ގއ ނިލަންދޫ ކައުންސިލުން އިންތިޒާމްކޮށްގެން ބާއްވާ " ރާވެރިޔާ ވޮލީ މުބާރާތް 2024 " ފިރިހެން ޑިވިޝަންގެ 10 ވަނަ މެޗުގައި އެންމެ ފަހުގެ ޗެމްޕިއަން ބޮން ބޮން ސްޕޯޓްސް ކުލަބު އަދި ޓޮޕް ބްރަދާސް ވާދަކުރި މެޗު ޓޮޕް ބްރަދާސްއިން ކާމިޔާބު ކޮށްފިއެވެ.
ގއ ނިލަންދޫ ރަސްމީ ވޮލީކޯޓުގައި ކުރިއަށްދިޔަ މި މެޗް ޓޮޕް ބްރަދާސްއިން ކާމިޔާބު ކުރީ 3/1 ސެޓުންނެވެ.
ފޯރިގަދަ ކުޅުމެއް ފެނިގެންދިޔަ މިމެޗުގެ ފުރަތަމަ ސެޓު ދެޓީމުގެ ފަރާތުން ފެނިގެން ދިޔައީ މޮޅު ކުޅުމެކެވެ. ވަރަށް ވާދަވެރިކޮށް ދިޔަ މިސެޓުން ދެޓީމުގެ ފަރާތުން ބާރު ޝޮޓު ތަކެއް ފެނިގެން ގޮސްފައިވެއެވެ. މި ސެޓު 25/21ން ކާމިޔާބު ކުރީ ޓޮޕް ބްރަދާސްއެވެ.
މެޗުގެ ދެވަނަ ސެޓު ފަށައިގެން ދެޓީމްގެ ފަރާތުން ހަމަހަމަ ވާދަވެރި ކުޅުމެއް ފެނިގެން ދިޔަ މި ސެޓުގެ ފަހުކޮޅު ބޮންބޮން ސްޕޯޓްސް ކުލަބުގެ ރަނގަޅު ނިންމުންތައް ފެނިގެން ދިޔައެވެ. މިސެޓު 25/20 އިން ކާމިޔާބު ކުރީ ބޮންބޮން ސްޕޯޓްސް ކުލަބެވެ. މެޗުގެ 3 ވަނަ ސެޓުވެސް ފެނިގެން ދިޔައީ ވަރަށް ވާދަވެރިކޮށެވެ. ބޮން ބޮން ސްޕޯޓްސް ކުލަބުގެ ރިމޭ ގެ ބާރު ޝޮޓުތަކާއި އަދި ޓޮޕް ބްރަދާސްގެ ފަޒީލްގެ ބާރު ޝޮޓު ތަކެއް ފެނިގެންދިޔަ މިސެޓު 25/23 އިން ކާމިޔާބު ކުރީ ޓޮޕް ބްރަދާސްއިންނެވެ. ނަތީއްޖާ ނެރުމަށް ކުޅުނު ހަތަރު ވަނަ ސެޓުވެސް ފެނިގެން ދިޔައީ ވާދަވެރި ހަމަހަމަ ކުޅުމެކެވެ. މި ސެޓު 25/23 އިން ކާމިޔާބު ކޮށް 3/1 ސެޓުން މެޗް ކާމިޔާބު ކުރީ ޓޮޕް ބްރަދާސް އިންނެވެ. މިމެޗުން މޮޅުންވުމާއި އެކު މި ގުރޫޕުގެ އެއްވަނަ ޓީމުގެ ގޮތުގައި ޓޮޕް ބްރަދާސް ވަނީ ހޮވިފައެވެ.
މި މެޗުގެ މޮޅު ކުޅުންތެރިޔަކަށް ހޮވުނީ މި މުބާރާތުގައި ތަފާތު މޮޅު ކުޅުމެއް ދައްކަމުންއަންނަ ފަޒީލް އެވެ. ފަޒީލް ވަނީ އެޓީމު ކުޅުނު ހުރިހާ މެޗެއްގެ މޮޅު ކުޅުންތެރިޔާގެ މަގާމް ހޯދާފައެވެ.
މި މުބާރާތުގައި މާދަމާ ވިލިނގިލީ ވޮލީބޯލް ކުލަބާއި ދެކޮޅަށް ދާންދޫ ސްޕޯޓްސް ކުލަބުން ވާދަކުރާނެއެވެ. މިމެޗުން ދާންދޫ ސްޕޯޓްސް ކުލަބު މޮޅުވެއްޖެ ނަމަ އެޓީމަށް އެގުރޫޕުގެ އެއްވަނަ ލިބޭނެއެވެ.
2022 މި މުބާރާތުގައި ޖުމްލަ 11 ޓީމް ބައިވެރިވިއެވެ. އެއީ ފިރިހެން 4 ޓީމްގެ އިތުރުން އަންހެން 7 ޓީމެވެ. 2023 ވަނަ އަހަރު މުބާރާތުގައި 13 ޓީމްއަކުން ބައިވެރިވި އިރު އަންހެން 6 ޓީމް އަދި ފިރިހެން 7 ޓީމް ބައިވެރިވެފައިވެއެވެ. މިދިޔަ އަހަރުގެ އަންހެން ޑިވިޝަންގެ ޗެމްޕިއަނުންނަކީ ކަނޑުހުޅުދޫ އަންހެން ވޮލީބޯލަ ޓީމެވެ. ފިރިހެން ޗެމްޕިއަނުންނަކީ ބޮން ބޮން ސްޕޯޓްސް ކުލަބެވެ.
2022 ވަނަ އަހަރު މިމުބާރާތުގެ ފިރިހެން ޑިވިޝަން ޗެމްޕިއަންކަން ބޮން ބޮން ސްޕޯޓްސް ކުލަބު ހޯދިއިރު އަންހެން ޑިވިޝަން ޗެމްޕިއަން ޓީމަކީ ގެމަނަފުށި ވޮލީބޯލަ ޓީމެވެ. މިމުބާރާތް ކުރިޔަށް ގެންދިޔުމަށް ހަމަޖެހިފައިވަނީ އަންހެން އަދި ފިރިހެން ދެ ޑިވިޝަނަށް ބަހާލައިގެންނެވެ. އަދި ކޮންމެ ޑިވިޝަނެއްގެ ޗެމްޕިއަން ޓީމަށް 20,000/- (ވިހިހާސް) ރުފިޔާގެ އަދި ކޮންމެ ޑިވިޝަނެއްގެ ރަނަރަޕް ޓީމަށް 10,000 (ދިހަހާސް) ރުފިޔާގެ ފައިސާގެ އިނާމް ދިނުމަށްވަނީ ހަމަޖެހިފައެވެ.