ގާނޫނުއަސާސީގެ ދިފާއުގައި ކުރުމުގެ ނަމުގައި އެމްޑީޕީން ރާވަމުންދަނީ ގައުމު ހަލަބޮލިކޮށް ދިވެހީންގެ ވެރިކަން ވައްޓައިލުމަށް ކަމަށް މާލޭގެ ޑެޕިއުޓީ މޭޔަރު އަޙްމަދު ނަރީޝް މިރޭ ވިދާޅުވެއްޖެއެވެ.
ނަރީޝް މިހެން ވިދާޅުވީ ”ގާނޫނުއަސާސީގެ ދިފާއުގައި ރައްޔިތުން” މި ނަމުގައި އެމްޑީޕީން ޖަލްސާއެއް ބާއްވަން ތައްޔާރުވަމުން އަންނާތީއެވެ. މި ޖަލްސާ ބާއްވަން ނިންމާފައިވަނީ އަންނަ މަހުގެ 10 ވަނަ ދުވަހު ކާނިވާ ސަރަހައްދުގައެވެ.
އެގޮތުން އެކްސްގައި ކުރެއްވި ޕޯސްޓެއްގައި ނަރީޝް ވަނީ ގާނޫނުއަސާސީގެ މައްޗަށް ފައިން އެރި ބަޔަކަށް ހިމާޔަތް ކުރެވޭނީ ކޮން ގާނޫނުއަސާސީއެއްތޯ ސުވާލުކުރައްވައިފައެވެ.
ނަރީޝްގެ ޕޯސްޓުގައިވަނީ އެމްޑީޕީގެ ވެރިކަމުގައި ދިވެހީންގެ ގާނޫނުއަސާސީގައި ލިޔެފައިވާ ދިވެހީންގެ މިނިވަންކަމާއި ސިޔާދާއި، ދިވެހީންގެ ދީން ކަމުގައިވާ އިސްލާމްދީނުގެ ހުރުމަތް ކެނޑުމަށް މަސައްކަތް ކުރިކަން ފާހަގަކުރައްވާފައެވެ. އަދި ދިވެހީންގެ ސަރަހައްދު ކަމުގައި އެ ގާނޫނުއަސާސީގައި ބުނެފައިވާ ސަރަހައްދުން ބައެއް ބޭރުގެ ބަޔަކަށް ވިއްކާލަން މަސައްކަތް ކުރިކަމާއި، ދިވެހީންގެ ދިވެހި ވަންތަކަން ނަގާލައި އަމިއްލަ ގައުމުގައި ދެވަނަ ދަރަޖައިގެ ރައްޔިތުންނަށް އެ ރައްޔިތުން ހަދަން މަސައްކަތް ކުރިކަން ވެސް ފާހަގަކުރައްވާފައެވެ.
އެ ކަންކަން ދިވެހީން ހަނދާނަކުން ފިލާ ދާހައި ދުވަހެއް އަދި ނުވާ ކަމަށް ނަރީޝް ވިދާޅުވިއެވެ.
ނަމުގައި ގާނޫނުއަސާސީގެ ދިފާއުގައި، ކަމުގައި ދިވެހީންގެ ވެރިކަން ވައްޓާލާ ގައުމު ހަލަބޮލި ކުރަން ޖަހަން ތިޔަ ރާވާ ސަކަރާތް ރައްޔިތުންނަށް މިއަދު މާ ސާފު!
ޕޯސްޓު ނިންމަވާލައްވަމުން ނަރީޝް ވިދާޅުވީ ދިވެހީންނަކީ ސުލްހަ މަސަލަސްކަމާއި އަމާން ކަމަށް ލޯބިކުރާ ބައެއް ކަމަށެވެ.