މަކަރާއި ހީލަތުން ފައިސާތަކެއް ހޯދި މައްސަލައެއްގައި ފުލުހެއްގެ ބައިވެރިވުން އޮތްކަމަށް ބުނެ ފަތުރަމުން ދަނީ ހަގީގަތާއި ހިލާފު ވާހަކަތަކެއްކަމަށް ދިވެހި ފުލުހުންގެ ހިދުމަތުން ހާމަކޮށްފިއެވެ.
ދިވެހި ފުލުހުންގެ ހިދުމަތުން ނެރުނު ބަޔާނުގައި ބުނެފައި ވަނީ މި މައްސަލައަކީ މި މަހުގެ 26 ވަނަ ދުވަހު އެ މުއައްސަސާއަށް ހުށަހަޅާފައިވާ މައްސަލައެއްކަމަށެވެ. މި މައްސަލާގައި މީހެއްގެ ވައިބަރ އެކައުންޓް ހެކް ކޮށްގެން އެމީހާ ދަންނަ މީހުންނަށް މެސެޖުކޮށް އޮޅުވާލައިގެން ފައިސާ ހޯދާފައިވާ ކަމަށް ފުލުހުން ވަނީ ބުނެފައެވެ.
ފުލުހުން ބުނީ މި މައްސަލަ ހުށަހެޅުމާއެކު ތަހުގީގުގެ ތެރެއިން އަޅަން ޖެހޭ ފިޔަވަޅުތައް އަޅައި ވައިބަރ އެކައުންޓް ރިކަވަރކޮށް ވެރިފަރާތާ ހަވާލުކޮށްފައިވާ ކަމަށެވެ. އަދި ތަފާތު 3 މީހެއްގެ އަތުން އޮޅުވާލައިގެން ހޯދާފައިވާ 10,100 ރުފިޔާ ހެކް ކޮށްފައިވާ އެކައުންޓަކަށް ކުށް ކުރި މީހުން ޖަމާ ކޮށްފައިވާ ކަމަށް ވެސް ފުލުހުން ބުނެފައިވެއެވެ.
"މި ކުށްކުރުމުގައި ފުލުހެއްގެ ބައިވެރިވުމެއް ނުވަތަ ފުލުހެއްގެ ފަރާތުން ތުހުމަތު ކުރެވޭނެ އެއްވެސް ކަމެއް ފާހަގަކުރެވިފައި ނުވޭ،" ފުލުހުން ބުނެފައިވެއެވެ. "މި މައްސަލާގައި ފައިސާ ދައުރު ކުރުމަށް ބޭނުންކުރި އެއް އެކައުންޓަކީ ފުލުހަކާ ކައިވެނިކޮށްގެން އުޅޭ މީހެއްގެ އެކައުންޓެއްނަމަވެސް، އެ އެކައުންޓަކީވެސް ހެކްކޮށްގެން އެހެން ބައެއްގެ ބާރުގެ ދަށަށް ގެންގޮސްފައިވާ އެކައުންޓެއްކަން ތަހުގީގަށް ހާމަވެފައިވޭ."
ފުލުހުންގެ އިކޮނޮމިކް ކްރައިމް ޑިޕާޓްމަންޓުން މި މައްސަލަ ބަލަމުންގެންދާއިރު، ހިމެނޭ ފައިސާގެ ތެރެއިން ނުހޯދި ހުރި ފައިސާ ހޯދުމުގެ މަސައްކަތް ކުރަމުންދާ ކަމަ ށްވެސް ދިވެހި ފުލުހުންގެ ހިދުމަތުން ވަނީ ބުނެފައެވެ.
ފުލުހުން ބުނީ މި މައްސަލައިގެ ތަހުގީގުގެ އެއްވެސް ހިސާބަކުން ފުލުހެއްގެ ބައިވެރިވުން ފާހަގަ ކުރެވިއްޖެނަމަ އެ ފުލުހެއްގެ މައްސަލަ ބަލާނެ ކަމަށެވެ. އެހެންކަމުން ދިވެހި ފުލުހުންގެ ހިދުމަތުގެ ނަން ކިލަނބުވާގޮތަށް މީޑިއާގެ އެކި ވަސީލަތްތަކުގައި މައުލޫމާތު ނުފެތުރުމަށް އެ އިދާރާއިން ވަނީ އިލްތިމާސް ކޮށްފައެވެ.