ހިދުމަތް ފޯރުކޮށްދެމުން އައި ފަރާތް ބަދަލުކުރުމަށް މެދުކަނޑާލި، ނެޝަނަލް ޑިޖިޓަލް އައިޑެންޓިޓީ، އީފާސް އިން އޮންލައިން ފޭސް ވެރިފިކޭޝަންގެ ހިދުމަތް އަލުން ފަށައިފިއެވެ.
ނެޝަނަލް ޑިޖިޓަލް އައިޑެންޓިޓީ، އީފާސް ބަލަހައްޓަނީ ނޭޝަނަލް ސެންޓަރ ފޯ އިންފޮމޭޝަން ޓެކްނޮލޮޖީ، އެންސީއައިޓީންނެވެ. އެ އިދާރާއިން އީފާސްގައި ބޭނުންކުރަމުންދާ އޮންލައިންކޮށް މޫނު ދެނެގަންނަ ހިދުމަތް ނުވަތަ ފޭސް ވެރިފިކޭޝަންގެ ހިދުމަތް ދިނުމަށް ފުރަތަމަ ހަވާލުކުރީ “ސަމް އެންޑް ސަބްސްޓެންސް ޕްރައިވެޑް ލިމިޓެޑް” (ސަމްސަބް) ކުންފުންޏާއެވެ. ނަމަވެސް އެ ކުންފުނިން އެ މަސައްކަތް ވަކިކޮށް އައު ބަޔަކާ މަސައްކަތް ހަވާލު ކުރުމަށްފަހު އަލުން އޮންލައިން ފޭސް ވެރިފިކޭޝަންގެ ހިދުމަތް މިހާރު ފަށާފައިވާކަމަށް އެންއައިސީޓީން ވަނީ ހާމަކޮށްފައެވެ.
އީފާސް ފޭސް ވެރިފިކޭޝަނަށް މިގެނައި ބަދަލާއެކު މިވަގުތު މި ހިދުމަތް ލިބޭނީ އިފާސް ވެބް މެދުވެރިކޮށެވެ. އަދި އާންމުކޮށް ބޭނުން ކުރާ ހުރިހާ ބްރައުޒާތަކުން އީފާސްއަށް ލޮގިންކޮށް ހިދުމަތް ލިބޭނެ ކަމަށްވެސް އެންސީއައިޓީން ވަނީ ބުނެފައެވެ.
ފޭސް ވެރިފިކޭޝަން ހިދުމަތް އަލުން ދޭން ފަށާފައިމިވަނީ ލެޓްވިއާގައި ރަޖިސްޓަރީ ކޮށްފައިވާ ރެގިއުލާ ފޮރެންސިކްސް ކުންފުނީގެ އެޕްލިކޭޝަނެއް ބޭނުން ކޮށްގެނެވެ. މި ހިދުމަތް ދޭނީ ބޭރުގެ އެއްވެސް ފަރާތަކަށް އެއްވެސް ރައްޔިތެއްގެ ފޮޓޯއެއް ނުވަތަ އެނޫންވެސް އެހެން ޒާތީ މައުލޫމާތެއް ހިއްސާކުރުމަކާއި ނުލައި އެންސީއައިޓީގެ އެތެރޭގައި ކަމަށް އެއިދާރާއިން މައުލޫމާތު ދެއްވައެވެ.
ރެގިއުލާ ފޮރެންސިކްސް އަކީ 30 އަހަރުގެ ތަޖުރިބާއާއެކު ސެކިއުރިޓީގެ ދާއިރާއިން ގިނަ ޑިޖިޓަލް ހިދުމަތްތަކެއް ފޯރުކޮށްދޭ ގާބިލު އަދި ބައިނަލްއަގުވާމީ ބޮޑެތި ކުންފުނިތަކާއި ތަފާތު އެކި ގައުމުތަކަށްވެސް ހިދުމަތް ދެމުންދާ އިތުބާރު ހުރި ކުންފުންޏެއްކަން އެންއައިސީޓީން ފާހަގަކުރައްވައެވެ.
އެންސީއައިޓީއާ ހަވާލުވެވަޑައިގެން ހުންނެވި ދާހިލީ ސަލާމަތާއި ފަންނިއްޔާތާބެހޭ ވުޒާރާގެ ސްޓޭޓް މިނިސްޓަރު، ޑރ. މުހައްމަދު ކިނާނަތު ވިދާޅުވީ އެ އިދާރާގެ އަމާޒަކީ އީފާސްގެ ނިޒާމް ދުވަހެއް ދުވަހަކަށް ހަރުދަނާކޮށް އެ ނިޒާމަކީ ދިވެހިރާއްޖޭގެ ޑިޖިޓަލް ހިދުމަތްތައް ފުޅާކުރުމުގައި އެންމެ އިސްދައުރެއް އަދާކުރާ އަދި، ރައްޔިތުންނާއި މުއައްސަސާތަކުގެ އިތުބާރާއި ޔަގީންކަން ލިބިފައިވާ ނިޒާމަކަށް ހެދުން ކަމަށެވެ. މި އަމާޒު ހާސިލުކުރުމުގައި އަބަދުވެސް ރައްޔިތުންގެ އަޑުއަހައި އިހުސާސްތައް ދެނެގެން ހިދުމަތް ދިނުމަށް ވަރަށް ބޮޑަށް އިސްކަން ދެއްވާނެ ކަމަށްވެސް ޑރ. މުހައްމަދު ކިނާނަތު ވިދާޅުވިއެވެ.
އީފާސްގެ މުހިންމު އެއް ބޭނުމަކީ ދައުލަތުން ފޯރުކޮށްދޭ ޑިޖިޓަލް ހިދުމަތްތައް ފޯރުކޮށްދިނުމުގައި އެ ހިދުމަތް ދެވެނީ ހިދުމަތަށް އެދޭ އަސްލު ފަރާތަށްކަން ކަށަވަރުކުރުމެވެ. މިއީ އެހެން މީހުންގެ އައިޑެންޓިޓީ ވަގަށް ނަގައި އޮޅުވާލައިގެން މުއާމަލާތްތައް ހިންގުމުގެ ފުރުސަތު ހަނިކުރުމުގެ މަގުސަދުގައި ފެށި ހިދުމަތެކެވެ.
އޮންލައިން ފޭސްވެރިފިކޭޝަންގެ ހިދުމަތް ތައާރަފުކުރުމުގެ ކުރިން އީފާސްގެ ވެރިފަރާތް ކަށަވަރުކުރަމުން އައީ އެކަމަށް ހާއްސަކުރެވިފައިވާ މަރުކަޒުތަކަށް އެފަރާތްތަކުން ހާޒިރުވެ ނުވަތަ ވީޑީއޯ ކޯލް ކޮށްގެން ބެލުމަށްފަހު އެމައުލޫމާތު މެނުއަލްކޮށް އަދާ ހަމަ ކޮށްގެނެވެ.