މީޑިއާގެ ވަސީލަތްތަކުގައި ކުޑަކުދިންގެ މައުލޫމާތު ޢާންމުކުރާއިރު ކުއްޖާގެ ކަރާމަތާއި ރައްކާތެރިކަމަށް އުނިކަން އަންނަ ފަދަ މަޢުލޫމާތާއި ތަސްވީރުތައް އާންމު ކުރަމުން ގެންދާ ކަމަށާއި، ކުދިންގެ ކަރާމަތަށް އުނިކަން އަންނަ ފަދަ ގޮތަކަށް ފޯޓޯ އާއި ވިޑިއޯ އާންމު ނުކުރުމަށް ޗިލްޑްރަންސް އޮމްބަޑްސްޕާރސަންގެ އޮފީހުން އެދިއްޖެއެވެ.
އެ އޮފީހުން ބުނީ ކުޑަކުދިންގެ ހައްގުތައް ރައްކާކުރުމުގެ ގާނޫނުގެ ބަޔާން ކޮށްފައިވާ މިންވަރާއި ޙިލާފަށް ރާއްޖޭގައި ރަޖިސްޓްރީ ކޮށްގެން ހިންގާ މީޑިއާތަކާއި އަދި މިނޫންވެސް އެހެން މީޑިއާތަކުގެ ވަސީލަތްތައް ނުވަތަ މަންސަތަކުގައި ކުޑަކުދިންގެ ކަރާމަތަށް އުނިކަން އަންނަފަދަ މައުލުމާތު އާންމުކުރަމުންދާތީ ކަންބޮޑުވާ ކަމަށެވެ. އަދި މިއީ އދ. ކުޑަކުދިންގެ ހައްގުތައް ރައްކާތެރިކުރުމާބެހޭ މުއާހަދާގައި ނަފްސާނި ގޮތުންނާއި ޖިސްމާނީ ގޮތުން ގެއްލުން ލިބިދާނެ ހުރިހާކަމަކުން ކުއްޖާ ރައްކާތެރިކޮށް ދިނުމާއެކު އަދި އެކަމަގެ ޒިންމާއެއް ގޮތުގައި ހިމްނާފައިވާ ކަންކަންވެސް ކަމުގައެވެ.
ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގެ 33 ވަނަ މާއްދާގައި ކުޑަކުދިންގެ ކަރާމަތަށް އުނިކަން އަންނަގޮތަށް ޒާތީ މައުލޫމާތާއި އެއްވެސް ފަރާތަކުން އާންމުކޮށްގެން ވެސް ނުވާނެ ކަމަށާއި، ކަން މިހެން އޮތް ނަމަވެސް ކުއްޖާގެ ކަރާމަތާއި ރައްކާތެރިކަމަށް އުނިކަމެއް އަތުވެދާނެފަދަ ކަމެއް އާންމުކުރުމަކީ ކުދިންގެ މަސްލަހަތު ރައްކާތެރިނުކުރެވި ކުއްޖާ އަނިޔައަށް އަދި ނުރައްކަލަކަށް ނުވަތަ ގޯނާއަކަށް ހުށަހެޅިދާނެ ކަމުގެ ހެއްކެކަމަށެވެ.
ކުއްޖެއްގެ މައްޗަށް ކުށެއް ތުހުމަތުވާނަމަ ކުދިންނާއި ކުށުގެ ޝިކާރައަކަށް ވެފައިވާ ކުދިންނާއި އެނޫންވެސް ސަބަބުތަކަށްޓަކާ އަޅާލުމާއި ރައްކާތެރިކަން ބޭނުންވާ ކުދިންގެ މައުލޫމާތު އާންމުކުރުމަށް ޗިލްޑްރަންސް އޮމްބަޑްސްޕާރސަންގެ ހުއްދަކުރާ މިންވަރު ބަޔާން ކުރާ އުސޫލާ ހިލާފަށް ސީދާ ގޮތުންނާއި ނުސީދާ ގޮތުން ނަމަވެސް ކުދިންގެ ޒާތީ މައުލޫމާތު އެއްވެސް މިޑިއާއަކުން އާންމު ކޮށްފިކަން އެ އޮފީހަށް އަތުވެއްޖެނަމަ އެފަރާތުން އެ އުސޫލުގައި ބަޔާންކޮށްފައިވާ މިންގަޑުތަކުގެ ދަށުން ފިޔަވަޅު އެޅޭނެ ކަމަށް ވެސް ބުނެފައި ވެއެވެ.
ކުޑަކުދިން ގެ ހައްގުތަކާ ގުޅިގެން އެކުލަވާލާފައިވާ އެންމެހާ މުއާހަދާތަކާއި ގާނޫނުތަކުގެ މައިގަނޑު އަމާޒަކި ކުއްޖާގެ މަސްލަހަތަށް އެންމެ މަތީ ދަރަޖައެއްގައި އިސްކަންދިނުމާއި އެކުދިން އަނިޔާއާއި ގޯނާއި ރައްކާތެރިކޮށް ލިބިދިނުން ކަމުގައިވެސް ބުނެއެވެ.
އަދި ވަކިން ޙާއްސަކޮށް ދިވެހި ރާއްޖޭގެ މަސައްކަތްކުރާ މީޑިއާތައް އަދި އެނޫންވެސް ފަރާތްތަކުން އެކުދިންނަށް ލިބިދޭނެޖެހޭ އެންމެހާ ހައްގުތަކާއި ރައްކާތެރިކަން ކަށަވަރުކޮށްދިނުމުގައި ދެމިތިބެންޖެހޭ ކަމަށާއި، އަދި ކޮންމެ ހާލަތެއްގައިވެސް މީޑިއާތަކާއި މުއައްސަސާތަކާއި މުޅި މުޖުތަމައުއާއި ކުދިންގެ ރައްކާތެރިކަން އިސްކުރައްވައި އެކުދިންގެ މަސްލަހަތު ހިމާޔަތްކޮށް ހައްގުތައް ކަށަވަރުކޮށްދިނުމުގައި މަސައްކަތްކުރަންޖެހޭ ކަމަށެވެ. އެކަން ހާސިލްކުރުމުގައި އެއްބާރުލުން ދެއްވުމަށްވެސް ޗިލްޑްރަންސް އޮމްބަޑްސްޕާރސަންގެ އޮފީހުން ވަނީ އެދިފައެވެ.