ފުރާވަރު އުމުރުގެ ތެރެއިން “ޓީނޭޖް” މިކިޔާ ފުރާވަރު އުމުރަށް އަލިވިލުނު ތަނާހެން، 14 އަހަރުގެ ފިރިހެން ކުއްޖަކު، ލޯބިވެރިޔާ ސަލާމަތްކުރަން ކަމަށް ބުނެ، ފަޅުގައި އަޅާފައި އޮތް ލޯންޗެއްގައި މ. ދިއްގަރުން ފުރައިގެން ހުޅުމާލެއަށް ކުރި ދަތުރުގެ ވާހަކައަކީ ދިވެހި ތާރީހުގައި ވަރަށް ބޮޑު ސިހުމެއް ގެނައި ކަމެކެވެ. 2024 ގެ މޭ 1 ވަނަ ދުވަހު އިވިގެން ދިޔަ އެ ހަބަރަކީ އެދުވަސްކޮޅު އެންމެ ގަދައަށް ދެކެވުނު ވާހަކައެވެ.
ޅަ އުމުރުގެ ކުއްޖަކު، ސްޕީޑް ލޯންޗެއްގައި އެކަނި އެހާ ދިގު ދަތުރެއް ކުރުމަކީ ގިނަ ބަޔަކު ވަރަށް އަންތަރީސްވި ވަރަށް ތަފާތު ކަމެކެވެ. ނަމަވެސް ރާއްޖޭގެ ނޫސްތަކާ ޚަބަރު ފަތުރާ ވަސީލަތްތަކުގައި ނުލިޔެވި ހުއްޓަސް ރާއްޖޭގައި އެފަދަ ކަންކަން މި ނޫނަސް ކޮއްފައި އެބަހުއްޓެވެ.
ހުވަދޫ މީޑިއާއިން މިގެނެސްދެނީ އެފަދަ ހަގީގީ ވާހަކައެކެވެ.
ރާއްޖޭގެ އުތުރު ރަށެއްގައި އުޅުނު އުމުރުން 16 އަހަރުގެ ފިރިހެން ކުއްޖަކު އޭނާ ލޯބީގެ ގޮތުން ގުޅިގެން އުޅުނު އަންހެން ކުއްޖާ އޭނާ ދޫކޮށް ދިޔުމުން އެކަމުގެ އަސަރުގައި ކަންކުރި ގޮތުގެ ވާހަކައެވެ.
އައްސަދު(އަސްލު ނަމެއް ނޫން) ޒީނިއާ (އަސްލު ނަމެއް ނޫން) އާ ލޯބީގެ ގުޅުމެއް އޮންނަކަން އައްސަދުގެ މައިންބަފައިންނަށް އެނގުމުން އެކަން ހުއްޓާލުމަށް އޭނާ ގާތު ބުނެއެވެ. ތިޔަފަދަ ކަމެއް ކުރުމަށް އަދި މާ ޅަ ކަމަށް ބުނެ ނަސޭހަތް ދެއެވެ.
މައިންބަފައިންގެ އެ ނިންމުން އެއީ އައްސަދުގެ ހިތަށް ކެތްވާ ވަރުގެ ކަމަކަށް ނުވިއެވެ. އެރަށުން މި ވާހަކަ ކިޔައިދިން މީހުން ބުނީ އުމުރުން ޅަ ވިޔަސް އައްސަދުގެ ހިތް ވަނީ ޒީނިއާއަށް ވަރަށް ބޮޑަށް ދެވިފައި ކަމަށާއި ބޭނުންވީ ސީދާ ކައިވެނި ކުރަން ކަމަށެވެ.
އައްސަދަށް ވުރެ އެއް އަހަރު ހަގު ޒީނިއާގެ މައިންބަފައިންވެސް އައްސަދަށް ދިން ނަސޭހަތް ޒީނިއާއަށް ދިނެވެ. އަދި މައިންބަފައިންގެ އެ ނަސޭހަތް އަޑު އަހައި ލޯބިވާ އައްސަދާ ވަކިވާން ޒީނިއާ ނިންމިއެވެ.
އޭގެ އެއް ދުވަސް ފަހެވެ. އިރު އެރި ތަނާހެން އައްސަދު ވީތަނެއް ނޭގިގެން އާއިލާ އިން ހޯދަން ފަށައިފިއެވެ. ޢާއިލީ ހުރިހާ ގެއެއް ބަލައިފިއެވެ. ދަންނަ އެންމެން ކައިރިން އައްސަދުގެ އެއްވެސް ހަބަރެއް ހިލަމެއްވީތޯވެސް އަހައިފިއެވެ.
ނަމަވެސް އެއްވެސް މީހަކަށް އައްސަދުގެ ހަބަރެއް ނުވެއެވެ. އެންމެ ފަހުން މުޅި ރަށު ރައްޔިތުން ނުކުމެ އައްސަދު ފެނޭތޯ ހޯދަން ފަށައިފިއެވެ. ފަޅުތެރެއާއި ރަށުގެ ހޭޅި ފަށަށް ދާންދެން ބަލައިފިއެވެ. ނަމަވެސް އައްސަދު ނުފެނުނެވެ.
