ފެޝަންޑިޒައިންގެ އެންމެ މުހިންމު ރޭ ކަމުގައިވާ މެޓް ގާލާގެ މި އަހަރުގެ ރޭގަނޑުގެ ހުރިހާ އަލިކަމެއް އެއްކޮށްލައިގެން އެތަކެއް ރީތި، ނަލަ ހެދުންތަކުގައި ތިބި މަޝްހޫރު މޮޑެލްތައް ފަހަތަށް ޖައްސާލައި، އެންމެންގެ ސަމާލުކަން ދަމައިގަތީ، 98،000 ސްވަރޯވްސްކީ ކްރިސްޓަލްތަކުން ފުރިހަމަކޮށްފައިވާ ހެދުމެއްގައި ހުރި ކަޅުނަސްލުގެ މޮޑެލް އަނޯކް ޔައި އެވެ. މި ހެދުން މީހުންގެ ސަމާލުކަން ހޯދި މިންވަރު ބުނެދެނީ ގާލާގެ ފަހުން ގިނަ ހާއްސަ ދުވަސްތަކުގައި ކްރިސްޓަލް ހެދުންތަކުގެ ޑިމާންޑު ބޮޑުވެގެންދިޔަ ވަރުންނެވެ.
މިއަހަރުގެ މެޓް ގާލާގެ ތީމަކީ "ދަ ގާޑަން އޮފް ޓައިމް" އެވެ.
މިއަހަރުގެ މެޓް ގާލާގެތެރެއިން
މެއި މަހުގެ ފުރަތަމަ ހޯމަ ދުވަހު ބޭއްވުނު މި ޙަފްލާގައި ހޮލީވުޑް، ފެޝަން، ޕޮލިޓިކްސް، މީޑިއާ އަދި މިއުޒިކް ދާއިރާގެ އެންމެ ފާހަގަކޮށްލެވޭ ތަރިން ބައިވެރިވިއެވެ. ގިނަ މީހުން މާމެލާމުގެ ތީމަށް ހެދުން ލައިގެން އައި ނަމަވެސް، ދެކުނު ސޫދާނުގެ އެމެރިކަން ސުޕަރ މޮޑެލް އަނޯކް ޔައި ގާލާއަށް ދިޔައީ މުޅިން ތަފާތު ގޮތަކަށް ތައްޔާރުވެގެންނެވެ.
އަނޯކް ޔައިގެ ހެދުމަކީ ސްވަރޯވްސްކީން ފަރުމާކޮށްފައިވާ ކްރިސްޓަލްތަކުން ޒީނަތްތެރިކޮށްފައިވާ ހެދުމެކެވެ. މި ހެދުމުގައި ވަނީ ނޫޑް މެޝް ބޭސްއެއްގެ މަތީގައި 98،000 އަށްވުރެ ގިނަ ކްރިސްޓަލް ވަރަށް ފަރުވާތެރިކަމާއެކު ހަރުކޮށްފައެވެ. އޭނާގެ މޭކަޕް ވެސް ވަނީ ހެދުމާ ގުޅޭގޮތަށް ކެޓް އައި ސްޓައިލަށް ކޮށްފައެވެ. އަދި ކުރު އިސްތަށިގަނޑު ވެސް އޮތީ ހެދުމާ ގުޅޭގޮތަށް ހަދާފައެވެ.
އަނޯކްޔައިގެ ވިދަވިދާހުރި 98،000 ކްރިސްޓަލްގެ ހެދުން
އަނޯކް ޔައިގެ ހެދުމުގައި ބޭނުންކޮށްފައިވާ 98،000 ކްރިސްޓަލްތަކާއި 200 ކެރެޓްގެ ގަހަނާތަކުން އޭނާ ވަނީ އެންމެންގެ ސަމާލުކަން ހޯދާފައެވެ. މީގެ އިތުރުން އޭނާގެ ކަރުގައި އޮތް ހާރަށްވެސް މީހުންގެ ސަމާލުކަން ދެވުނެވެ. އެއީ ސްވަރޯވްސްކީގެ "ގެލެކްސީ ކަލެކްޝަނުން 1،050 ލެބޯޓްރީ ގްރޯން ޑައިމަންޑްސް" ބޭނުންކޮށްގެން ހަދާފައިވާ ޖަވާހިރުގެ ހާރެކެވެ.
މި ހެދުމުގެ ސަބަބުން އަނޯކް ޔައި ވަނީ ފެނުޕަރީއެއްގެ ލަގަބު ހޯދާފައެވެ. އަދި އަނެއްބައި މީހުން، "ތިވަރުގެ ފުރިހަމަ ހެދުމެއްގައި، ސްވޯންޕްރިންސަސް ސާދަވިލޭރޭގެ ފުރިހަމަ ހަނދު ފެނުމުން ފެންގަނޑު ތެރޭގައި ކޮޅަށް ތެދުވެ ހުރިހެން ހީވަނީ،" މިހެދުމުގެ ސަބަބުން މިއަހަރުގެ މެޓްގާލާގައި އަނޯލް ޔައި ވަނީ އެންމެންގެ ސަމާލުކަން ހޯދައި، މެޓް ގާލާގެ އެންމެ ފާހަގަކޮށްލެވޭ އެއް ތަރިއަށް ވެފައެވެ.
ގާލާގެ ފަހުން ކްރިސްޓަލްޑްރެސްތަކުގެ ޑިމާންޑު ބޮޑުވެގެންދިޔަ، މިއީވެސް ހަފުލާތަކަށް ތައްޔާރުކުރުވާފައިވާ ކްރިސްޓަލްހެދުންތަކެއް
ކޮންމެއަކަސް މެޓްގާލާގެ ފަހުން ދުވަސްތަކެއްވީއިރުވެސް، އަދިވެސް އަނޯކްޔައިގެ ހެދުމުގެ ވާހަކަ ދެއްކުމެއް ނުހުއްޓުނެވެ. މެއި މަހު ބޭއްވި މިޝޯވ އަށްފަހު މިހާރު އަނޯކްޔައި ގެ ކްރިސްޓަލް ހެދުން މިވަނީ ޓްރެންޑަކަށް ވެެފައެވެ.