ގއ ނިލަންދޫ ކައުންސިލުން އިންތިޒާމްކޮށްގެން ބާއްވާ " ރާވެރިޔާ ވޮލީ މުބާރާތް 2024 " އަންހެން ޑިވިޝަންގެ ނުވަވަނަ ވަނަ މެޗުގައި ނިލަންދޫ ޓޮޕް ބްރަދާސް އަދި ގއ މާމެންދޫ އަންހެން ވޮލީޓީމް ވާދަކުރި މެޗު ޓޮޕް ބްރަދާސް އިން ކާމިޔާބު ކޮށްފިއެވެ.
ގއ ނިލަންދޫ ރަސްމީ ވޮލީކޯޓުގައި ކުރިއަށްދިޔަ މި މެޗް ޓޮޕް ބްރަދާސް އިން ކާކިޔާބު 3/1 ސެޓުންނެވެ. މި މެޗުން މޮޅުވުމާއި އެކު ގްރޫޕް ބީ ގައި ކުޅުނު ހުރިހާ މެޗެއް ކާމިޔާބުކޮށް އެއްވަނަ ޓީމްގެ ގޮތުގައި ޓޮޕް ބްރަދާސްއިން ވަނީ ސެމީގެ ޖާގަ ކަށަވަރުކޮށްފައެވެ.
ސެމީގެ ޖާގަ ކަށަވަރުކުރުމަށް މަޖުބޫރު މެޗުގައި މާމެންދޫ ޓީމްގެ ފަރާތުން ވާދަވެރި ކުޅުމެއް ފެނިގެން ގޮސްފައިވެއެވެ. އަދި ފުރަތަމަ ސެޓުގައި ގާތްގާތުގައި ދެޓީމްއަށް ވެސް ޕޮއިންޓް ލިބިފައިވެއެވެ. އެހެން ނަމަވެސް ސެޓުގެ ފަހުކޮޅު ޓޮޕް ބްރަދާސް އިން ވަނީ ރަނގަޅު ނިންމުންތަކެއް ނިންމާފައެވެ. ފުރަތަމަ ސެޓު 25/23 އިން ކާމިޔާބު ކުރީ ޓޮޕް ބްރަދާސް އެވެ.
މެޗުގެ ދެވަނަ ސެޓުގައި ޓޮޕް ބްރަދާސް އިން ވަނީ މޮޅު ކުޅުމެއް ދައްކާފައެވެ. އަދި މި ސެޓު 25/17 އިން ކާމިޔާބު ކުރިއެވެ.
އެހެންނަމަވެސް މެޗުގެ 3 ވަނަ ސެޓު ފެނިގެން ދިޔައީ މާމެންދޫއިން އިތުބާރާއި އެކު ކުޅެމުން ދިޔަ ތަނެވެ. ރަނގަޅު ނިންމުންތަކެއް ނިންމައި 25/17 އިން މާމެންދޫއިން ސެޓު ގެންދިޔަ އެވެ.
މި ސެޓު ނެގުމުން މި ގުރޫޕުން ސެމީގެ ދެވަނަ ޖާގަ ކަށަވަރުވި ޓީމަކީ މާމެންދޫއެވެ.
ހަތަރު ވަނަސެޓު ޓޮޕް ބްރަދާސް އިން ކާމިޔާބު ކުރީ 25/14 އިންނެވެ.
ސެމީފައިނަލް ގައި މާމެންދޫ ވާދަކުރަން ޖެހޭނީ ގއ ގެމަނަފުށީ ވޮލީ ކުލަބާއި އެވެ. އަދި ޓޮޕް ބްރަދާސް ވާދަކުރަން ޖެހޭނީ ބޮންބޮން ސްޕޯޓްސް ކުލަބާއިއެވެ.
މެޗުގެ މޮޅު ކުޅުންތެރިޔަކަށް ހޮވިފައިވަނީ ޓޮޕް ބްރަދާސްގެ ޖާޒީ ނަންބަރު 12 މަރިޔަމް ޝިޒާނާއެވެ. މިއީ މި ކުޅުންތެރިޔާ ނެގި 3 ވަނަ ކުއީން އޮފް ދަ މެޗެވެ.
މުބާރާތުގައި މިރޭ ގއ ވިލިނގިލީ ކެޕިޓަލް ސިޓީ އަދި ގއ ކަނޑުހުޅުދޫ ފިރިހެން ވޮލީ ޓީމް ވާދަކުރާނެއެވެ. މި މެޗުން މޮޅުވާ ޓީމަކަށް އެގުރޫޕުން ސެމީ ފައިނަލްގެ ޖާގަ ކަށަވަރުވާ ޓީމް ޔަގީން ވެގެންދާނެއެވެ.
2022 މި މުބާރާތުގައި ޖުމްލަ 11 ޓީމް ބައިވެރިވިއެވެ. އެއީ ފިރިހެން 4 ޓީމްގެ އިތުރުން އަންހެން 7 ޓީމެވެ. 2023 ވަނަ އަހަރު މުބާރާތުގައި 13 ޓީމްއަކުން ބައިވެރިވި އިރު އަންހެން 6 ޓީމް އަދި ފިރިހެން 7 ޓީމް ބައިވެރިވެފައިވެއެވެ. މިދިޔަ އަހަރުގެ އަންހެން ޑިވިޝަންގެ ޗެމްޕިއަނުންނަކީ ކަނޑުހުޅުދޫ އަންހެން ވޮލީބޯލަ ޓީމެވެ. ފިރިހެން ޗެމްޕިއަނުންނަކީ ބޮން ބޮން ސްޕޯޓްސް ކުލަބެވެ.
2022 ވަނަ އަހަރު މިމުބާރާތުގެ ފިރިހެން ޑިވިޝަން ޗެމްޕިއަންކަން ބޮން ބޮން ސްޕޯޓްސް ކުލަބު ހޯދިއިރު އަންހެން ޑިވިޝަން ޗެމްޕިއަން ޓީމަކީ ގެމަނަފުށި ވޮލީބޯލަ ޓީމެވެ.
މިމުބާރާތް ކުރިޔަށް ގެންދިޔުމަށް ހަމަޖެހިފައިވަނީ އަންހެން އަދި ފިރިހެން ދެ ޑިވިޝަނަށް ބަހާލައިގެންނެވެ. އަދި ކޮންމެ ޑިވިޝަނެއްގެ ޗެމްޕިއަން ޓީމަށް 20,000/- (ވިހިހާސް) ރުފިޔާގެ އަދި ކޮންމެ ޑިވިޝަނެއްގެ ރަނަރަޕް ޓީމަށް 10,000 (ދިހަހާސް) ރުފިޔާގެ ފައިސާގެ އިނާމް ދިނުމަށްވަނީ ހަމަޖެހިފައެވެ.