ގއ ނިލަންދޫ ކައުންސިލުން އިންތިޒާމްކޮށްގެން ބާއްވާ " ރާވެރިޔާ ވޮލީ މުބާރާތް 2024 " ފިރިހެން ޑިވިޝަންގެ 11 ވަނަ މެޗުގައި ދާންދޫ ސްޕޯޓްސް ކުލަބު އަދި ވިލިނގިލީ ވޮލީ ކުލަބު ވާދަކުރި މެޗު ދާންދޫ ސްޕޯޓްސް ކުލަބުއިން ކާމިޔާބު ކޮށްފިއެވެ.
ގއ ނިލަންދޫ ރަސްމީ ވޮލީކޯޓުގައި ކުރިއަށްދިޔަ މިމެޗު ދާންދޫ ސްޕޯޓްސް ކުލަބު އިން ކާމިޔާބު ކުރީ ސީދާ 3 ސެޓުންނެވެ. މި މެޗުން މޮޅުވެ ދާންދޫ ސްޕޯޓްސް ކުލަބުން ވަނީ ގުރޫޕުގެ އެއްވަނަ ހޯދާފައެވެ.
ސެމީ ފައިނަލްގައި ދާންދޫ ސްޕޯޓްސް ކުލަބު ވާދަކުރަން ޖެހެނީ އެންމެ ފަހުގެ ޗެމްޕިއަން ބޮންބޮން ސްޕޯޓްސް ކުލަބާއި އެވެ.
މެޗުގެ ފުރަތަމަ ސެޓު ދެޓީމުގެ ފަރާތުން ފެނުނީ ހަމަހަމަ ކުޅުމެކެވެ. އެހެން މެޗުތަކާއި ހިލާފަށް މި މެޗުގައި ވިލިނގިލީ ވޮލީ ކުލަބުގެ ފަރާތުން ރަނގަޅު ނިންމުންތަކެއް ނިންމާފައިވެއެވެ. މެޗުގެ ފުރަތަމަ ސެޓު 25/20 އިން ކާމިޔާބު ކުރީ ދާންދޫ ސްޕޯޓްސް ކުލަބުންނެވެ.
ދެވަނަ ސެޓު ފެނިގެން ދިޔައީ ވަރަށް ވާދަވެރި ކުޅުމެކެވެ. މިސެޓް 25/23 އިން ކާމިޔާބު ކޮށް ތިންވަނަ ސެޓު 25/21 އިން ކާމިޔާބު ކޮށް މެޗް ކާމިޔާބު ކުރިއެވެ.
މެޗުގެ މޮޅު ކުޅުންތެރިޔަކަށް ހޮވިފައިވަނީ ދާންދޫ ސްޕޯޓްސް ކުލަބުގެ ޖާޒީ ނަންބަރު 9 މުހައްމަދު ޝާމިލް އެވެ.
2022 މި މުބާރާތުގައި ޖުމްލަ 11 ޓީމް ބައިވެރިވިއެވެ. އެއީ ފިރިހެން 4 ޓީމްގެ އިތުރުން އަންހެން 7 ޓީމެވެ. 2023 ވަނަ އަހަރު މުބާރާތުގައި 13 ޓީމްއަކުން ބައިވެރިވި އިރު އަންހެން 6 ޓީމް އަދި ފިރިހެން 7 ޓީމް ބައިވެރިވެފައިވެއެވެ. މިދިޔަ އަހަރުގެ އަންހެން ޑިވިޝަންގެ ޗެމްޕިއަނުންނަކީ ކަނޑުހުޅުދޫ އަންހެން ވޮލީބޯލަ ޓީމެވެ. ފިރިހެން ޗެމްޕިއަނުންނަކީ ބޮން ބޮން ސްޕޯޓްސް ކުލަބެވެ.
2022 ވަނަ އަހަރު މިމުބާރާތުގެ ފިރިހެން ޑިވިޝަން ޗެމްޕިއަންކަން ބޮން ބޮން ސްޕޯޓްސް ކުލަބު ހޯދިއިރު އަންހެން ޑިވިޝަން ޗެމްޕިއަން ޓީމަކީ ގެމަނަފުށި ވޮލީބޯލަ ޓީމެވެ.
މިމުބާރާތް ކުރިޔަށް ގެންދިޔުމަށް ހަމަޖެހިފައިވަނީ އަންހެން އަދި ފިރިހެން ދެ ޑިވިޝަނަށް ބަހާލައިގެންނެވެ. އަދި ކޮންމެ ޑިވިޝަނެއްގެ ޗެމްޕިއަން ޓީމަށް 20,000/- (ވިހިހާސް) ރުފިޔާގެ އަދި ކޮންމެ ޑިވިޝަނެއްގެ ރަނަރަޕް ޓީމަށް 10,000 (ދިހަހާސް) ރުފިޔާގެ ފައިސާގެ އިނާމް ދިނުމަށްވަނީ ހަމަޖެހިފައެވެ.