އާސަންދަ ސްކީމުގެ ދަށުން އެއްވެސް ބޭހެއް ކަވަރުކުރުން ހުއްޓާނުލާ ކަމަށް އާސަންދައިން ބުނެފިއެވެ. މިކަން ހާމަކޮށްފައިވަނީ އާސަންދައިގެ ރަސްމީ ފޭސްބުކް ޕޭޖުގައި ކުރި ޕޯސްޓެއްގައެވެ.
އާސަންދައިން މިހެން ބުނެފައިމިވަނީ ސޯޝަލް މީޑިއާގައި ބައެއް ފަރާތްތަކުން އާސަންދައިން ކުރިން ލިބެމުން އައި ބޭސްތައް މިހާރު ނުލިބޭ ކަމަށް ބުނަމުންދާ ދަނޑިވަޅެއްގައެވެ. މީގެ އިތުރުން ބައެއް ފާމަސީތަކުން އާސަންދައިގެ ދަށުން ދޫކުރަންޖެހޭ ބޭސްތައް ދޫނުކޮށް، އާސަންދަ ނުލިބޭ ކަމަށް ބުނާ ވާހަކަތަކެއްވެސް ފެތުރެމުންދާ ވަގުތެއްގައެވެ.
އާސަންދައިގެ އެޕޯސްޓުގައި ބުނީ ކުރިއެކޭވެސް އެއްގޮތަށް މިހާރުވެސް އާސަންދަ ސްކީމްގެ ދަށުން ބޭހަށް ކަވަރޭޖް ލިބޭނެ ކަމަށެވެ. އަދި ސްކީމުން ކަވަރުކުރާ ބޭސްތަކާއި އެ ބޭސްތަކަށް ސްކީމުން ކަވަރުކުރާ މިންވަރު، އާސަންދަ ވެބްސައިޓުގެ "ޑައުންލޯޑްސް" ސެކްޝަނުގައިވާ "މާސްޓަރ މެޑިސިންސް އެންޑް ކޮންސިއުމަބްލްސް ލިސްޓް" އިން ފެންނަން ހުންނާނެ ކަމަށްވެސް އާސަންދައިން ބުނެފައިވެއެވެ.
ވެބްސައިޓް ޑައުންލޯޑްސް ލިންކް: އާސަންދައިގެ މިލިންކަށް ފިއްތާލައްވާށެވެ. އޭރުން އާސަންދަ ސްކީމުން ކަވަރުކުރާ ބޭސްތަކާއި އެ ބޭސްތަކަށް ސްކީމުން ކަވަރުކުރާ މިންވަރު މިލިންކުން ފެންނަން ހުންނާނެއެވެ.
އާންމު ފަރާތަކުން ހުވަދޫއަށް މައުލޫމާތު ދިން ގޮތުގައި އޭނާ ދާއިމަށް ބޭނުންކުރާ ބޭހެއް އަބަދުވެސް އާސަންދައިން ލިބެމުން އައި ނަމަވެސް، ފަހަކަށް އައިސް އެ ބޭސް ނުލިބޭތީ އެ ވާހަކަ ސޯޝަލް މީޑިއާގައި ހިއްސާކުރުމުން އާސަންދައިން އޭނާއާ ގުޅައި މުއާމަލާތްކޮށްފައިވާ ކަމަށް ބުންޏެވެ. އަދި އެފަދަ އެއްވެސް ބޭހެއް އާސަންދަ ސްކީމުން ހުއްޓާނުލާ ކަމަށް އާސަންދައިން އޭނާއަށް ކަށަވަރު ކޮށްދިން ކަމަށްވެސް އެ މީހާ ބުންޏެވެ.
"ވަރަށް ރަނގަޅަށް ކަންތައް ކުރީ އެމީހުން. ވަގުތުން ގުޅި ޝިކާވަތުން އެންގީ އަޅުގަނޑުގެ ޝަކުވާއެއް އޮތް ވާހަކަ. އަޅުގަނޑަށް ބޭސްލިބޭނެ ފާމަސީތައްވެސް ބުނެދިން. އަދި އެގޮތަށް އާސަންދަ ނުލިބޭ ކަމަށް ބުނާ ފާމަސީތަކުގެ ނަންތައް ހިއްސާ ކޮށްދިނުމަށްވެސް އެދުނު. އަޅުގަނޑަށް އެނގޭވަރަކީ އެގޮތަށް ސަމާލުވެ ހިދުމަތް ފޯރުކޮށްދޭނަމަ އެންމެނަށްވެސް ބޭސް ލިބުމުގައި ހުރި ދަތިތަކުން ދުރުވެވޭނެކަން،" އެ މީހާ ބުންޏެވެ.
އާސަންދައިން މި މައްސަލައަށް އަވަސް ފިޔަވަޅު އަޅައި، ރައްޔިތުންގެ ކަންބޮޑުވުންތަކަށް އަޑުއަހައި، އެކަންކަން ޙައްލުކުރުމަށް މަސައްކަތްކުރަމުންދާކަން މިކަމުން ދޭހަވެއެވެ. އަދި އާސަންދަ ސްކީމުގެ ދަށުން ބޭސް ލިބުމުގައި ދަތިތަކެއް ހުރިނަމަ، އެކަން ސީދާ އާސަންދައަށް އެންގުމަކީ މުހިންމު ކަމެއް ކަމަށް މި ކަމުން ދޭހަވެއެވެ.
އާސަންދައިން އިތުރަށް އާންމުންނަށް އިލްތިމާސްކޮށްފައިވަނީ، އާސަންދަ ނުލިބޭ ބޭހެއްނަމަ ބޭސްސިޓީގައި "ނޮޓްކަވާޑް" އޮންނާނެ ކަމަށެވެ. އެގޮތަށް ނެތް ބޭހެއް އާސަންދައިން ނުލިބޭނެ ކަމަށް ބުނެފިނަމަ، ސްކީމުން ކަވަރުކުރާ ބޭހެއް ސްކީމުގައި ހިމެނޭ ބޭސްފިހާރައަކުން ގަންނަން ޖެހިއްޖެ ހާލަތެއްގައި ޝިކާވަތިޗެޓްލައިން 7951400 އަށް ވަޓްސްއަޕް ނޫނީ ވައިބަރ މެދުވެރިކޮށް މެސެޖުކުރުމަށް އާސަންދައިން ވަނީ އިލްތިމާސްކޮށްފައެވެ.