3 ވަނަ އައިސީޓީ އިން އެޑިޔުކޭޝަން މާސްޓަރ ޕްލޭން އެކުލަވާލުމުގެ މަސައްކަތު ބައްދަލުވުން ފަށައިފިއެވެ.
މި ވޯކްޝޮޕް ފެށުމުގެ ރަސްމިއްޔާތު ޝަރަފުވެރިކޮށްދެއްވީ ސްޓޭޓް މިނިސްޓަރ ޑރ. ޢަބްދުއްލަޠީފް މުޙައްމަދު އެވެ.
4 ދުވަހުގެ މުއްދަތަކަށް ކުރިއަށްދާ މި ވޯކްޝޮޕް ބާއްވަނީ އިމާދުއްދީން ސްކޫލުގައެވެ.
މި މަސައްކަތު ބައްދަލުވުމުގައި އައިސީޓީ މާސްޓަރ ޕްލޭން ރިވިއު މީޓިންގގެ ބައިވެރިންގެ އިތުރުން، އައިޓީ ދާއިރާގެ ތަޖުރިބާކާރުން ބައިވެރިވެ ވަޑައިގަންނަވައެވެ. އޭގެ ތެރޭގައި މިނިސްޓްރީގެ އެކި ޑިޕާޓްމަންޓްތަކާއި، ސްކޫލްތަކުގެ އިތުރުން ދިރާގު، މިނިސްޓްރީ އޮފް ހަޔަރ އެޑިޔުކޭޝަން، މޯލްޑިވްސް ނޭޝަނަލް ޔުނިވަރސިޓީ، އިސްލާމިކް ޔުނިވަރސިޓީ އޮފް ދަ މޯލްޑިވްސް، އެން.ސީ.ޓީ.ސީ، ޕޮލިޓެކްނިކް އަދި މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީގެ ބޭފުޅުން ހިމެނިވަޑައިގަންނަވައެވެ.
މި ވޯކްޝޮޕްގައި 3 ވަނަ އައިސީޓީ ޕްލޭންގެ ތަސައްވުރާއި، ޕޮލިސީ ގޯލްތަކުގެ ކަނޑައެޅުމުގެ އިތުރުން ކުރިއަށް ގެންދާނެ ޕްރޮޖެކްޓްތަކާއި ހަރަކާތްތައް ވެސް ކަނޑައެޅުމަށް ވަނީ ހަމަޖެހިފައެވެ. މީގެ އިތުރުން އައިސީޓީއާ ގުޅޭ ތައުލީމީ ސިޔާސަތުތައް ތަންފީޒުކުރުމުގައި އެކި މުއައްސަސާތަކުގެ މެދުގައި މަޝްވަރާތައް ފަށައި، އެ މަޝްވަރާތައް ދެމެހެއްޓިނިވި ގޮތެއްގައި ކުރިއަށް ގެންދެވޭނެ މަގުފަހިކުރުމަކީ މި ވޯކްޝޮޕްގެ އަމާޒެކެވެ.
ޔުނެސްކޯގެ އެހީތެރިކަމާއެކު މި އައިސީޓީ މާސްޓަރ ޕްލޭން އެކުލަވާލެވިގެންދާނީ 5 އަހަރު ދުވަހުގެ މުއްދަތަކަށް، ދިވެހިރާއްޖޭގެ ގައުމީ މަންހަޖުގައި އިސްކަންދޭ ކަންކަމާއި، އެޑިޔުކޭޝަން ސެކްޓަރ ޕްލޭންގައި އިސްކަންދޭ ކަންކަމުގެ އިތުރުން ގައުމީ އައިސީޓީ ސްޓްރެޓަޖީއާ އެއްގޮތްވާގޮތުގެ މަތީންނެވެ.