ހުޅުމާލޭގައި ގާއިމުކޮށްފައިވާ ބުޅާ ފެސިލިޓީ “އޮޅުހިޔާ” އަށް ކަނޑައެޅިފައިވާ އުސޫލުތަކާ ޚިލާފަށް މިވަގުތު ބުޅާ ގެންދިއުމަކީ ރަނގަޅު ކަމެއް ނޫން ކަމަށް ދަނޑުވެރިކަމާއި ދިރޭ ތަކެއްޗާބެހޭ ވުޒާރާއިން ބުނެފިއެވެ.
މާލޭ ސިޓީ ކައުންސިލުން މި ހަފުތާ ތެރޭގައި މަގުމަތީ ބުޅާތައް ނަގައި އޮޅުހިޔާއަށް ގެންދާނެ ކަމަށް ބުނުމާ ގުޅިގެން، މިނިސްޓްރީން ބުނީ އެތަނުގައި ފުރިހަމަ ކުރަން ޖެހޭ ގިނަ ކަންތައްތަކެއް އަދި ނުނިމި ހުރި ކަމަށެވެ.
މިނިސްޓްރީން ނެރުނު ބަޔާނުގައި ބުނެފައިވަނީ، “އެތަނުގައި މަސައްކަތްކުރާނެ އެއްވެސް ފަންނީ މުވައްޒަފެއް މިހާތަނަށް ރަޖިސްޓްރީ ކޮށްފައި ނުވޭ. އަދި އަލަށް ގެންނަ ބުޅާތައް ކަރަންޓީނު ކުރާނެ ކޮށިތަކާއި، ބަޔޮލޮޖިކަލް ކުނި ނައްތާލާނެ ނިޒާމެއްވެސް އެތަނުގައި ނެތް” ކަމަށެވެ. ހަމައެހެންމެ، އެސްއޯޕީތަކަށް ރިއާޔަތް ނުކޮށް އެތަނަށް ބުޅާތައް ގެންގޮސްފި ނަމަ، ބުޅާތަކުގެ ދުޅަހެޔޮކަމަށް ނޭދެވޭ އަސަރުތަކެއް ކުރާނެ ކަމަށާއި، އަދި އެތަނުގައި ބުޅާތަކަށް ކާންދޭނެ އެއްޗެއްސާއި ފެން ވެސް މިވަގުތު ހޯދިފައި ނުވާ ކަމަށްވެސް މިނިސްޓްރީއިން ބުނެފައިވެ އެވެ.
“އޮޅުހިޔާ” އަކީ، 5000 އަކަ ފޫޓުގެ ބިމެއްގައި، މާލެ ސަރަހައްދުގެ މަގުތަކުގައި އުޅޭ ބުޅާތައް ބަލަހައްޓަން މި ސަރުކާރުން ގާއިމު ކޮށްފައިވާ ފެސިލިޓީއެކެވެ. މިދިޔަ މަހުގެ ދެވަނަ ދުވަހު، އޮޅުހިޔާ ހުޅުވައިދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ.
ދިރޭ ތަކެއްޗާބެހޭ ވުޒާރާއިން ބުނީ “އޮޅުހިޔާ” އަށް ބުޅާތައް ގެންދިއުމުގައި އަމަލުކުރާނެ ގޮތުގެ އެސްއޯޕީތަކާއި ޕްލޭންތަކާއި ލަފާތައް އެ ވުޒާރާއިން މާލެ ސިޓީ ކައުންސިލާ ހިއްސާ ކޮށްފައިވީ ނަމަވެސް އެ ކަންކަމަށް މިހާތަނަށް އެއްވެސް ހިޔާލެއް ލިބިފައި ނެތް ކަމަށެވެ.
މިނިސްޓްރީން ވަނީ އަޕްޑޭޓްތައް ހޯދުމަށާއި މި މައްސަލަތައް ހައްލު ކުރުމަށް މާލެ ސިޓީ ކައުންސިލްގައި އެދިފައިވާ ކަމަށާއި ނަމަވެސް މިހާތަނަށް މިކަން ކުރެވިފައެއް ނުވާ ކަމަށްވެސް އެވުޒާރާއިން ވަނީ ފާހަގަކޮށްފައެވެ. އެހެންކަމުން، ބަޔާންކުރެވުނު ކަންކަން ފުރިހަމަ ނުކޮށް އޮޅުހިޔާ އަށް ބުޅާތައް ނުގެންދިއުމަށް ސިޓީ ކައުންސިލަށް އިލްތިމާސް ކުރާ ކަމަށްވެސް ދިރޭ ތަކެއްޗާ ބެހޭ ވުޒާރާއިން ބުނެފައިވެއެވެ.
މިނިސްޓްރީން އިތުރަށް ފާހަގަކޮށްފައިވާ ގޮތުގައި، އޮޅުހިޔާގައި އަދިވެސް ފުރިހަމަ ކުރަންޖެހޭ މުހިންމު ކަންތައްތަކެއް ހުރެއެވެ. އޭގެ ތެރޭގައި ބުޅާތަކަށް އަޅާލާނެ މުވައްޒަފުން ނެތުމާއި ބޭސް ހޯދާނެ ނިޒާމެއް ނެތުމާއި ބުޅާތަކަށް އެކަށީގެންވާ ކާނާއާއި ފެން ފޯރުކޮށްދޭނެ ނިޒާމެއް ނެތުމާއި ކެޓް ލިޓަރ ނެތުން ފަދަ ކަންކަން ހިމެނެއެވެ.
މީގެ އިތުރުން، އޮޅުހިޔާގެ މަސައްކަތް ހަރުދަނާ ކުރުމަށްޓަކައި ސްޓްރަކްޗަރަލް ބަދަލުތައް ގެންނަން ސިޓީ ކައުންސިލަށް ހުށަހަޅާފައިވާ ކަމަށާއި، ނަމަވެސް އެ ކަންކަން އަދި ރަނގަޅު ނުކުރެވޭ ކަމަށް މިނިސްޓްރީން ބުނެފައިވެއެވެ.
ސަރުކާރުން ގާއިމު ކޮށްފައިވާ މި ބުޅާ ފެސިލިޓީގައި ބުޅާތައް ކަރަންޓީނު ކުރާނެ ސަރަހައްދަކާއި ކްލިނިކަކާއި ލެބޯޓްރީއެއް ވަނީ ގާއިމު ކޮށްފައެވެ. އަދި ބުޅަލަށް ދޭންޖެހޭ ބޭސްތައް ހުންނަ ފާމަސީއަކާއި އެ ބުޅާތައް އުޅޭނެ ސަރަހައްދެއް ވެސް އެ ތަނުގައި ވަނީ ހަދާފަައެވެ. ނަމަވެސް، މިނިސްޓްރީން ފާހަގަކުރާ ގޮތުގައި މި ވަގުތު އެތަނަށް ބުޅާތައް ގެންދިއުމަކީ އެކަށީގެންވާ ކަމެއް ނޫނެވެ.