ފިޔޯރީ ސްކޫލުގެ ދަރިވަރުންނަށް ކިޔެވުމަށް ހިތްފަސޭހަ މާހައުލެއް ޤާއިމްކޮށްދިނުމުގެ ގޮތުން، ސްކޫލުގެ 11 ކްލާސްރޫމް މިއަންނަ އަހަރުގެ ދިރާސީ އަހަރު ފެށުމުގެ ކުރިން އޭސީ ކޮށް ނިންމަވައިދެއްވާނެ ކަމަށް ފިޔޯރީ ކައުންސިލުގެ ރައީސް ފައިޒަރު ރަޝީދު ވިދާޅުވެއްޖެއެވެ.
ފައިޒަރު މިހެން ވިދާޅުވީ ފިޔޯރީ ޕޮލިސް ސްޓޭޝަނުން އިސްނަގައިގެން ފިޔޯރީ ކައުންސިލާއި ފިޔޯރީ ސްކޫލް ގުޅިގެން އިއްޔެ ކުރިޔަށް ގެންދިޔަ "ހެޔޮލަފާ ޒުވާނުން ޕްރޮގްރާމް" ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް ފައިޒަރު ވިދާޅުވި ގޮތުގވި ގޮތުގައި، ސްކޫލް ގެ ކްލާސްތައް I އޭސީ ކުރުމުގެ މި މަޝްރޫޢުގެ ދަށުން 18000 ބީޓީޔޫގެ 22 އޭސީ ހަރު ކުރެވޭނެ އެވެ. އަދި މި މަސައްކަތަށް ބޭނުންވާ ބަޖެޓް ކައުންސިލުގެ އާމްދަނީން ހަމަޖެހިފައިވާ ކަމަށާއި، ދަރިވަރުންނަށްޓަކާ ތިން ލައްކަ ފަންސާސް ހާސް ރުފިޔާ އޭސީއަށް ޚަރަދުކުރަން ކައުންސިލުގެ މެންބަރުން ނިންމަވާފައިވާ ކަމަށްވެސް އޭނާ ވިދާޅުވިއެވެ.
ފިޔޯރީ ކައުންސިލު ގެ ރައީސް ފައިޒަރު
ހަމައެހެންމެ، ސްކޫލުގެ 11 ކްލާސްރޫމުގެ ކަރަންޓު ވިއުގަ އަޅާފައިވަނީ އޭސީ ހަރުކުރެވޭނެ ގޮތަކަށް ނޫން ކަމަށް ވާތީ، އެކަމަށް ބޭނުންވާ ކަރަންޓު ވައިރިންގ މަސައްކަތުގައި ފިޔޯރީ ފެނަކަ ސްޓޭޝަނުގެ ފަންނީ އެހީތެރިކަން ދެއްވާކަންވެސް ފައިޒަރު ވަނީ ފާހަގަކުރައްވާފައެވެ.
ފިޔޯރީ ކައުންސިލުގެ ރައީސްކަމާ ފައިޒަރު ހަވާލުވެވަޑައިގަތް ފަހުން، ރަށުގެ އެކި ކަންކަމުގައި އިސްނަންގަވައިގެން ހަރަކާތްތެރިވަމުން ގެންދަވާކަން ފާހަގަކުރެވެއެވެ. އަދި ރަށުގެ ތަރައްޤީއާއި ކުރިމަގާމެދު އަބަދުވެސް ރަނގަޅު ގޮތްތައް ވިސްނަވައި، ރަށަށް ތަރައްޤީ ގެނައުމުގައި އަބަދުވެސް އިސްނަންގަވާ ބޭފުޅެއްގެ ގޮތުގައި ރައީސް ފައިޒަރު ފާހަގަކުރެވެއެވެ.
އެގޮތުން ފިޔޯރީ ސްކޫލުން ވަރަށް ބޮޑަށް މާލީ އެހީތެރިކަން މި ދައުރުގައި ލިބިފައިވާ ކަމާއި މީގެ ކުރިން އެ ސްކޫލަށް ކައުންސިލުގެ އެއްވެސް އެހީއެއް ލިބިފައި ނުވާ ކަމުގައި ސްކޫލްގެ ބެލެނިވެރިން ފާހަގަ ކުރެއެވެ.