ފާއިތުވި އެއްވެސް ސަރުކާރަކުން މަސްވެރިކަމަށް ނުކުރާހާ އިންވެސްޓްތައް މި ސަރުކާރުން މަސްވެރިކަމުގެ ދާއިރާއަށް ކުރަމުންދާ ކަމަށް ޙަސަން ސާޖިން ބުނެފިއެވެ.
ޒުވާން މަސްވެރިޔާގެ ނަމުން މަޝްހޫރުވެފައިވާ ޙަސަން ސާޖިން މިކަން ފާހަގަކުރީ ސޯޝަލްމީޑިއާގައި މިއަދު އޭނާ އާންމުކުރި ވީޑިއޯއެއްގައެވެ.
އެ ވީޑިއޯގައި އޭނާ ވަނީ މިދިޔަ ސަރުކާރުތަކުގައި މަސްވެރިކަމުގެ ސިނާއަތް އޮތް ގޮތާއި، މިހާރު އެ ސިނާއަތް ތަރައްގީވަމުންދާ ގޮތުގެ މައްޗަށް އަލިއަޅުވައިލައި ވާހަކަ ދައްކާފައެވެ.
ރާއްޖޭގެ މަސްވެރިކަމުގެ ހާލަތު ބަލައި، ތަޖުރިބާ ކުރުމުގެ އިތުރުން ރަށްރަށުގެ ދިރިއުޅުމުގެ ވައްޓަފާޅިޔާއި އާދަކާދަތަކާއި، އާމްދަނީ ހޯދުމަށް ކުރާ މަސައްކަތްތަކާއި، މުހިންމު ތަރިކައާއި، ހާއްސަ މީހުންނާއި ހާއްސަ ކެއުންތައް ހިމެނޭހެން ރާއްޖޭގެ މީހުން ދިރިއުޅޭ ހުރިހާ ރަށެއްގެ މައުލޫމާތު އެއްކުރުމަށް ޒުވާން މަސްވެރިޔާ ސާޖިން ވަނީ "ރާއްޖޭގެ އުތުރުން ދެކުނަށް" ދަތުރެއް ފަށާފައެވެ.
2023 ވަނަ އަހަރުގެ ޖަނަވަރީ މަހު ފެށި އެ ދަތުރުގައި މިހާރު ވަނީ ރާއްޖޭގެ އެންމެ އުތުރުގެ ތިން އަތޮޅުގެ މީހުން ދިރިއުޅޭ 40 ރަށަށް ޒިޔާރަތްކޮށްފައެވެ.
އެ ދަތުރުތަކުން ލިބުނު މައުލޫމާތުގެ މައްޗަށް އަލިއަޅުވައިލައި ވާހަކަ ދައްކަމުން ސާޖިން ބުނީ ތިލަދުންމަތީގައި މިހާރު މަސްވެރިކަމަށް ނިކުންނަނީ 54 އޮޑި ކަމަށާއި، ނަމަވެސް ފާއިތުވި 80 ވަރަކަށް އަހަރަށް ބަލާއިރު، އެ އަހަރުތަކުގައި 471 މަސްއޮޑި ދުއްވާފައިވާ ކަމަށެވެ.
ދުވަހެއް ދުވަހަކަށް ތިލަދުންމަތީގެ މަސްވެރިކަން ފަނޑުވަމުން އައި އެންމެ ބޮޑު އެއް ސަބަބަކަށްވެގެންދިޔައީ އެތަނުގައި މަސްކިރޭނެ ގޮތެއް ނެތުމުންކަން ސާޖިން ފާހަގަކުރިއެވެ.
ސާޖިން "އުތުރުން ދެކުނަށް" ކުރާ ދަތުރުގައި ތަކަންދުއަށް ޒިޔާރަތްކޮށް އެ ރަށުގެ ދުވަސްވީ ބަޔަކާ ވާހަކަ ދައްކަނީ. ފޮޓޯ: ޒުވާން މަސްވެރިޔާ ޑޮޓް ކޮމް
މީގެއިތުރުން މަސްވެރިކަމުގެ ސިނާއަތަށް މިދިޔަ ފަސް އަހަރުގައި އިހުމާލުވެފައިވާކަން ވެސް އޭނާ ފާހަގަކުރިއެވެ.
އެންމެ ފަހުން އަޅުގަނޑު އިހަވަންދުއަށް ދިޔައިރު އިހަވަންދޫގަ މަހަށްދާން ޒުވާނެއް ނެތިގެން އަހާލީމަ އެނގުނު އެއްޗަކީ ހއ.އިހަވަންދޫގަ މިދިޔަ އެމްޑީޕީ 5 އަހަރުގަ ގާތްގަނޑަކަށް ބުނާނަމަ 500 އެއްހައި ޒުވާނުން މަހަށްދިޔަ. އެކަމަކު އެންމެން ތިބީ ފެނަކައާއި، އާރްޑީސީއާއި މިކަހަލަ ކުންފުނިތަކުގެ މަގާމުތަކަށްލާފަ ވަޒީފާ ދީފަ.
