ދުނިޔޭގެ އެކި ކަންކޮޅުތަކުގައި ހާލުގައި ޖެހި، ކާބޯތަކެއްޗާއި އިންސާނީ އެހީއަށް ބޭނުން ޖެހިފައިވާ ނިކަމެތީންނަށް އެހީތެރިކަން ފޯރުކޮށްދިނުމަށް އަންނަ އަހަރަށް 47 ބިލިއަން އެމެރިކާ ޑޮލަރު ބޭނުންވާނެ ކަމަށް އދ އިން ހާމަކޮށްފިއެވެ.
އދ އިން ބުނެފައިވާ ގޮތުގައި، ދުނިޔޭގެ އެކި ކަންކޮޅުތަކުގައި ހިނގަމުންދާ ހަނގުރާމަތަކުން ސަލާމަތްވުމަށް ހިޖުރަ ކޮށްފައިވާ މީހުންނާއި، ކާބޯތަކެތީގެ އެހީއަށް ބޭނުން ޖެހިފައިވާ މީހުންގެ އަދަދު 190 މިލިއަނަށް އަރައެވެ.
އިންސާނީ އެހީގެ ކަންކަން ވިލަރެސް ކުރާ އދގެ އޮފީސް (އޯސީއެޗްއޭ)ގެ ވެރިޔާ ޓޮމް ފްލެޗަރ ވިދާޅުވެފައިވަނީ، ކުރިއަށް އޮތް އަހަރު 32 ޤައުމެއްގައި ހާލުގައި ޖެހިފައި ތިބި ނިކަމެތީންނަށް ކާބޯތަކެއްޗާއި އިންސާނީ އެހީގެ ސާމާނު ފޯރުކޮށްދިނުމަށް އަމާޒު ހިފާފައިވާ ކަމަށެވެ. އެހީ ފޯރުކޮށްދިނުމުގައި އެންމެ ބޮޑު އިސްކަމެއް ދޭނެ ޤައުމުތަކުގެ ތެރޭގައި ސޫދާން، ސޫރިޔާ، ފަލަސްޠީނުގެ ޣައްޒާ އަދި ޔޫކްރެއިން ހިމެނެއެވެ.
“ދުނިޔެ އެ ދަނީ ރޯވެ އަނދަމުން، އަލިފާންގަނޑު ނިއްވައިލެވޭނެ ހަމައެކަނި ގޮތަކީ އެހީވުން. އެންމެ ބޮޑަށް ހާލުގައި ޖެހިފައި ތިބި ނިކެމަތީން ތިބި ޤައުމުތަކާ އެކު ގުޅުންތައް އަޅުގަނޑުމެން ހަރުދަނާ ކުރަން ޖެހޭ،” ފްލެޗަރ ވިދާޅުވިއެވެ.
މިއީ، އޯސީއެޗްއޭގެ ތާރީޚުގައި ވެސް ހަތަރުވަނައަށް އެންމެ ގިނަ އަދަދަކަށް އެހީގެ ފައިސާ ހޯދަން އެދިފައިވާ އަހަރެވެ. 2023 ވަނަ އަހަރަށް އެހީގެ ގޮތުގައި 56 ބިލިއަން އެމެރިކާ ޑޮލަރު ހޯދުމަށް އދން މަސައްކަތް ކުރިއެވެ. ނަމަވެސް، 2024ވަނަ އަހަރު އެ އަދަދު ވަނީ 46 ބިލިއަނަށް ދަށްކޮށްފައެވެ. އޭގެ ތެރެއިން ލިބިފައި ވަނީ އެންމެ 43 ޕަސެންޓް ފައިސާއެވެ.
އެމެރިކާއިން އދއަށް ފޯރުކޮށްދެމުން ދިޔަ އެހީގެ އެންމެ ބޮޑު އިންސައްތައެއް ކަނޑައިލާފައިވާ ކަމަށް ބުނެވެއެވެ. މީގެ ސަބަބުން، ސޫރިޔާގެ ދާޚިލީ ހަނގުރާމައިގެ ސަބަބުން ހާލުގައި ޖެހިފައިވާ ނިކަމެތީންނަށް ކާބޯތަކެތި ފޯރުކޮށްދޭން ކުރަމުން ދިޔަ ޚަރަދު 80 ޕަސެންޓުން ދަށްކުރަން މަޖުބޫރުވިއެވެ.
