ރާއްޖޭގެ ފުރަތަމަ ރައީސް މުހައްމަދު އަމީން ދީދީއަށް ރައްޔިތުން ހެދި ގޮތް ރައީސް ޑރ. މުހައްމަދު މުއިއްޒަށްވެސް ހަދަން ޖެހިދާނެ ކަމަށް ބުނެ ރައީސަށް އިންޒާރު ދިން މައްސަލައެއް ފުލުހުން ބަލަން ފަށައިފިއެވެ.
މި މައްސަލަ ކުރިމަތިވެފައި ވަނީ އިއްޔެ ރޭ ކުޅުދުއްފުށި ސިޓީގައި އިދިކޮޅު އެމްޑީޕީން “ގާނޫނުއަސާސީގެ ދިފާއުގައި” ނަމުގައި ބޭއްވި ޖަލްސާއެއްގައި ވާހަކަދެއްކި އަބްދުއްރަޙްމާން އިސްމާއީލު ކިޔާ މީހަކު ދެއްކި ވާހަކައަކާ ގުޅިގެންނެވެ.
އަބްދުއްރަހުމާން އިސްމާއީލް ވަނީ ރައީސް އަމީންގެ ވެރިކަމުގައި ރާއްޖެއަށް ދުންފަތް އެތެރެކުރުން މަނާ ކުރުމުން ކަން ހިނގައިދިޔަ ގޮތުގެ ވާހަކަ ދައްކަމުން “އަމީން ކުޅުއްވީ ދުންފަތާ” ކަމަށާއި “ރައީސް ޑރ މުއިއްޒު ކުޅުއްވަނީ ގާނޫނުއަސާސީއާ” ކަމަށް ބުނެފައެވެ.
“މުހައްމަދު އަމީނަށް ވީގޮތްވެސް ފެނިގެންދާނެ ދިވެހިރާއްޖޭގެ އެންމެހާ ލޮބުވެތި ރައްޔިތުންނަށް. އެހެންވީމާ ގާނޫނުއަސާސީއާ ކުޅޭ ކަމަށް ވަނީ ވިއްޔާ ފެންނާނެ ރީތި ކެއްސެއް ލިބިގެންދާނެ،” ކަމަށް އޭނާ ބުނިއެވެ.
ފުލުހުންގެ ފަރާތުން މައުލޫމާތު ދެއްވި ގޮތުގައި މި މައްސަލަ ފުލުހުންގެ ސަމާލު ކަމަށް އައިސްފައި ވާތީ، އެކަމާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށެވެ.
އެމްޑީޕީން އަންނަނީ އަންނަ އަންގާރަ ދުވަހުގެ ރޭ “ގާނޫނުއަސާސީގެ ދިފާއު” ގެ ނަމުގައި މާލޭގައި ބޮޑު އެއްވުމެއް ބާއްވަން ތައްޔާރު ވަމުންނެވެ. މި އެއްވުމަކީ ސަރުކާރުގެ ސިޔާސަތުތަކާ ދެކޮޅަށް ބާއްވާ އެއްވުމެއް ކަމަށް ބެލެވެއެވެ.
ރައީސް އަމީންގެ ވެރިކަމުގައި ހިނގި ހާދިސާތަކަށް ބަލާއިރު، އެ މަނިކުފާނު ބޭސްފަރުވާއަކަށް ކޮލަމްބޯގައި ހުންނަވަނިކޮށް ސަރުކާރުގައި އިސްކޮށް ތިބި ބަޔަކު ބައާވާތްކޮށް، ވެރިކަން ވައްޓާލާ ނައިބު ރައީސް އިބްރާހީމް ނާސިރު ވެރިއަކަށް ހަމަޖެއްސިއެވެ. އަމީން ރާއްޖެ ވަޑައިގަތުމާއެކު ދޫނިދޫގައި ބަންދުކޮށްފައި ބެހެއްޓުމުން، އެ މަނިކުފާނަށް ތާއީދުކުރައްވާ ރައްޔިތުން ނާސިރު ވެރިކަމުން ދުރުކުރުމަށް މަސައްކަތްކުރިއެވެ.