ގއ ނިލަންދޫ ކައުންސިލުން އިންތިޒާމްކޮށްގެން ބާއްވާ " ރާވެރިޔާ ވޮލީ މުބާރާތް 2024 " އަންހެން ޑިވިޝަން ސެމީ ފައިނަލް ފުރަތަމަ މެޗުގައި ގެމަނަފުށި ވޮލީބޯލް ކުލަބު އަދި ގއ މާމެންދޫ އަންހެން ވޮލީޓީމް ވާދަކުރި މެޗް ފަސޭހަ ކަމާއިއެކު ގެމަނަފުށިން ކާމިޔާބުކޮށްފައެވެ.
ގއ ނިލަންދޫ ރަސްމީ ވޮލީކޯޓުގައި ކުރިއަށްދިޔަ މިމެޗު ގެމަނަފުށިން ކާމިޔާބު ކުރީ ސީދާ 3 ސެޓުންނެވެ. މިމުބާރާތުގައި ގެމަނަފުށިން ކުޅުނު އެއްވެސް މެޗަކުން ބަލިވެފައި ނުވެއެވެ.
މެޗުގެ ފުރަތަމަ ސެޓުން ފެށިގެން ގެމަނަފުށިން ކުޅެމުން ދިޔައީ ވަރަށް އިތުބާރާއި އެކުއެވެ. މިއާއި އެކު މެޗުގެ ފުރަތަމަ ސެޓު 25/08 ކާމިޔާބު ކުރިއެވެ. ދެވަނަ ސެޓު ވެސް ގެމަނަފުށިން ދިޔައީ މޮޅަށް ކުޅެމުންނެވެ. މިސެޓު ވެސް ފަސޭހަ ކަމާއިއެކު 25/18 އިން ކާމިޔާބު ކުރިއެވެ.
މެޗުގެ 3 ވަނަ ސެޓުވެސް ފަސޭހަ ކަމާއި އެކު ކާމިޔާބުކޮށް މުބާރާތުގެ ފައިނަލުން ޖާގަ ވަނީ ހޯދާފައެވެ. ގެމަނަފުށި ޓީމްއަކީ މިމުބާރާތުގެ އެންމެ ފަހުގެ ރަނަރަޕްއެވެ.
މިމެޗުގެ މޮޅު ކުޅުންތެރިޔަކަށް ހޮވުނީ ގެމަނަފުށީ ވޮލީބޯލް ކުލަބުގެ ޖާޒީ ނަންބަރު 16 ހަދީއްޖާ އިބްރާހިމް ( ހައްޖަ ) އެވެ.
ފިރިހެން ޑިވިޝަންގެ ސެމީ ފައިނަލް ފުރަތަމަ މެޗުގައި ވާދަކުރަނީ ދާންދޫ ސްޕޯޓްސް ކުލަބު އަދި އެންމެ ފަހުގެ ޗެމްޕިއަން ބޮންބޮން ސްޕޯޓްސް ކުލަބެވެ. މިމެޗު މިރޭ 20:15 ގައި ނިލަންދޫ ރަސްމީ ވޮލީކޯޓުގައި އޮންނާނެއެވެ.
2022 މި މުބާރާތުގައި ޖުމްލަ 11 ޓީމް ބައިވެރިވިއެވެ. އެއީ ފިރިހެން 4 ޓީމްގެ އިތުރުން އަންހެން 7 ޓީމެވެ. 2023 ވަނަ އަހަރު މުބާރާތުގައި 13 ޓީމްއަކުން ބައިވެރިވި އިރު އަންހެން 6 ޓީމް އަދި ފިރިހެން 7 ޓީމް ބައިވެރިވެފައިވެއެވެ. މިދިޔަ އަހަރުގެ އަންހެން ޑިވިޝަންގެ ޗެމްޕިއަނުންނަކީ ކަނޑުހުޅުދޫ އަންހެން ވޮލީބޯލަ ޓީމެވެ. ފިރިހެން ޗެމްޕިއަނުންނަކީ ބޮން ބޮން ސްޕޯޓްސް ކުލަބެވެ.
2022 ވަނަ އަހަރު މިމުބާރާތުގެ ފިރިހެން ޑިވިޝަން ޗެމްޕިއަންކަން ބޮން ބޮން ސްޕޯޓްސް ކުލަބު ހޯދިއިރު އަންހެން ޑިވިޝަން ޗެމްޕިއަން ޓީމަކީ ގެމަނަފުށި ވޮލީބޯލަ ޓީމެވެ.
މިމުބާރާތް ކުރިޔަށް ގެންދިޔުމަށް ހަމަޖެހިފައިވަނީ އަންހެން އަދި ފިރިހެން ދެ ޑިވިޝަނަށް ބަހާލައިގެންނެވެ. އަދި ކޮންމެ ޑިވިޝަނެއްގެ ޗެމްޕިއަން ޓީމަށް 20,000/- (ވިހިހާސް) ރުފިޔާގެ އަދި ކޮންމެ ޑިވިޝަނެއްގެ ރަނަރަޕް ޓީމަށް 10,000 (ދިހަހާސް) ރުފިޔާގެ ފައިސާގެ އިނާމް ދިނުމަށްވަނީ ހަމަޖެހިފައެވެ.