ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ކެބިނެޓަށް ބަދަލުތަކެއް ގެންނަން އުޅޭކަމަށް ބުނެ ފަތުރަނީ ދޮގު ވާހަކަތަކެއް ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެއެވެ.
ރައީސް އޮފީހުގެ ތަރުޖަމާނު ހީނާ ވަލީދު މިހެން ވިދާޅުވީ އެކްސްގައި ކުރެއްވި ޕޯސްޓެއްގައެވެ.
ވަޒީރުންގެ މަޖިލީހަށް ބޮޑެތި ބަދަލުތަކެއް ގެންނަވަން ރައީސުލްޖުމްހޫރިއްޔާ ނިންމަވައިފި ކަމަށް ބުނެ ސޯޝަލް މީޑިއާގައި ފަތުރަމުންދާ ވާހަކަތަކާ ގުޅިގެން އެކްސްޕޯސްޓެގައި ހީނާ ވިދާޅުވީ ކެބިނެޓަށް އެއްވެސް ބަދަލެއް ގެންނަވަން ރައީސް ޑރ މުއިއްޒު ނިންމަވާފައިނުވާ ކަމަށެވެ.
ރައީސް ޑރ މުއިއްޒު، އެންމެފަހުން ވަޒީރުންގެ މަޖިލީހަށް ގެންނެވި ބަދަލަކީ މާލީ ވަޒީރުކަމަށް މޫސާ ޒަމީރު އައްޔަން ކުރައްވައި، ސިއްހަތާބެހޭ ވަޒީރުކަމަށް އަބްދުﷲ ނާޒިމު އަދި ހާރިޖީ ވަޒީރަކަށް އަބްދުﷲ ހަލީލު އައްޔަން ކުރެއްވުމެވެ. އޭގެ ފަހުން މިއަދު ވަޒީރުންގެ މަޖިލީހުގައި ހިމެނިވަޑައިގަންނަވާ ދަނޑުވެރިކަމާއި ދިރޭތަކެއްޗާބެހޭ ވަޒީރު ޑރ. އާއިޝަތު ރަމީލާގެ އިސްތިއުފާ ރައީސް ޑރ މުއިއްޒު ގަބޫލުފުޅުކުރެއްވިއެވެ. ވަޒީރުކަމުން ރަމީލާ އިސްތިއުފާ ދެއްވީ އެކަމަނާގެ ސިއްޙީ ހާލުކޮޅު ހުރިގޮތުންނެވެ. އަދި އެމަގާމު މިވަގުތު އޮތީ ހުހަށެވެ.