވީ އެކަލާނގެ، ޝައްކުކޮށް ސުވާލު އުފައްދާނެތަނެއް ނެތް،"
ދެން އޮތީ ދެކުދިންނާ ސުވާލު ކުރުމެވެ. ކްރިސްޓިއަން އާއިލާގައި ހުރި ދަރިފުޅު ދިން ޖަވާބު މުސްލިމު ދެމަފިރިންގެ ހިތުގައި ކޫރުމެއް އެޅުވި ވަރަށްވުރެ އަަވަހަށް، އެެދެމަފިރިން ގާތުގައި ބަލައިބޮޑުކުރަމުންދިޔަ ދަރިފުޅުގެ ޖަވާބު އިވިފައި އެކޫރު ފިލައި އުފަލަކަށް ބަދަލުވެގެންދިޔައެވެ.
"އުނހު، އަހަންނެއް ނުދާނަން، އެކަޓު ހެދުންލައިގެން ބުރުގާ އަޅައިގެން އުޅޭ ކަޓު މީހުން ކައިރިއަކަށް، އަހަރެން އުޅޭނީ މޮމް އެންޑް ޑޭޑާއެކު، އެމެދުފަންތީގެ އާއިލާއަކީ މަގޭ އާއިލާއެއް ނޫން، މަށަކީ މުއްސަންޖެއްގެ ދަރިއެއް،"
ކްރިސްޓިއަން ދެމަފިރިންގެ ހިތުގައި ޖެހުނެވެ. އުއްމީދު ކުރިފަދަ ޖަވާބެއް ލިބިދާނެކަމުގެ އުއްމީދުގައި ތިއްބާ އިވުނު އެ ޖަވާބުން އަސަރުތަކެއް ކުރުވި ނަމަވެސް، ކޮންމެ ދީނެއްގެ ބަޔަކަށް ވިޔަސް އެފަދަ ވަގުތުތަކުގައި ކަލާނގެ މިންވަރު ކުރެއްވި ގޮތޭ ހިތަށް އަރާ އުސޫލުން އެމީހުންގެ ހިތަށް ވެސް އެރީ އެފަދަ ބަސްތަކެކެވެ. ތަގުދީރުގައި ލިޔެވިފައިވާ އޮތް ގޮތާމެދު ކުރެވޭނެ ކަމެއް އޮންނާނެހެއްޔެވެ.
"އަޅުގަނޑުގެ މަންމައާއި ބައްޕައަކީ "ބައޮލޮޖިކަލީ" ކޮންމެ ބަޔަކަށް ވިޔަސް ގަދަރު ކުރާނަން، އެކަމަކު ކޯޓުގެ ހުއްދަ އޮތިއްޔާ މަންމައާއި ބައްޕަ ދޫކޮށް އެެއާއިލާއަށް ނުދާނަން، އަޅުގަނޑަށް އަޅުގަނޑުގެ މަންމައާއި ބައްޕައާއި އަޅުގަނޑުގެ ދީން ލޮބުވެތި، ﷲއަށް އުރެދުން އޮތް، އާއިލާއަކަށް ދާން ނޭދެން، އަދި ދާން މަޖުބޫރުކުރިއަސް އިސްލާމްދީން ބަދަލެއް ނުުކުރާނަން،"
ކޮންމެއަކަސް ކޯޓުން ނިންމީ ދެކުދިން ބޭނުންވާ ގޮތަށެވެ. އަދި ދެއާއިލާއަށްވެސް ހަމަހަމައަށް ފައިސާލިބުނެވެ. އަދި އެ ދެކުދިން އެކުދިން ބަލައި ބޮޑުކުރި މައިންބަފައިންނާ އެކު އުޅުމުގެ ހުއްދަވެސް ލިބުނެވެ.
މުސްލިމު ޒުވާނަކާއި ކްރިސްޓިއަން ޒުވާނެއް……ފޮޓޯ: ޝަޓަސްޓޮކް
މި މައްސަލައިގައި ކޯޓުން ނިންމި ނިންމުމާ ގުޅިގެން ޔުލިޔާ ބެލްޔާއެވާ ނަމަކަށް ކިޔާ ކްރިސްޓިއަން މަންމައަކު ބުނެފައިވަނީ ފައިސާއަކުން ދަރިއަކު ގެއްލުމުގެ ވޭން ފިލުވައެއް ނުލެވޭނެ ކަމަށެވެ. އަދި ދުނިޔޭގެ ހުރިހާ ފައިސާއެއް ވެސް ކުއްޖަކު މަންމައަށް ބަލާ ބެލުމަކަށް ނުވާނެ ކަމަށް އޭނާ ބުނެފައިވެއެވެ. މި މައްސަލައިގައި ދެ އާއިލާއަށް ވެސް ލިބުނު ބަދަލަކީ އެ ދެ އާއިލާއަށް ވެސް މިހާތަނަށް ލިބިފައިވާ އެންމެ ބޮޑު އަދަދުގެ ފައިސާ ކަމަށް ބެލެވެއެވެ. އެހެން ނަމަވެސް މި ފައިސާއިން ކުދިން ބަދަލުވުމުގެ ސަބަބުން ލިބުނު ހިތްދަތިކަން ފިލުވައިލެވޭނެ ކަމަކަށް ދެ އާއިލާއިން ވެސް ނުދެކެއެވެ.
މިހާދިސާއިން ލިބިދޭ އިބުރަތް ވިސްނާލުން ކީއްތޯއެވެ. އާއެކެވެ. މުސްލިމު ދެމީހުންގެ ދަރިފުޅު އެމީހުން ނޭދުނު ކަމުގައި ވިޔަސް އެ ހިޔާރު ކުރީ ކްރިސްޓިއަން ދީނާއި އެދިރިއުޅުމެވެ. އަދި ކްރިސްޓިއަން ދެމަފިރިންގެ ދަރިފުޅު އެމީހުންގެ އާއިލާއާ ވަކިން، މުއްސަނދިކަމާއި މޮޅުކަންވެސް ދޫކޮށް، ހިޔާރު ކުރީ އިސްލާމްދީނެވެ. ﷲ ދެއްވި ނިއުމަތެއްކަމުގައި ގަބޫލުކޮށްގްނެނެވެ.