އުމުރުން އެންމެ 16 އަހަރުގެ އައްސަދު ގެއްލުނީ ކަމަށް ދެކި ރަށުގެ ރައްޔިތުންގެގެ ކަންބޮޑުވުން އިންތިހާއަށް ދިޔައެވެ.
ދުވާލު އިރު އެރުމުން ދެން ރައްޔިތުން މިސްރާބު ޖެހީ ކައިރީގައި ތިބި ފަޅު ރަށްތަކާއި މީހުން އުޅޭ ރަށް ތަކަށް ދިއުމަށެވެ.
އެހެންކަމުން ފަޅުގައި ތިބި ދޯނި ފަހަރަށް އެރުމަށް ފިރިހެން ވެރިން ދިޔައެވެ. އެ ވަގުތު އެއްމެންނަށް ފާހަނގަވީ އެތަނުން އެއް ދޯނި ނެތް ކަމެވެ. ނަމަވެސް ކުޑަ ކުޑަ އައްސަދު އެކަނި ބޮޑު މަސް ދޯންޏެއްގައި ފުރައިގެން ހިގައިދާނެ ކަމަކަށް އެއްވެސް މީހަކު ގަބޫލެއް ނުކުރިއެވެ.
އެހެންކަމުން ދޯނި ހޯދުމާއި އައްސަދު ފެނޭތޯ، އެއް މަސައްކަތަކަށް ހަދައި އެކި މިސްރާބައް ފަޅުގައި ހުރި ހުރިހާ ދޯންޏަކުން ދަތުރު ފެށި އެވެ.
މާދުރަށް ނުދެވެނީސް ޖެހިގެން އޮތް ރަށުގެ ފަޅު ތެރެއިން ގެއްލިގެން އުޅުނު ދޯނި ފެނުނެވެ. އެރަށަކީ މީހުން ދިރިއުޅޭ ރަށެކެވެ. އެހެންކަމުން ފުރަތަމަ ބެލީ އެ ރަށުގައި އައްސަދު ހުރިތޯއެވެ. މީހުން ދިރިއުޅޭ ހިސާބުން ނުފެނުމުން ދެން ދިޔައީ ރަށުގެ ވަލުތެރެއަށެވެ. ވަރަށް ގިނަ އިރު ވަންދެން އެ ސަރަހައްދު ބެލި އިރުވެސް އައްސަދުގެ އެއްވެސް ޚަބަރެއް ނުވިއެވެ.
ރައްޔިތުންނާއި އާއިލާގެ ގޮތް ހުސްވި އެވެ. އެވަޤުތު އެތަނުން މީހަކު ރަނގަޅު ބުއްދިއެއް ދިނެވެ.
“މިހާ ގިނަ މީހުން އެއްފަހަރާ އައީމާ ފަހަރެއްގައި އަހަރެމެންނަށް ނުބެލޭ ތަނެއްގައި ބިރުން ފިލައި ހުރެ ދާނެ. ގަހެއްގައިވެސް ވެދާނެ. މަރުވީ ކަމަކަށް އަހަރެންގެ ހިތެއް ނުބުނޭ،”
މިހެން ބުނެފައި ދިން ހިޔާލަކީ ބިރުވެރި ވާހަކަ އާއި ވަލުތެރޭގައި ޖިންނިޝައިތާނުން އުޅޭނެޔޭ، ކާލާ ފާނެޔޭ ކިޔާ ހަޅޭލެވުމަށެވެ. އެއީ ބުއްދިވެރި ހިޔާލެއް ކަމަށް ބުނެ އެންމެން އެކަން ކުރަން ފަށައިފިއެވެ.
ބުއްދިވެރިޔާގެ އެ ހިޔާލު ވަރަށް ކާމިޔާބެވެ. ވަލުތެރޭގައި ހުރި ބިޔަ ގަހަކުން އެއޮއް ފައިބަނީ އައްސަދު އެވެ. ބިރުން ތުރު އަޅާ ހާލުގައެވެ.
އުފަލުން އެންމެން ގޮސް ވީ ކިހިނެއްތޯ ސުވާލު ކުރުމުން ބުނީ “ޒީނިއާ އާއި ވަކިވުން އެއީ ހިތަށް ކުޅަދާނަ ވާނެ ކަމެއް ނޫން. އެހެންވެ ރަށް ދޫކޮށް އެންމެންނާ ވަކިވީ. ދޯނިން އައީ ފަތިހު. އައީ ވެސް އެކަނި” ކަމަށެވެ.
މިއީ މީގެ 24 އަހަރު ކުރިން ރާއްޖޭގައި ހިންގި ކަމެކެވެ. ހަދިސާ ލިޔެފައި ވަނީ އެރަށުގެ އެކި މީހުން ކިޔައިދިން ގޮތަށެވެ.