ވަޒީފާއިން އަލަށް ރިޓަޔާވާ މުވައްޒަފުންނަށް މަހުން މަހަށް ދެމުން އަންނަ އެލަވަންސްއަށް ބަދަލު ނުގެނައުމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ނިންމައިފިއެވެ. މި ނިންމުން ނިންމާފައި ވަނީ ވަޒީރުންގެ މަޖިލީހުގެ ބައްދަލުވުމުގައި މި މައްސަލަ ހުށަހަޅުއްވައި، ފުޅާ ދާއިރާއެއްގައި މަޝްވަރާ ކުރެއްވުމަށް ފަހުގައެވެ.
ރައީސުލްޖުމްހޫރިއްޔާގެ އޮފީހުން މައުލޫމާތު ދީފައިވާ ގޮތުގައި، މާލީ ވުޒާރާއިން ފޮނުވާފައިވާ ސިޓީއަށް އަމަލު ނުކުރައްވަން ނިންމެވީ މުވައްޒަފުންގެ ކަންބޮޑުވުންތަކެއް ހުރުމާ ގުޅިގެންނެވެ. މާލީ ވުޒާރާއިން ވިދާޅުވެފައިވަނީ، ސަރުކާރުގެ މުވައްޒަފުންގެ ތެރެއިން ޑަބަލް ޕެންޝަން ނުވަތަ ދެ ޕެންޝަނުގެ ގޮތުގައި މަހުންމަހަށް ލިބޭ ޢަދަދަށް ބަދަލު ނުގެނައުމަށް ނިންމެވީ، އެގޮތަށް އިނާޔަތް ލިބޭ ވަރަށް ގިނަ މުވައްޒަފުންތަކެއް ތިބުމާ ގުޅިގެން، އެހާ ގިނަ ދުވަހު ލިބެމުން އައި އިނާޔަތެއް ކަނޑާލުމަކީ އެފަރާތްތަކުގެ ކަންބޮޑުވުމެއްކަމަށް ގަބޫލުކުރެވޭތީކަމަށެވެ. އެހެންކަމުން ރިޓަޔަރމަންޓް ޕެންޝަން ދިނުމުގައި ގެނެވުނު ބަދަލާ ގުޅިގެން އެކިއެކި ފަރާތްތަކުން ފާޅުކުރައްވާފައިވާ ކަންބޮޑުވުންތަކަށް ރިއާޔަތް ކުރައްވައި، މި ވަގުތު ރައްޔިތުން ބޭނުންވަނީ މި ބާވަތުގެ ރިޓަޔަރމަންޓް އެލަވަންސްތައް ކަނޑާނުލުން ކަމަށް ރައީސުލްޖުމްހޫރިއްޔާ ދެކެވަޑައިގަންނަވާތީ، މިނިސްޓްރީ އޮފް ފިނޭންސްއިން އެކި މުއައްސަސާތަކަށް ފޮނުއްވާފައިވާ ސިޓީ ބާތިލު ކުރެއްވުމަށް ނިންމަވާފައިވާ ކަމަށެވެ.
ކުރިން ސަރުކާރުން ނިންމާފައިވަނީ، ސަރުކާރުގެ ވަޒީފާއިން އަލަށް ރިޓަޔަރވާ ނުވަތަ މުސްކުޅިކުރެވޭ މުވައްޒަފުންނަށް ޕެންޝަން ސްކީމްގެ ބޭރުން އިތުރު މަހު އެލަވެންސް ނުދިނުމަށެވެ. މިގޮތަށް ނިންމެވީ އަސާސީ ޕެންޝަންގެ ތެރެއިން ލިބޭ ފައިސާގެ އިތުރުން، ވަކިވަކި އިދާރާތަކުން އަމިއްލައަށް ހިންގާ ރިޓަޔަމެންޓް ސްކީމްތަކުން ދޭ ފައިސާގެ އިނާޔަތް އެއްހަމަ ކުރުމުގެ ބޭނުމުގައެވެ.
ސަރުކާރުން ދެމުން އަންނަ ޕެންޝަންގެ ދަށުން، މި އަހަރު 266 މިލިޔަން ރުފިޔާ ހޭދަކުރާއިރު، އަންނަ އަހަރު 272 މިލިޔަން ރުފިޔާ ހޭދަވާނެކަމަށް ދައުލަތުގެ ބަޖެޓުގައި ލަފާކޮށްފައިވާކަން ފާހަގަކުރެވެއެވެ.