މިއަދު މާލޭގައި މުޒާހަރާ ކުރި ބިދޭސީންގެ ހައްގުތައް ގެއްލިފައިވާ ކަމަށް އެފަރާތްތަކުން ބުނެފައިވާތީ، އެ މައްސަލަ ތަހުގީގު ކުރަމުން އަންނަ ކަމަށް އިމިގްރޭޝަން ކޮންޓްރޯލަރ މުހައްމަދު ޝައްމާން ވަހީދު ވިދާޅުވެއްޖެއެވެ.
މިއަދު ހެނދުނު ރައީސް އޮފީހާއި މުލިއާގެ ހިމެނޭ “ގްރީންޒޯން” ގައި ބިދޭސީންގެ ބަޔަކު ވަނީ މުޒާހަރާ ކޮށްފައެވެ. ނަމަވެސް، އެއީ ކޮން ކުންފުންޏެއްގައި މަސައްކަތްކުރާ ބިދޭސީންކަން އަދި އެނގިފައެއް ނުވެއެވެ. މުޒާހަރާ ކުރަމުންދަނިކޮށް ފުލުހުން ވަނީ އެ މީހުން ހުއްޓުވާފައެވެ. ފުލުހުން މައުލޫމާތު ދީފައކގޮތުގައި، އެ މީހުން މުޒާހަރާ ކޮށްފައިވަނީ މުސާރަ ނުދޭތީއެވެ.
އިމިގްރޭޝަން ކޮންޓްރޯލަރ ޝައްމާން “އެކްސް” ގައި ކުރެއްވި ޕޯސްޓެއްގައި ވިދާޅުވެފައިވަނީ، މިއަދު މާލޭގެ ގްރީން ޒޯނުގައި މުޒާހަރާ ކުރި 55 ބިދޭސީން ފުލުހުން ވަނީ އިމިގްރޭޝަނާ ހަވާލުކޮށްފައި ކަމަށާއި، އެ މައްސަލައާ ގުޅިގެން ބަލަންޖެހޭ ކަންކަން މިވަގުތު ބަލަމުން އަންނަ ކަމަށެވެ.
އިތުރަށް ޝައްމާން ވިދާޅުވީ، އެ ބިދޭސީންގެ ހައްގުތަކެއް ގެއްލިފައިވާ ކަމަށް އެފަރާތްތަކުން ބުނަމުންދާތީ، މިވަގުތު ލޭބަރ ރިލޭޝަންސް އޮތޯރިޓީގެ ބޭފުޅުން ވެސް އިމިގްރޭޝަންގެ ޑިޓެންޝަން ސެންޓަރުގައި ހަރަކާތްތެރިވަމުން އަންނަ ކަމަށެވެ. އަދި އެފަރާތްތަކާމެދު ފިޔަވަޅެއް އަޅާނީ މައްސަލަ އެއްކޮށް ތަހުގީގުކޮށް ނިމުމުން ކަމަށް ޝައްމާން ވިދާޅުވިއެވެ.
“އިމިގްރޭޝަނުން ދޫކޮށްފައިވާ ހުއްދައިގެ ދަށުން ރާއްޖޭގައި އުޅޭ އެއްވެސް ފަރާތަކަށް ރާއްޖޭގައި ހެދިފައިވާ ގާނޫނާއި ގަވާއިދުތަކާ ހިލާފުވާކަށް ފުރުސަތެއް ނުދެވޭނެ. އަދި އެފަދަ ފަރާތްތަކާމެދު އިމިގްރޭޝަން ގާނޫނުގެ ދަށުން ޢަމަލު ކުރެވޭނެ،” ކަމަށް ޝައްމާން ވިދާޅުވިއެވެ.
ފުލުހުން ބުނެފައިވާ ގޮތުގައި، މި މުޒާހަރާގެ ތެރެއިން ހައްޔަރު ކޮށްފައިވަނީ އިންޑިއާގެ 38 މީހުންނާއި ބަންގްލަދޭޝްގެ 17 މީހުންނެވެ.