ރައީސުލްޖުމްހޫރިއްޔާ ޑރ މުޙައްމަދު މުޢިއްޒު، މާލެއަތޮޅު ގާފަރު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ (އ.ތ.މ) ކޮމިޓީގެ މެންބަރުންނާއި ބައްދަލުކުރައްވައި، ކައުންސިލުން ފާހަގަކުރެއްވިކަންކަމުގެ ދާއިމީ ނަތީޖާ ރަނގަޅުވާނެ ގޮތަކަށް ކުރިއަށްގެންދަވާނެކަމުގައި ވިދާޅުވެއްޖެއެވެ.
މިއަދު ހެނދުނު ގާފަރު ކައުންސިލް އިދާރާގައި ބޭއްވެވި މި ބައްދަލުކުރެއްވުމުގައި ކައުންސިލުން ވަނީ ރަށުގެ ރައްޔިތުންގެ ހުރި ކަންބޮޑުވުންތަކާއި ރަށުގެ ތަރައްޤީއަށް ބޭނުންވާ ކަންތައްތައް ރައީސުލްޖުމްހޫރިއްޔާއާ ޙިއްޞާކުރައްވައި އެކަންކަމާ ގުޅޭގޮތުން މަޝްވަރާކުރައްވާފައެވެ. މިގޮތުން، ރަނގަޅު ފެންވަރެއްގެ ޞިއްޙީ މަރުކަޒެއް ޤާއިމުކުރުމުގެ މަސައްކަތް އަވަސްކޮށްދެއްވުމަށާއި، ރަށުގައި ގޯތި ދޫނުކުރާތާ 18 އަހަރުވެފައިވުމުން ރަށުގެ ގިނަ ރައްޔިތުން ގޯތި ބޭނުންވާކަން ފާހަގަކުރައްވައި ބިން ހިއްކުމުގެ މަޝްރޫޢު ކުރިއަށް ގެންގޮސްދެއްވުމަށް އެދިވަޑައިގެންނެވިއެވެ. މީގެ އިތުރުން ސްކޫލުގެ ޖާގައިގެ ދަތިކަމާއި، މަސްވެރިންގެ ފަރާތުން ހުރި ބައެއް ކަންބޮޑުވުންތައްވެސް މިބައްދަލުވުމުގައި ފާޅުކުރެއްވިއެވެ.
އަންހެނުންގެ ތަރައްޤީއަށް މަސައްކަތްކުރާ ކޮމިޓީއިން ވަނީ ބަޖެޓުގެ ދަތިކަމާއި ހޭންޑް ބޯލް ދަނޑު ނުނިމި އޮތުމުން ކަންބޮޑުވުން ފާޅުކުރައްވާފައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ ކައުންސިލުން ކަންބޮޑުވުން ފާހަގަކުރެއްވި ކަންކަމަށް ސަރުކާރުން ކުރައްވަމުންދާ މަސައްކަތްތަކުގެ މަޢުލޫމާތާއި، ތަރައްޤީއަށް ކުރިއަށްގެންދާ މަޝްރޫޢުތަކުގެ އެންމެ ފަހުގެ މަޢޫލޫމާތުތައް ޙިއްޞާކުރައްވާފައެވެ.
މިއަދުގެ ބައްދަލުކުރެއްވުމުގައި ރައީސުލްޖުމްހޫރިއްޔާ ވިދާޅުވީ އެމަނިކުފާނު ވަޢުދުވެވަޑައިގެންފައިވާ ކަންކަން ކޮށްދެއްވާނެކަމުގައެވެ. އަދި ތަޢުލީމާ ޞިއްޙީ ދާއިރާގެ މަޝްރޫޢުތައް މިއަންނަ އަހަރު ފެށުމަށް ޚާއްޞަ އިސްކަމެއްދެއްވާނެކަމުގައި އެމަނިކުފާނު ވިދާޅުވިއެވެ. ހަމައެއާއެކު ރަށުގެ ތަރައްޤީގެ ކަންކަން ތާށިނުވެ ކުރިއަށްގެންދިއުމަށް އަހަންމިއްޔަތުކަން ދެއްވާނެކަމުގައިވެސް އެމަނިކުފާނު ވިދާޅުވިއެވެ.