މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގެ އިސްވެރިން ފުވައްމުލަކު ސިޓީއަށް ކުރެއްވި ދަތުރުފުޅެއްގައި، ފުވައްމުލަކު ސިޓީ ކައުންސިލާއި ބައްދަލުކުރައްވައި ތަރައްޤީގެ މަޝްރޫޢުތަކާއި ބެހޭގޮތުން މަޝްވަރާތައް ކުރިއަށް ގެންދަވައިފިއެވެ.
މިނިސްޓްރީގެ އިސްވެރިން ފުވައްމުލަކު ސިޓީ ކައުންސިލާއެކު ބޭއްވި ބައްދަލުވުމުގައި، ސިޓީގައި ކުރިއަށްދާ އެކިއެކި ތަރައްޤީގެ މަޝްރޫޢުތަކާ ބެހޭގޮތުން ފުޅާ ދާއިރާއެއްގައި ވަނީ މަޝްވަރާކޮށްފައެވެ. މީގެ އިތުރުން، ފުވައްމުލަކު ސިޓީގައި ހިންގަމުންދާ ބިން ހިއްކުމާއި ގޮނޑުދޮށް ޙިމާޔަތްކުރުމުގެ މަޝްރޫޢުތައް ކުރިއަށްދާ ސަރަހައްދުތަކަށް ޒިޔާރަތްކުރައްވައި، މަސައްކަތްތައް ކުރިއަށްދާގޮތް ބައްލަވާލައްވާފައި ވެއެވެ.
އެ ދަތުރުފުޅުގައި، ފުވައްމުލަކު ސިޓީގެ މަގުހެދުމުގެ މަޝްރޫޢު ކުރިއަށްގެންދިއުމަށް ހަވާލުކޮށްފައިވާ ކޮންޓްރެކްޓަރ ކަމުގައިވާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) ގެ ޓީމާވެސް މިނިސްޓްރީގެ އިސްވެރިން ބައްދަލުކުރެއްވިއެވެ. އެ ބައްދަލުވުމުގައި މަގުހެދުމުގެ މަޝްރޫޢުގެ މަސައްކަތް ކުރިއަށްދާ ގޮތާއި ދިމާވެފައިވާ ގޮންޖެހުންތަކާ ބެހޭގޮތުން މަޝްވަރާކޮށްފައިވާއިރު އެ ދަތުރުފުޅަކީ ފުވައްމުލަކު ސިޓީގެ ތަރައްޤީގެ މަޝްރޫޢުތައް އަވަސްކުރުމަށާއި، ކުރިމަތިވެފައިވާ ދަތިތައް ޙައްލުކުރުމަށް އެޅޭނެ ފިޔަވަޅުތައް ދެނެގަތުމަށް މުހިންމު ދަތުރުފުޅެއް ކަމުގައި އިމާރާތްކުރުމާއި ބިރާ ބެހޭ ވުޒާރާއިން ވަނީ ބުނެފައެވެ.
އެ ދަތުރުފުޅުގައި ބައިވެރިވެވަޑައިގެންނެވި ބޭފުޅުންގެ ތެރޭގައި މިނިސްޓަރ އޮފް ސްޓޭޓް އިބްރާހީމް ނަޡީމް، ޑެޕިއުޓީ މިނިސްޓަރ މުޙައްމަދު ޢިމްރާން ޙަސަން، ޑެޕިއުޓީ މިނިސްޓަރ ޙަސަން ވިސާލް އަދި މިނިސްޓްރީގެ ސީނިއަރ އޮފިޝަލުން ހިމެނެއެވެ.