ޒަކާތު މަހާސިންތާއިން ލިބުނު މައުލޫމާތުގެ އަލީގައި ރާއްޖޭގެ ޒަކާތުގެ ނިޒާމު ހަރުދަނާ ކުރުމަށް މުހިއްމު މަސައްކަތްތަކެއް ކުރައްވާނެ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
އިސްލާމީ ކަންތައްތަކާ ބެހޭ ވަޒީރު ޑރ. ޝަހީމު މިފަދައިން ވިދާޅުވެފައި ވަނީ ރާއްޖޭގައި ބޭއްވުނު ފުރަތަމަ ޒަކާތު މަހާސިންތާ ނިންމުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ. އެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ މިފަދަ މަހާސިންތާއެއް ބޭއްވުމުގެ މުހިއްމުކަން ބައެއް މީހުންނަށް ވަޒަން ނުކުރެވުނު ނަމަވެސް، މިއީ ދެމެހެއްޓެނިވި ގޮތުގައި ދާއިރާ ތަރައްގީކުރުމަށް ކޮންމެހެން ކުރަންޖެހޭ ކަމެއް ކަމަށެވެ.
“ބައެއް ފަރާތްތަކަށް ބޭކާރުކަމެއްގެ ގޮތުގައި ދެކުނުނަމަވެސް، މިފަދަ މަހާސިންތާތަކަކީ އަދި ބައްދަލުވުންތަކުގައި ކުރެވޭ މަޝްވަރާތަކަކީ މުހިއްމު މަޝްވަރާތަކެއް. އަދި މިމަހާސިންތާގައި ލިބިގެންދިޔަ މަޢުލޫމާތުގެ އަލީގައި ރާއްޖޭގެ ޒަކާތުގެ ނިޒާމު މިހާރަށްވުރެ ހަރުދަނާކުރުމަށް މަސައްކަތްކުރާނެކަމުގެ ޔަގީންކަން އަޅުގަނޑުދެން.” ވަޒީރު ޑރ ޝަހީމު ވިދާޅުވިއެވެ.
ރާއްޖޭގައި ބޭއްވި ފުރަތަމަ ޒަކާތު މަހާސިންތާގައި ރާއްޖޭގެ އެކި މުއައްސަސާތަކާއި، މެލޭޝިޔާގެ ބައެއް މުއައްސަސާތަކުން ވަނީ ބައިވެރިވެފައެވެ. މަހާސިންތާގެ ޕެނެލިސްޓުންގެ ގޮތުގައި ރާއްޖޭގެ މަޝްހޫރު ދީނީ އިލްމުވެރިންނާއި، އިސްލާމިކް ފައިނޭންސާއި އިގުތިސާދީ ދާއިރާގެ މާހިރުން ބައިވެރިވެވަޑައިގެންނެވިއެވެ.
އެއް ދުވަހުގެ މުއްދަތަށް ކުރިއަށް ގެންދެވުނު މި މަހާސިންތާގައި ޒަކާތާ ގުޅުންހުރި މުހިއްމު މައުޟޫތަކަށް އަލިއަޅުވާލެވުނެވެ. އޭގެ ތެރޭގައި ޒަމާނާއެކު ބަދަލުނުވާނެ ޝަރީއަތުގެ އުސޫލުތަކާއި، މި ދާއިރާއިން ޒަމާނީ ގޮތުން ކުރިމަތިވަމުންދާ ގޮންޖެހުންތައް ދެނެގަތުމަށް ދިރާސާކުރުމުގެ މުހިއްމުކަމާއި، ޙާލަތްތަކާ ގުޅިގެން ޒަކާތް ތަރައްޤީކުރުމުގެ މުހިއްމުކަން ހިމެނެއެވެ.
މީގެ އިތުރުން، ޒަކާތުގެ ބެހެނިވެރިންގެ މަފްހޫމް ފުޅާކުރުމާއި، ޒަކާތު ފަންޑު ގުނަކުރުމާއި، ޒަކާތުގެ ބެހެނިވެރިން މާލީގޮތުން ބާރުވެރި ކުރުވުމުގެ މުހިއްމުކަމާއި، ގާނޫނީ ގޮތުން ގެންނަން ޖެހޭ ބަދަލު ތަކާއި، ޒަކާތުގެ ދާއިރާ ހަރުދަނާ ކުރުމަށް ޒަމާނީ އީޖާދުތަކުގެ ބޭނުން ކުރުމާ ގުޅޭ ގޮތުން ވެސް މަޝްވަރާ ކުރެވުނެވެ.
މި މަހާސިންތާގައި ރާއްޖޭގެ ޒަކާތުގެ ދާއިރާ ހަރުދަނާ ކުރުމަށް ކުރެވިދާނެ ކަންކަމުގެ ގޮތުގައި ބައިވެރިން ވަނީ 24 ކަމެއް ފާހަގަކޮށް މޯލްޑިވްސް ޒަކާތު ހައުސްއަށް ހުށައަޅާފައެވެ.