ވައްކަމުގެ މައްސަލައެއްގައި ހައްޔަރުކުރަން ދިއުމުން ބޮލުގައި ކަޅު ކޮތަޅެއް އަޅުވައިގެން އަލަމާރީ ތެރެއަށް ވަދެ ފިލާ އޮއްވާ އަތުލައިގެންފިއެވެ.
މި މައްސަލާގައި ހައްޔަރުކޮށްފައިވަނީ ހދ.ކުޅުދުށްފުށީ ސީސަންވިލާ އުމުރުން 33 އަހަރުގެ އާދަމް މުޙައްމަދެވެ.
އޭނާ ހައްޔަރުކޮށް ބަންދާމެދު ގޮތެއް ނިންމުމަށް މިއަދު ކްރިމިނަލް ކޯޓަށް ހާޒިރުކުރުމުން ވަނީ 15 ދުވަހަށް ބަންދުކުރުމަށް އަމުރުކޮށްފައެވެ. ކޯޓު އަމުރުގައިިވާ ގޮތުން އޭނާ ދަންވަރުގެ ވަގުތެއްގައި ގެއަކަށް ވަދެ ވައްކަން ކުރި ކަމަށް ތުހުމަތުކުރެވެއެވެ.
ސީސީޓީވީ ފުޓޭޖުން ފެންނަ ގޮތުން އޭނާ އެ ގެއަށް ވަންނަ މަންޒަރާއި، ގޭތެރޭގައި ހަރަކާތްތެރިވާ ތަން ފެނެއެވެ. އަދި އެ ގެއިން 15,000 އަށްވުރެ އަގުބޮޑު ދެ މޯބައިލް ފޯނު ވަގަށް ނެގިކަމަށް ތުހުމަތުކުރެވޭ ކަމަށް އަމުރުގައި ބުނެފައިވެއެވެ.
ކޯޓު އަމުރެއްގެ ދަށުން އޭނާ ހައްޔަރުކުރަން ފުލުހުން ދިއުމުން، އޭނާ އެ ވަގުތު ހުރި ގޭގެ އަލަމާރިއެއްގެ ތެރެއަށް ވަދެ ބޮލުގައި ކަޅު ކޮތަޅެއް އަޅުވައިގެން ފިލަން މަަސައްކަތް ކުރިކަމަށް ވެސް އަމުރުގައި ފާހަގަކޮށްފައިވެއެވެ.
އޭނާއަކީ ގިނަ އަދަދަކަށް ވައްކަމާއި ފޭރުމުގެ ކުށުގެ ރެކޯޑު އޮންނަ މީހެއްކަން ވެސް އަމުރުގައި ފާހަގަކޮށްފައިވެއެވެ.