މާލޭގެ މާފަންނު ސަރަޙައްދުގެ ގެއަކުން ތެލިތަކެއް ވަގަށް ނެގިކަމުގެ ތުހުމަތުގައި ދިވެހި ފިރިހެނަކު ފުލުހުންގެ ހައްޔަރަށް ގެންގޮސްފިއެވެ.
މިއަދު މީޑިއާތަކަށް ފޮނުވި މެސެޖެއްގައި މޯލްޑިވްސް ޕޮލިސް ސަރވިސްއިން ބުނެފައިވަނީ މާފަންނު ސަރަހައްދުގެ ގެއަކުން ވައްކަން ކުރި މައްސަލައާ ގުޅިގެން ދިވެހި ފިރިހެނެއް ހައްޔަރު ކޮށްފައިވާ ކަމަށެވެ. ފުލުހުންގެ މީޑިއާ އޮފިޝަލް ވިދާޅުވެފައި ވަނީ މި މީހާ ވަގަށް ނަގާފައިވަނީ ތެލިތަކެއް ކަމަށެވެ. ނަމަވެސް، ހައްޔަރު ކުރެވުނު މީހާގެ އިތުރު މައުލޫމާތެއް ފުލުހުން ހާމަކޮށްފައެއް ނުވެއެވެ.
ސޯޝަލް މީޑިއާގައި ދައުރު ވަމުންދާ ވީޑިއޯއިން ފެންނަނީ ތުހުމަތު ކުރެވޭ މީހާގެ މޫނާއި ބޮލަށް ފުށް އަޅާފައ ހުރި އިރު އެމީހާ ފުލުހުންނާ ދެކޮޅު ހަދަމުންދާ ތަނެވެ. އަދި ބިންމަތީގައި ބަންޑުން ބޭއްވުމަށްފަހު، ދެ ފުލުހުން އޭނާގެ އަތުގައި ބިޑި އަޅުވާ މަންޒަރު ވެސް ފެނެއެވެ.
ލިބިފައިވާ މައުލޫމާތުން އެނގޭ ގޮތުގައި، މި ވައްކަން ހިނގާފައިވަނީ މާފަންނު ފީރޯޒު މަގުގައި ހުންނަ މާހަލް ގޭގައެވެ. ފުލުހުން ބުނާ ގޮތުގައި، މި މީހާ ހައްޔަރު ކުރެވިފައި ވަނީ އާންމު ރައްޔިތުންގެ އެހީތެރިކަމާއެކުގައެވެ.