މި ވަގުތު އޯސީއެޗްއޭގެ މަސައްކަތްތަކަށް ކުރިމަތިވެފައި އޮތް އެންމެ ބޮޑު ގޮންޖެހުމަކީ ކާރިސާތައް ނުވަތަ ހަނގުރާމަތައް ދިގުލައިގެން ދިޔުން ކަމުގައި ފްލެޗަރ ވިދާޅުވިއެވެ. މި ގޮތުން، އެ ފަދަ ހާލަތްތައް ޢާންމު ގޮތެއްގައި 10 އަހަރުގެ މުއްދަތަކަށް ދެމިގެންދާ ކަން އޭނާ ފާހަގަ ކުރެއްވިއެވެ. ދުނިޔޭގެ ޞިއްޙަތު ޖަމުޢިއްޔާ (ޑަބްލިޔުއެޗްއޯ)ގެ އެމަރޖެންސީތަކާ ބެހޭ ވެރިޔާ މައިކް ރަޔަން ވެސް ވިދާޅުވީ، ބައެއް ޤައުމުތަކުގައި ހަނގުރާމަތަކާއި ކާރިސާތައް ދާއިމީވެފައިވާ ކަމުގައެވެ.
އެމެރިކާއަށް ފަހު މި ވަގުތު އޯސީއެޗްއޭއަށް އެންމެ ބޮޑަށް ފައިސާގެ އެހީތެރިކަން ފޯރުކޮށްދެމުން ދަނީ ޖަރުމަނުވިލާތާއި ވިލާތުގެ ކޮމިޝަނުންނެވެ. ނަމަވެސް، ޑެންމާކުގެ ރެފިއުޖީ ކައުންސިލްގެ ވެރިޔާ ޝާލޮޓް ސްލެންޓަ ވިދާޅުވީ، ނިކަމެތީންނަށް އެހީތެރިވުމުގެ ބަދަލުގައި ވިލާތުގެ ގިނަ ޤައުމުތަކުން މި ވަގުތު އެންމެ ބޮޑު އިސްކަމެއް ދެމުން ދަނީ ދިފާޢީ ބަޖެޓު އިތުރު ކުރުމަށް ކަމުގައެވެ.
“[ޓްރަމްޕްގެ ފުރަތަމަ ދައުރާ އަޅައިބަލާއިރު] މި ވަގުތު ދުނިޔެ އޮތީ އިތުރަށް ނާޒުކު، ދެން ވާނެ ގޮތް ނޭނގޭ ފަދަ ހާލަތެއްގައި، ކާރިސާތައް އިތުރުވެފައި، އަދި އެމެރިކާ ސަރުކާރުން އިންސާނިއްޔަތަށް ޓަކައި ފޯރުކޮށްދޭ އެހީގެ ފައިސާ ކަނޑައިލައިފި ނަމަ، އެ ތަން ފޫބެއްދޭނެ އިތުރު ގޮތެއް ހޯދުމަށް ބޮޑެތި ގޮންޖެހުންތަކެއް ކުރިމަތިވާނެ،” ސްލެންޓަ ވިދާޅުވިއެވެ.
އދ އިން ގޮވާލާފައިވަނީ، ދުނިޔޭގެ އެކި ކަންކޮޅުތަކުގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް ބޭނުންވާ ފައިސާ ހޯދުމަށް އެހީތެރިވެދިނުމަށެވެ. އަދި މި މަސައްކަތުގައި ބައިނަލްއަޤްވާމީ މުޖުތަމަޢުގެ އެއްބާރުލުން ބޭނުންވާ ކަމަށް ބުނެފައިވެއެވެ. އެހެންނަމަވެސް، ދުނިޔޭގެ އިޤްތިޞާދީ ހާލަތާއި، ސިޔާސީ ބަދަލުތަކުގެ ސަބަބުން މި މަސައްކަތަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމަށް ވެސް އދ އިން ފާހަގަކޮށްފައިވެއެވެ.