އިމާމުން ތާޒާކުރުމަށް އިސްލާމީ ކަންތައްތަކާ ބެހޭ ވުޒާރާއިން ފަށާފައިވާ ބޮޑު މަޝްރޫއުގެ ދަށުން މިހާތަނަށް 804 އިމާމުން ވަނީ ތަމްރީންވެއްޖެއެވެ.
އިސްލާމީ ކަންތައްތަކާ ބެހޭ ވުޒާރާއިން މިއަދު ބުނީ މި ޕްރޮގުރާމުގެ ދަށުން މިއަހަރު މިހާތަނަށް 19 އަތޮޅެއްގައި އިމާމުން ތަމްރީން ކުރުމުގެ ޕްރޮގުރާމް ކުރިއަށް ގެންގޮސްފައިވާއިރު ޖުމްލަ 804 އިމާމުން ތަމްރީންވެފައިވާ ކަމަށެވެ.
މި ޕްރޮގްރާމް އެންމެ ފަހުން ކުރިއަށްގެންދިޔައީ އައްޑޫ ސިޓީގައެވެ. އެ ޕްރޮގުރާމުގައި 68 އިމާމުން ބައިވެރިވެފައިވެއެވެ.
އައްޑޫގައި ކުރިއަށްދާ އިމާމުން ތަމްރީންކުރުމުގެ ޕްރޮގުރާމުގެ ބައިވެރިންނާއި އިސްލާމީ މަރުކަޒުގެ އިސް އިމާމު ފަޟީލަތުއްޝައިޚް މުޙައްމަދު ލަޠީފް ރޭ ވަނީ ބައްދަލުކުރައްވައިފައެވެ.
މި ބައްދަލުވުމުގައި ވާހަކަފުޅު ދައްކަވަމުން ޝައިޚް ލަޠީފް ވިދާޅުވީ އިމާމުން ތަމްރީން ކުރުމާއި އިމާމުންނަށް އިތުރު ތަމްރީންގެ ފުރުސަތުތައް ހޯދައިދިނުމަކީ ވަރަށް އިސްކަމެއް ދެއްވައިގެން ކުރައްވާ ކަމެއް ކަމަށާއި، މި ފުރުސަތުތަކުގެ ބޭނުން ހެޔޮ ގޮތުގައި ހިފުމަށް އެދިލައްވާ ކަމަށެވެ.