ސާޖިން ބުނީ އެމްޑީޕީ ސަރުކާރުގައި އިހަވަންދޫގައި ފައިބަރު 35 އޮޑި ދުއްވި ކަމަށާއި، ނަމަވެސް އޭނާއަށް އެ ރަށާ ހިސާބަށް ދެވުނުއިރު އެ ރަށުގައި އޮތީ މަސްވެރިކަން ކުރާ އެންމެ 14 އޮޑި ކަމަށެވެ.
އިހަވަންދުއަށް ކުރި ދަތުރުގައި ސާޖިން އެ ރަށުގެ މަސްވެރިންނާ ބައްދަލުކުރަނީ. ފޮޓޯ: ޒުވާން މަސްވެރިޔާ ޑޮޓް ކޮމް
މައިގަނޑު ގޮތެއްގައި މަސްވެރިކަން ފަނޑުވެގެން މިދަނީ ފާއިތުވެގެންދިޔަ ތިން ވެރިކަމުގައި ވެސް މަސްވެރިކަމުގެ ދާއިރާއަށް އެކަށީގެންވާ އިންވެސްޓްތަކެއް ނުކުރެވުމުގެ ސަބަބުން ކަމަށާއި، މަސްވެރިކަމުގެ ސިނާއަތަށް އެދެވޭ ހައްލެއް ހޯދަން އެއްވެސް ވެރިއަކު މަސައްކަތްކޮށްފައިނުވާ ކަމަށް ވެސް ސާޖިން ބުންޏެވެ.
ފާއިތުވެގެން މިދިޔަ އެމްޑީޕީ ސަރުކާރުގައި [އެމްޑީޕީ ސަރުކާރު ފެށުނުއިރު] މަސްވެރިކަން ކުރާ 700 އުޅަނދު އޮތްއިރުގައި މިހާރު މަސްވެރިކަން ކުރަން އޮތީ ގާތްގަނޑަކަށް ބުނާނަމަ 450 އޮޑި. އެމްޑީޕީ ސަރުކާރު ހަވާލުވިއިރުގައި މަސްވެރިކަންކުރާ 17,000 – 20,000 އާ ދޭތެރޭގައި މަސްވެރިން ތިބި ކަމަށް ލަފާކުރިއިރުގައި މިހާރު މަސްވެރިކަން ކުރާ މީހުންގެ އަދަދަކީ ގާތްގަނޑަކަށް ބުނާނަމަ ދިވެހިންގެ އަދަދަކީ މިހާރު 4,000 އަށް ނާރާ.
ސާޖިން ބުނީ މިކަމުން ވެސް އެނގިގެންދަނީ ދުވަހެއް ދުވަހަކަށް މަސްވެރިކަން ފަނޑުވަމުން ފަނޑުވަމުން ގޮސް ނެތިިގެންދާ މަންޒަރު ކަމަށެވެ.
މީގެ އަށެއްކަ އަހަރު ކުރިން ފެށިގެން މަސްވެެރިކަމުގެ ދާއިރާގައި ހަރަކާތްތެރިވަމުން އަންނަ ސާޖިން ގަބޫލުކުރާ ގޮތުގައި ފާއިތުވެދިޔަ އެއްވެސް ސަރުކާރަކުން މަސްވެރިކަމުގެ ސިނާއަތަށް ނުކުރާހައިވަރުގެ ބޮޑެތި އިންވެސްޓްމަންޓްތަކެއް މިވީ އެއް އަހަރުގައި ރައީސް ޑރ.މުޙައްމަދު މުޢިއްޒުގެ ސަރުކާރުން ވަނީ ކުރަން ފަށާފައެވެ.
އެއްވެސް ގޮތަކަށް ސިޔާސީ ވާހަކައެއް ނޫން ދައްކަން މި އުޅެނީކީ. މީ ހަގީގަތަށް ވާނީ. ކޮންމެ މީހަކަށް ވެސް ފެންނަން އޮތް ހަގީގަތަކަށް ވާތީވެ. މިދިޔަ ފަސް އަހަރު ނިމިގެން އެދިޔައީ ހއ.އިހަވަންދޫގަ ވެސް މަސް ފެކްޓްރީއެއް އަޅާނަމޭ، އަޅާނަމޭ، އަޅާނަމޭ، އަޅާނަމޭ ކިޔާފަ. ތިނަދޫގަ ވެސް އަޅާނަމޭ، އަޅާނަމޭ، އަޅާނަމޭ، އަޅާނަމޭ ކިޔާފަ.
މިވީ އެއް އަހަރުތެރޭގައި މަސްވެރިކަމުގެ ސިނާއަތަށް ދާއިމީ ހައްލެއް ހޯދަން މި ސަރުކާރުން މަސައްކަތް ކުރަމުންދާކަން ފާހަގަކޮށް ސާޖިން ވަނީ ރައީސް ޑރ. މުޢިއްޒާއި، ފިޝަރީޒް މިނިސްޓަރު އަޙްމަދު ޝިޔާމަށް ޝުކުރު ދަންނަވާފައެވެ.