ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އުވާލުމަށް އެ ޕާޓީގެ ސެނެޓުން މިއަދު ނިންމައިފިއެވެ. މި ނިންމުން ނިންމީ ޕީއެންސީގެ އޮފީހުގައި ބޭއްވުނު ސެނެޓު ބައްދަލުވުމެއްގައެވެ.
ޕީޕީއެމްގެ ނައިބު ރައީސް އަދި ފިޝަރީޒް މިނިސްޓަރު އަޙްމަދު ޝިޔާމްގެ ރިޔާސަތުގައި ބޭއްވުނު މި ބައްދަލުވުމުގައި، ޕާޓީ އުވާލުމަށް ހުށަހެޅުނު ގަރާރު ފާސްވެފައިވަނީ ބައްދަލުވުމުގައި ބައިވެރިވި 42 ސެނެޓަރުންގެ އިއްތިފާގުންނެވެ.
މި ނިންމުމާއެކު، ޕީޕީއެމްގެ މެންބަރުން ވެރިކަންކުރާ ޕާޓީ ކަމަށްވާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ބަދަލުވުމުގެ މަގު ފަހިވެގެން ގޮސްފައިވެއެވެ. ޕީޕީއެމްގެ ނައިބު ރައީސް އަދި ޑިފެންސް މިނިސްޓަރު ޣައްސާން މައުމޫން ވިދާޅުވެފައިވަނީ މިއަދަކީ އުފާވެރި ދުވަހެއް ކަމަށާއި، މިއީ ޕީޕީއެމްގެ މެންބަރުން ޕީއެންސީއަށް ބަދަލުވާން ރަސްމީކޮށް އިލްތިމާސްކުރާ ދުވަސް ކަމަށެވެ.
ނަމަވެސް، ބައެއް ސެނެޓަރުން ވަނީ ޕީޕީއެމް އުވާލުމުން އިންތިހާބީ މަގާމުތަކުގައި ތިބި މެންބަރުންގެ ގޮނޑިތަކާމެދު ސުވާލު އުފައްދާފައެވެ. ޕާޓީގެ ލީޑާޝިޕުން މިކަމާ ގުޅޭ މައުލޫމާތު އިތުރަށް ސާފުކޮށް، ސެނެޓަށް އަންގާނެ ކަމަށް ވިދާޅުވެފައިވެއެވެ.
ޕީޕީއެމް އުވާލުމާ ގުޅިގެން، ޕާޓީގެ ކުލަ، ނަން، ނިޝާން އަދި ލޯގޯ ފަދަ ތަކެތި ކުރިއަށް އޮތް 5 އަހަރު ދުވަހުގެ ތެރޭގައި އެހެން ސިޔާސީ ޕާޓީއަކަށް ބޭނުން ނުކުރެވޭނެއެވެ.